भक्तपुर, (प्रस)– चाँगुनारायण–९ स्थित जय ब्रम्हायणी ईँटाभट्टामा खेल्दै गरेका एक डेढ वर्षे बालकको सोही ईँट्टाभट्टामा माटो बोक्ने बा५ ख७९७१ नंको मिनीटिपरको ठक्करबाट मृत्यु भएको छ ।
मृत्युहुनेमा सर्लाही जिरायल घर भएका १९ वर्षीय ईश्वर मोक्तानको १८ महिने छोरा शिशिर मोक्तान रहेको महानगरीय प्रहरी परिसर भक्तपुरका प्रवक्ता प्रहरी नायब उपरीक्षक दीपक गिरीले जानकारी दिए । मध्यपुर अस्पताल ठिमी पुर्याउने क्रममा बालकको मृत्यु भएको जनाइएको छ ।
प्रहरीले सवारी साधन र सवारी चालक भक्तपुर नगरपालिका–९ च्यामासिं बस्ने ४० वर्षीय श्याम फैजुलाई नियन्त्रणमा लिई थप अनुसन्धान गरिरहेको प्रहरी नायब उपरीक्षक गिरीले जानकारी दिए ।
बस–अटोरिक्सा ठोक्किँदा एकको मृत्यु
यसैबीच, कैलालीको अत्तरियामा बस र अटोरिक्सा एकापसमा ठोक्किँदा गोदावरी नगरपालिका–६ कोलीकटानका ५३ वर्षीय तुले कोलीको मृत्यु भएको छ । गोदावरी नगरपालिका–३ चौकीडाँडास्थित मालिकाटोल जाने बाटो नजिकै महेन्द्रनगरबाट अत्तरियातर्फ आउँदै गरेको ना४ ख४५२८ नंको बस र विपरीत दिशाबाट गइरहेको से१ ह२११४ नंको अटो एकापसमा शनिबार ठोक्किँदा गम्भीर घाइते भएका कोलीको उपचारका क्रममा मृत्यु भएको प्रहरीले जनाएको छ ।
मुख र छातीमा चोट लागेर गम्भीर घाइते भएका कोलीको सेती प्रादेशिक अस्पतालमा उपचारका क्रममा मृत्यु भएको थियो । दुर्घटनामा अटोचालक मानबहादुर विक, नखरी कोली, अर्जुन कोली र दुर्गा कोली घाइते भएका छन् ।
