काठमाडौं– कोरोना भाइरस (कोभिड–१९)को संक्रमण रोक्न नेपाल सरकारले अहिलेसम्म प्रभावकारी कदम नचालेको गुनासोहरू संक्रमणजस्तै बढ्दै गएको छ । करिब एक महिनाअघि चीनको वुहानबाट फैलिएको यो घातक भाइरसको संक्रमण विश्वव्यापी हुँदै गइरहेको अवस्थामा विश्वले नै चिन्ता बढाएका छन् । तर, नेपाल सरकारले भने कोरोना भाइरस नियन्त्रणमा प्रभावकारी कदम चालेको छैन । यद्दपी विकासित देशहरू समेत कोरोना नियन्त्रणका लागि कम्मर कसेर लागेका छन् ।
कोरोना भाइरस नियन्त्रण गर्न छिमेकी मुलुक भारत सरकारले कडा कदम चालेको छ । भारतले कोरोना भाइरस नियन्त्रणका लागि भन्दै विश्वका सबै देशसँग भारत आवत–जावतमा रोक लगाएको छ । अमेरिकाजस्तो विकसित देशले समेत युरोपियन मुलुकसँग हवाइ सेवा तथा आवत–जावतमा प्रतिबन्ध गर्ने घोषणा गरेको छ ।
अमेरिकाले बेलायतबाहेक युरोपका सम्पूर्ण मुलुकबाट आज शुक्रबारदेखि लागू हुनेगरी एक महिनासम्म प्रवेशमा प्रतिबन्ध गरेको छ । तर, नेपाल सरकार भने हेर र पर्खमा रहेको छ । विश्व स्वास्थ्य संगठन (डब्लूएचओ) कोरोना भाइरसको संक्रमणलाई ‘विश्व महामारी’को संज्ञा दिएसँगै विश्व सर्तक बनेको छ ।
भारतले आज शुक्रबारदेखि नै लागू हुनेगरी विश्वका सबै मुलुकको पर्यटकमा रोक लगाएको छ । यतिमात्र नभएर भारतीय नागरिकले समेत एक महिनासम्म आफ्नो मुलुक छिर्न पाउने छैनन् । कोरोना भाइरस प्रकोपले महामारी रूप लिएपछि उक्त कठोर कदम उठाइएको भारत सरकारले जनाएको छ ।
भारतले कोरोना भाइरसको संक्रमण रोक्न १५ अप्रिलसम्म सबै भिसा निलम्बन गर्ने निर्णय गरेको छ । स्वास्थ्यमन्त्री डा. हर्ष बर्धनको अध्यक्षतामा बसेको बैठकले कोभिड–१९ को संक्रमण फैलिन रोक्न आवश्यक कदम चाल्ने निर्णय गरेको हो ।
१५ अप्रिलसम्म राजनीतिक, सरकारी, संयुक्त राष्ट्रसंघ, अन्तर्राष्ट्रिय संस्था, इम्प्लोइमेन्ट र प्रोजेक्ट भिसाबाहेक अन्य भिसा १५ अप्रिलसम्म निलम्बन गर्ने निर्णय गरेको छ ।
भारत सरकारले ओसीआई कार्ड भएका (प्रवासी भारतीय नागरिक)लाई मुक्त यात्राको सुविधामा समेत १५ अप्रिल २०२० सम्म रोकेको छ । यस्तै, १५ फेबु्रअरीपछि चीन, इटली, इरान, कोरिया, फ्रान्स, स्पेन, जर्मनीलगायतका मुलुकबाट भारत आउने सबै यात्रुलाई १४ दिन क्वारेन्टाइनमा राखिनेछ ।
पछिल्लो समय कोरोना भाइरस विश्वका १२४ मुलुकमा फैलिएको छ भने एक लाख १८ हजार मानिसमा संक्रमण देखिएको छ । त्यसमध्ये चार हजार पाँच सयभन्दा बढीले ज्यान गुमाइसकेका छन् । भाइरस संक्रमण तिव्र रूपमा फैलिँदै गएपछि गएको मंगलबार विश्व स्वास्थ्य संगठन (डब्ल्यूएचओ)ले ‘महामारी’को संज्ञा दिएको थियो । तर, यसमा संक्रमण रोक्न देशहरूले के–कस्ता उपाय अपनाउँछन् भन्नेमा महामारीको स्तर निर्धारण हुने डब्ल्यूएचओले जनाएको छ ।
डब्लूएचओले कोरोना भाइरसको संक्रमणलाई ‘महामारी’ को संज्ञा दिएसँगै अमेरिकाले कडा कदम चालेको हो । बिहीबार अमेरिकी राष्ट्रपति डोनल्ट ट्रम्पले विशेष सम्बोधन गर्दै एक महिनासम्म युरोपबाट अमेरिका प्रवेशमा प्रतिबन्ध लगाउने घोषणा गरेका हुन् । युरोपियन मुलुकमा तिव्ररूपमा संक्रमण फैलिँदै गएपछि यस्तो कडाइ गरिएको ह्वाइट हाउसले जनाएको छ । यसैबीच बिहीबार नै अमेरिकाले कोरोनाविरुद्ध लड्न करोडौँ डलर विनियोजन गरेको छ ।
यस्तो अवस्था नेपाल सरकारले पनि यो भाइरसको संक्रमणप्रति सचेतनासँगै पुर्वतयारी गर्नु आवश्यक छ । तर, अहिलेसम्म सरकारले कोरोना भाइरसको संक्रमण रोकथाम तथा नियन्त्रणमा गम्भीरता देखाएको छैन जबकि, डब्लूएचओले नेपाललाई कोरोनाको उच्च जोखिम मुलुकमा राखेको छ ।
