काठमाडौं– गीतकार दिलकुमार तामाङको देशभक्तिपूर्ण भावयुक्त शब्दहरूमा रहेको नयाँ गीत ‘धेरै गर्व गर्याैँ हामीले’ को लिरिकल भिडियो सार्वजनिक भएको छ । नेपालका वरिष्ठ एवम् ‘भर्सटायल’ गायक राजेशपायल राई र नेपाल आइडलबाट नेपाली साङ्गीतिक क्षेत्रमा उदाएकी गायिका ममता गुरुङको स्वरमा साे गीतलाई गीतकार दिलकुमार तामाङकै युट्युब च्यानलबाट सार्वजनिक गरेका हुन् ।
उक्त गीतलाई ख्यातीप्राप्त सङ्गीतकार दीपक शर्माले सङ्गीत भरेका छन् । गीतमार्फत् तामाङले नेपालीहरू इतिहास र वीरताको गर्व र आत्मरतिमा असाध्यै रमाउने गरेका तर वीरतापूर्ण इतिहासको जगमा देशको पहिचानलाई विश्व मञ्चमा अझैमाथि उठाउन मिहेनत र इमानको कमी रहेको सन्देश दिएका छन् । देशको सम्मुन्नतिका लागि इतिहासको गौरवका साथसाथै सम्पूर्ण नेपालीजन मिहेनती, प्रतिवद्ध र इमानी हुन आवश्यक रहेको तामाङद्वारा लिखित गीतको केन्द्रीय भाव हो ।
जातीय, भाषिक, धार्मिक र साँस्कृतिक रूपमा मात्रै नभएर भौगोलिक रूपमा पनि हिमाल, पहाड र तराईको सङ्गमताले नेपालको विविधता झल्किएको र त्यो नै नेपालको पहिचान र निधिको रूपमा गीतकार तामाङले चित्रण गरेका छन् । त्यही भएर देशलाई समृद्ध र विकसित बनाउन तामाङले मूलतः कृषि, ऊर्जा, पर्यटन र प्रविधिसँगै पूर्वाधार क्षेत्रमा विकास गर्नुपर्ने सुझाएका छन् । त्यसका लागि भने पहिले श्रमशक्ति जवान युवावर्गमा ज्ञान र सीप सिकाउनुका साथै जाँगर र साहस दुवै भर्नुपर्ने औँल्याएका छन् । त्यसो गरे सम्मुन्नत देश बन्ने विश्वास गीतकार तामाङको रहेको देखिन्छ ।
उनका अनुसार हिन्दुहरूको आस्थाको केन्द्र पशुपतिनाथ र भगवान बुद्धको जन्मस्थान लुम्बिनीसँगै विश्वको सर्वोच्च शिखर सगरमाथा नेपालको पहिचान र धरोहरको रूपमा रहेको र यस्ता धरोहरहरू देशको समुन्नतिको आधारशीला हुन सक्ने भएकाले सम्पूर्ण नेपाली सम्मुन्नत नेपाल बनाउने अठोटबाट अघि बढ्नुपर्नेे राय रहेको छ ।
गीतकार तामाङले यसअघि ‘पूर्वै पाँचथर’ बोलको गीत सार्वजनिक गरेका थिए । जन्म जिल्ला पाँचथरको परिचय र वर्णन रहेको उनको सो गीत पाँचथरेहरू माझ लोकप्रिय छ । निजामती सेवामा सेवारत गीतकार तामाङ उपसचिव हुन् । उनी हाल गृह मन्त्रालयका सूचना अधिकारीको रूपमा कार्यरत छन् ।
