संघको निर्वाचन द्विपक्षीय प्रतिस्पर्धातर्फ

वैदेशिक रोजगार

Home
वैदेशिक रोजगार
संघको निर्वाचन द्विपक्षीय प्रतिस्पर्धातर्फ

नेतृत्व दौडमा गुरुङ र गेलाल संघको निर्वाचन द्विपक्षीय प्रतिस्पर्धातर्फ

काठमाडौं– नेपाल वैदेशिक रोजगार व्यवसायी संघको आगामी नेतृत्वका लागि द्विपक्षीय प्रतिस्पर्धा हुने निश्चित भएको छ । सत्ता साझेदारीमा रहेका दुई दल नेपाली कांग्रेस र नेकपा एमालेनिकट व्यवसायीहरु छुट्टाछुट्टै प्यानल बनाएर चुनावी प्रतिस्पर्धामा उत्रिएका छन् । कांग्रेसबाट भुवनसिंह गुरुङ र एमालेबाट नरेश गेलालको नेतृत्वमा प्यानल घोषणा गरिएको हो ।

कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसिएसनले अध्यक्षमा गुरुङसहित अन्य पदका उम्मेदवारहरु सार्वजनिक गरेको छ । यो प्यानलमा नेकपा माओवादी केन्द्रनिकट वैदेशिक रोजगार व्यवसायी गणतान्त्रिक मञ्च पनि जोडिएको छ । माओवादीनिकट व्यवसायीसँग चुनावी तालमेल गरेकोमा असन्तुष्टि जनाउँदै एसोसिएसनका केही व्यवसायी प्रगतिशीलतर्फ लागेका छन् ।

अर्कोतर्फ एमालेनिकट प्रगतिशील वैदेशिक रोजगार व्यवसायी मञ्चले लोकतान्त्रिक एसोसिएसनका असन्तुष्ट पक्ष र नेकपा एकीकृत समाजवादीनिकट एकीकृत वैदेशिक रोजगार व्यवसायी संगठनसँग गठबन्धन गरेर उम्मेदवार सार्वजनिक गरेको छ । यो प्यानलबाट अध्यक्षमा गेलालसहित अन्य पदका उम्मेदवारहरु बुधबार घोषणा गरिएको छ ।

यही चैत २९ गते हुने संघको निर्वाचनमा गुरुङ र गेलालबीचको प्रतिस्पर्धा रोचक हुने देखिएको छ । दुवै पक्ष आ–आफ्नो जित सुनिश्चित रहेको दाबी गर्छन् । एसोसिएसनको असन्तुष्ट पक्ष प्रगतिशीलतिर मिसिन पुग्दा त्यसको लाभ गेलाललाई पुग्ने उनीनिकट व्यवसायीहरु बताउँछन् । तर गुरुङपक्षका व्यवसायीहरु भने केही व्यक्ति विपक्षी प्यानलतर्फ लाग्दैमा फरक नपर्ने दाबी गर्छन् ।

एसोसिएसनको कार्यसमितिले गत चैत १७ गते गुरुङलाई अध्यक्षको आधिकारिक उम्मेदवार बनाउने निर्णयसँगै गणतान्त्रिकसँग तालमेल हुने आधिकारिक घोषणा गरेको थियो । त्यसपछि पूर्वअध्यक्षहरु विमल ढकाल, कुमुद खनाल, प्रज्ञान न्यौपानेलगायतले असन्तुष्टि व्यक्त गरेका थिए । उनीहरुले यो विषय पार्टी सभापति शेरबहादुर देउवासमक्ष राखेका थिए । सभापति देउवाबाट ‘पार्टीको नीति जे छ त्यही गर्नू’ भन्ने निर्देशन पाएको भन्दै उनीहरु प्रगतिशीलतर्फ लागेका हुन् । हाल कांग्रेस–एमाले सत्ता गठबन्धनमा रहेकाले प्रतिपक्षीसँग गठबन्धन गर्न नहुने उनीहरुको जिकिर छ । पार्टीले तल्लो तहसम्म पनि ‘माओवादीसँग तालमेल नगर्नू’ भनेकाले एमालेसँग तालमेल गर्नुको विकल्प नरहेको तर्क उनीहरुको छ ।

एसोसिएसन र गणतान्त्रिकका साझा उम्मेदवार गुरुङ निर्वाचन परिचालन मूल समारोह समिति बनाएर चुनावी प्रचारप्रसारमा जुटिसकेका छन् । विगतमा संघको सदस्यदेखि तृतीय र द्वितीय उपाध्यक्ष भएर काम गरेको अनुभव उनीसँग छ । एसोसिएसनमा सुरुदेखि नै आबद्ध रहेका गुरुङ त्यहाँ भने कुनै महŒवपूर्ण पदमा बसेनन् । आफू अनुभवी र परिपक्व उम्मेदवार भएकाले व्यवसायीले आफूलाई नै जिताउने उनको दाबी छ । गुरुङले वैदेशिक रोजगार व्यवसायको शुद्धीकरण र यस क्षेत्रको समस्या सम्बोधन गर्ने विषयलाई प्रमुख एजेण्डा बनाएका छन् ।

प्रगतिशीलका गेलाल भने एसोसिएसनको आन्तरिक कलहको फाइदा उठाउने दाउमा छन् । एसोसिएसनको असन्तुष्ट पक्ष र समाजवादीनिकट व्यवसायीको साथ पाएपछि उनी उत्साहित देखिन्छन् । गेलाल प्रगतिशील मञ्चका पूर्वअध्यक्ष र संघका पूर्वमहासचिव हुन् । अघिल्लोपटक २०७९ मा भएको निर्वाचनमा पनि एसोसिएसनको आन्तरिक किचलोको फाइदा प्रगतिशीलले उठाएको थियो । लोकतान्त्रिक एसोसिएसनबाट कुमुद खनाल अध्यक्षका उम्मेदवार हुँदा गुरुङ बागी उठेका थिए । यसपटक खनालको समूह त्यसैको रिस साँध्न लागिपरेको देखिन्छ ।

यसअघि फागुन २ गते हुने भनिएको संघको निर्वाचनमा पनि गुरुङलाई गलत ढंगबाट उम्मेदवार बनाइएको भन्दै एसोसिएसनबाट अध्यक्षका आकांक्षी छ जनाले विरोध जनाएका थिए । जसमा खनालसहित प्रज्ञान न्यौपाने, सुजितकुमार श्रेष्ठ, चिरञ्जीवी बस्याल, मेघनाथ भुर्तेल र किशोर केसी रहेका थिए । तर संघको वर्तमान कार्यसमितिले निर्वाचन स्थगित गरेर असार १७ गते पु¥याएको थियो । गुरुङले आफूलाई हराउन षड्यन्त्रपूर्वक चुनाव सारेको भन्दै विरोध जनाएका थिए । यो विवाद जिल्ला प्रशासन कार्यालयसम्म पुग्यो । गुरुङपक्षले निर्वाचन सार्ने संघ कार्यसमितिको निर्णय खारेजीका लागि निर्देशन जारी गर्न माग गरे पनि प्रशासनबाट त्यस्तो निर्देशन जारी भएन । यद्यपि, व्यवसायीहरुको विरोधपछि निर्वाचन मिति अगाडि सार्दै चैत २९ लाई तय गरिएको हो ।