वुहान (चीन)– कोरोना भाइरस (कोभिड–१९)को संक्रमण चीनमा घट्दै गएको छ । वुहानबाट फैलिएको कोरोना भाइरसको संक्रमणबाट चीन मुक्त हुँदै गए पनि यो भाइरस संसारभर फैलिने क्रममा छ ।
यो संक्रमण मंगलबारसम्ममा विश्वका १ सय १२ देशमा फैलिसकेको छ भने चीनमा भने नियन्त्रणनजिक पुगेको छ । पछिल्लो समय चीनमा संक्रमितको संख्या दिनप्रति दिन घट्दै गएपछि जनजीवन सामान्य बन्दै गएको छ ।
केही हप्ता अघिसम्म एकैदिन हजारौँंको संख्यामा संक्रमित बढेको चीनमा पछिल्लो समय दुई अंकमा झरेको छ । केही दिनयता कोभिड–१९ को उद्गम मानिएको चीनको हुपै प्रान्तको वुहान सहरबाहेक अन्य सहर र प्रान्तमा नयाँ संक्रमित एकदम न्यून रहेका छन् । करिब ५० दिनभित्र चीनको जनजीवन सामान्य बन्दै गएको हो । चीन आकस्मिक र कठिन युद्ध बनेको कोभिड–१९ माथि विजय निकट पुगेको छ ।
गत २३ जनवरीमा चिनियाँ नयाँ वर्ष नजिकिँदै गर्दा वुहानलाई लकडाउन गरिएको थियो । चीनका धेरै सहर र प्रान्तले समेत आकस्मिक स्वास्थ्य संकट घोषणा गर्दै पहिलोस्तरको चेतावनी जारी गरेको थियो । तर, पछिल्लो समय संक्रमित घटेदै गएपछि अस्थायी रूपमा स्थापना गरिएका सबै १६ वटा अस्पताल मंगलबारबाट बन्द गरिएको छ ।
यसैबीच कोरोना भाइरसको संक्रमणका कारण ४ हजारभन्दा बढी व्यक्तिको मृत्यु भएको फ्रान्सेली समाचार संस्था एएफपीले मंगलबार जनाएको छ । यस भाइरसबाट १ लाख १४ हजार ४५८ जनामा संक्रमण पुष्टि भएको छ, यसमध्ये ६४ हजार १२० जना निको भएर घर फर्किएको जनाइएको छ । यस भाइरस संक्रमणका कारण विश्वभरी चार हजार २७ व्यक्तिको मृत्यु भएको मंगलबार प्राप्त समाचारमा जनाइएको छ ।
यस्तै, बंगलादेश, अल्बानिया र पाराग्वेमा तीन ओटा नयाँ देशमा कोभिड–१९ का संक्रमण देखिएपछि विश्वव्यापी स्वास्थ्य चुनौतीको चिन्ता बनेको कोरोना भाइरस संसार ११० देशमा फैलिएको विश्व स्वास्थ्य संगठन (डब्लुएचओ)ले जनाएको छ ।
यस भाइरसको संक्रमण सुरु भएको चीनको हुबेई प्रान्त वुहानमा एकै दिनमा १७ व्यक्तिको मृत्यु भएपछि चीनभरी यस रोगबाट मृत्यु भएपछि तीन हजार १३६ पुगेको जनाइएको छ । एक दिनमा मारिएका १७ मध्ये १६ जना हुृबेईको प्रान्तीय राजधानी वुहानका रहेका जनाइएको छ । गत २४ घण्टा यी तीन देशमा कोरोना भाइरस संक्रमण फैलिएको डब्लुएचओले सोमबार प्रकाशित एक विज्ञप्तिमा जनाएको छ । गत २४ घण्टामा विश्वभरी तीन हजार ९९३ मा यस भाइरसको थप सङ्क्रमण देखिएको डब्लुएचओले जानकारी दिएको हो ।
इटालीमा यस भाइरसको संक्रमणपछि मृत्यु हुने व्यक्तिको संख्या ४६३ पुगेको जनाइएको छ । त्यसैगरी दक्षिण कोरियामा सात हजार ५१३ जना संक्रमित रहेका र ५४ जनाको मृत्यु भएको जनाइएको छ ।
यसैबीच इरानमा ७ हजार १६१ जना संक्रमित रहेका र २३७ व्यक्तिको मृत्यु भएको मंगलबार प्राप्त समाचारमा जनाइएको छ । विश्वका विभिन्न तथ्यांकबारे जानकारी राख्ने वेभसाइट वल्डोमिटरका अनुसार कोरोना भाइरसको संक्रमणपछि उपचार गराएर घर फर्किनेको संख्या ९४ प्रतिशत रहेको छ ।
घातक कोरोना भाइरसबाट संक्रमितको संख्या भारतमा ४७ पुगेको छ । मंगलबारसम्म ४७ जनामा कोरोना भाइरसको संक्रमण भएको पुष्टि भएको एएनआईले जनाएको छ । उनीहरूमध्ये केरलाका तीन जनालाई पूर्ण उपचारपछि अस्पतालबाट फिर्ता गरिएको जनाइएको छ ।
यस्तै, जर्मनीमा संक्रमितको संख्या एक हजार नाघेको छ । रोबर्ट कोच इन्स्टिच्यूटले सोमबारसम्ममा एक हजार ११२ जना संक्रमित भएको जनाएको छ । यस्तै, माल्दिभ्समा कोरोनाका कारण चुनावी कार्यक्रम स्थगित गरिएका छन् भने बेलायतमा कोरोना भाइरस संक्रमितको संख्या ३१९ पुगेको बेलायतका स्वास्थ्य अधिकारीहरूले बताएका छन् । जापानमा भने मृत्यु हुनेहरूको संख्या सोमबारसम्म १६ पुगेको छ । संक्रमितको संख्या ५०५ पुगेको छ ।
