बारा - गढिमाइ पञ्चवर्षीय मेला २०८१ सुरक्षाको लागि सशस्त्र प्रहरी बल नेपालले करीब ५ सय जना सुरक्षा फौज परिचालन गरेकाे छ । बारा जिल्लाको महागढीमाई नगरपालिका–१ स्थित गढीमाई मन्दिरमा लागेको पञ्चवर्षीय मेला २०८१ सुरक्षार्थ करीब ५ सय जना सशस्त्र प्रहरी २४सै घण्टा परिचालित भएको हाे ।
मंसिर १ गतेदेखि सुरु भएको मेला यही ३० गतेसम्म संचालन हुनेछ । उक्त मेलालाई सुरक्षित एवं भयरहित वातावरणमा सम्पन्न गराउनका लागि नं. १२ गण बाराबाट सशस्त्र प्रहरी उपरीक्षक सन्तोष बहादुर सिंहको कमाण्डमा टोली परिचालन भएको छ भने मेला सुरक्षा योजना अनुसार सशस्त्र प्रहरी नायव उपरीक्षक रविन सिलवालको कमाण्डमा मेला अवधीभरको लागि मेला स्थलमा कमाण्ड पोष्ट स्थापना गरेको छ ।
मेला सुरक्षार्थ २ वटा तालिम प्राप्त डग परिचालन गरिएको छ । मेलामा भिड व्यवस्थापन र निगरानी गर्न ड्रोनको प्रयोग गरिएको छ भने मेला परिसरमा रहेको पोखरीमा कुनै पनि घटना दुर्घटना भएमा तत्कालै उद्धारको लागि विपद् व्यवस्थापन तालिम प्राप्त टोली रबर बोटसहित २४सै घण्टा तैनाथ रहेको छ ।
उक्त मेलामा ठुलो संख्यामा भक्तजनहरुको उपस्थिती हुने भएकोले मेला सुरक्षा योजनाअनुसार सशस्त्र प्रहरी बल नेपालले उच्च सर्तकता अपनाउँदै सुरक्षा व्यवस्था थप मजबुत बनाउन मेला अवधीभर परिचालित रहने जनाइएकाे छ ।
-1745656903.jpeg)