काठमाडौं– गएको एक वर्षमा झण्डै आठ लाख नेपाली रोजगारीका लागि विभिन्न मुलुकमा पुगेका छन् । वैदेशिक रोजगार विभागको तथ्यांकअनुसार गत वर्ष २०८० को पुसदेखि यस वर्षको मंसिर मसान्त (सन् २०२३ डिसेम्बर १७ देखि २०२४ डिसेम्बर १५) सम्मको अवधिमा सात लाख ९२ हजार ५९४ जना श्रम स्वीकृति लिएर वैदेशिक रोजगारीमा गएका हुन् । यो नयाँ तथा पुनः श्रम स्वीकृति लिएका श्रमिकको कूल संख्या हो ।
यसरी विदेसिनेमा महिलाको संख्या साढे १० प्रतिशत अर्थात् ८४ हजार ६५२ रहेको छ । बाँकी सात लाख सात हजार ९४२ जना पुरुष रहेका छन् ।विभागको मासिक तथ्यांकअनुसार सबैभन्दा बढी मंसिर महिनामा ८४ हजार २२६ जना श्रम स्वीकृति लिएर विभिन्न मुलुकमा रोजगारीका लागि गएको देखिन्छ । गत जेठ महिनामा दोस्रो बढी ७२ हजार ८६१ जना विदेसिएको तथ्यांक छ ।
यस्तै गत कात्तिकमा ७० हजार ९९० जना, गत वर्षको चैतमा ७० हजार ९३३ जना, गत वैशाखमा ७० हजार ६३७ जना, गत वर्ष पुसमा ६५ हजार ८१३ जना, फागुनमा ६५ हजार ६५८ जना तथा माघमा ६२ हजार १४७ जनाले वैदेशिक रोजगारीमा जान श्रम स्वीकृति लिएका थिए । यसैगरी साउनमा ५९ हजार ५७५ जना, असारमा ५८ हजार ७३६ जना, भदौमा ५७ हजार ४९३ जना र असिोजमा ५३ हजार ५२५ जना विदेसिएको विभागले जनाएको छ ।
तथ्यांकअनुसार उक्त अवधिमा विदेसिनेको संख्या अघिल्लो वर्षको सोही अवधिको तुलनामा ९५ हजार ८२८ ले बढेको छ । सन् २०२२ को डिसेम्बरदेखि सन् २०२३ को डिसेम्बरसम्म श्रम स्वीकृति लिएर विदेसिनेको संख्या छ लाख ९६ हजार ७६६ रहेको थियो । यो तथ्यांकले वैदेशिक रोजगारीमा जानेको संख्या पछिल्लो वर्ष झन् बढेको देखाउँछ ।
मुलुकमा रोजगारीको अवसर नहुँदा वैदेशिक रोजगारीमा जानुपर्ने बाध्यता रहेको छ । हाल दैनिक दुई हजार भन्दा बढी संख्यामा नेपाली कामदार रोजगारीका लागि विदेस जाने गरेको तथ्यांकमा देखिन्छ । सरकारले बाध्यात्मक वैदेशिक रोजगारलाई अन्त्य गर्ने बताए पनि त्यसतर्फ खास काम हुन नसकेको सरोकारवालाहरु बताउँछन्, जसलाई तथ्यांकले पनि पुष्टि गर्छ । रोजगारीका लागि विदेसिनेको लहर दिनप्रतिदिन बढ्दै जाँदा गाउँघर भने युवाविहीन बन्दै गएका छन् । यसरी विदेसिनेले मुलुकमा रेमिट्यान्स भित्र्याउन योगदान गरे पनि युवा जनशक्तिको पलायनले दीर्घकालीन रुपमा मुलुकमा समस्या निम्त्याउने विज्ञहरुको भनाइ छ ।
