काठमाडौं- रियालिटी शो ‘एक्टिङ स्टार’को जुरी सार्वजनिक गरिएको छ।गायन, नृत्य र कमेडीका रियालिटी शोहरुलाई दर्शकले रुचाइरहेका बेला ‘एक्टिङ स्टार’ पनि आउन लागेको हो । केहि महिना अघि डिजिटल अडिसनको आव्हान गरेर प्रतियोगी खोज्दै गरेको रियालिटी शोको जुरी फाइनल भएको हाे ।
जुरी टिममा निर शाह,अनुप बराल र ऋचा शर्मा रहेको जानकारी आयोजकले जनाएको छ। अभिनयका बादशाह भनेर चिनिने निर शाह,थुप्रै सफल कलाकारका गुरु अनुप बराल र चर्चित अभिनेत्री ऋचा शर्माले ‘एक्टिङ स्टार’ को छनोट गर्ने भएका छन्।
डिजिटल अडिसनमार्फत हालसम्म कलाकार बन्न चाहने हजार भन्दा बढीले भिडियो खिचेर पठाएको कार्यक्रम निर्माण कम्पनी महक मिडिया नेटवर्कले जानकारी दिएकाे छ । डिजिटल अडिसनबाट छनाैटमा पर्न सफल व्यक्तिहरुलाई उनीहरुकै गाउँ ठाउँमा पुगेर सहभागिताको प्रमाण पत्र प्रदान गर्ने निर्माण टिमले बताएकाे छ ।
कार्यक्रममा सहभागी हुनको लागि डिजिटल अडिसनमार्फत बाल कलाकार, युवा कलाकारको साथसाथै वृद्धहरुको समेत रुची पाइएकाे मिडिया नेटवर्कले जानाएकाे छ ।
अभिनयमार्फत कला प्रस्फुटन गर्ने उद्देश्यले शो ल्याउन लागिएको उक्त शोको निर्देशन विशाल भण्डारीले गर्नेछन्। रियालिटी शो ‘एक्टिङ स्टार’ एपिवान टिभीमार्फत प्रशारण हुने जनाइएकाे छ ।
‘एक्टिङ स्टार’ को डिजिटल अधिकार ओएस आर डिजिटलले खरिद गरेको छ। ‘एक्टिङ स्टार’ को विजेताले नगद पुरस्कार राशीसहित फिचर फिल्ममा काम गर्ने अवसर पाउनेछन्।
