- उपनिर्वाचन हुन लागेको एकमात्र नगरपालिका कीर्तिपुरमा दलहरुको प्रतिष्ठाको लडाइँ बन्ने देखिन्छ
- नेपाली कांग्रेसले जितेको यो नगरपालिकामा एमालेले केन्द्रीय सदस्य सुरेन्द्र मानन्धरलाई उम्मेदवार बनाउँदा माओवादीले प्रा.डा. शिवशरण महर्जनलाई अघि सारेको छ
- नेपाली कांग्रेस र राष्ट्रिय स्वतन्त्र पार्टीले भने कुनै तहमा उम्मेदवार चयन गर्न सकेको छैन
काठमाडौं– स्थानीय तहको आसन्न उपनिर्वाचनका लागि दलहरु धमाधम उम्मेदवार चयनमा लागेका छन् । विभिन्न कारण रिक्त भएका विभिन्न ४४ पदमा जनप्रतिनिधि चुन्न मंसिर १६ गते निर्वाचन हुँदै छ । जसमा काठमाडौंमा रहेको कीर्तिपुर नगरपालिकाले धेरैको ध्यान तानेको छ ।
एक त उपनिर्वाचन हुन लागेको एकमात्र नगरपालिका, अर्को संघीय राजधानीको जिल्लामा पर्ने स्थानीय तह भएकोले प्रमुख दलहरुले कीर्तिपुरलाई विशेष प्राथमिकताका साथ उम्मेदवार चयन थालेका छन् । सत्तानेतृत्व दल नेकपा एमालेले यहाँ केन्द्रीय सदस्य सुरेन्द्र मानन्धरलाई उमेदवार बनाउने भएको छ । प्रमुख प्रतिपक्षी नेकपा माओवादी केन्द्रले प्रा.डा. शिवशरण महर्जनलाई उम्मेदवार बनाउने निर्णय गरेको छ । महर्जन २०७९ को स्थानीय तह चुनावमा कांग्रेसका राजकुमार नकर्मीसँग पराजित भएका थिए । कांग्रेसले भने यहाँ उम्मेदवार चयन गर्न सकेको छैन ।
नगरप्रमुखको उमेदवार बनाउन कांग्रेस नगर समितिले ११ जनाको नाम सिफारिस गरी क्षेत्रीय कमिटीमा पठाएको छ । सिफारिसमा नगरसभापति कृष्णमान डंगोलको नाम पहिलो नम्बरमा छ । त्यसपछि बद्रीलाल महर्जन, हिमाल कार्की, जमुना नकर्मी, संगीत बोगटी, सशीर महर्जन, राममान सिंह, जनकलाल महर्जन, किरण केसी, मीनप्रकाश महर्जन र सचिन्द्र महर्जनको नाम राखिएको छ । चौंथो नम्बर सिफारिस भएकी जमुना नकर्मी यसअघिका नगरप्रमुख नकर्मीकी श्रीमती हुन् । क्षेत्रीय कमिटीले डंगोलसहित तीन जनाको नाम सिफारिस गर्ने तयारी गरेको बताइएको छ ।
त्यस्तै, राष्ट्रिय प्रजातन्त्र पार्टी (राप्रपा)ले इञ्जिनियर ध्रुव महर्जनलाई उमेदवार बनाउने घोषणा गरिसकेको छ । पहिलोपटक स्थानीय निर्वाचनमा भाग लिन लागेको राष्ट्रिय स्वतन्त्र पार्टी (रास्वपा)ले उम्मेदवार चयन गर्न सकेको छैन । प्रतिनिधिसभाबाट उदाएको रास्वपा पनि यसपटक स्थानीय तहको निर्वाचनमा भिड्ने भएको छ । २०७९ असार ७ गते स्थापना भएको रास्वपा यसपटक स्थानीय तहको निर्वाचनमा भिड्न लागेको हो ।
स्थापना भएको छ महिनापछि भएको संघीय निर्वाचनमा रास्वपाले प्रत्यक्षमा सात र समानुपातिकतर्फ १३ गरेर कूल २० सिट जितेको थियो । त्यसपश्चात् २०८० वैशाखमा तनहुँमा भएको उपनिर्वाचनबाट एक सिट बढाउँदै रास्वपा २१ सिटको दल भएको हो । तर, २०८१ वैशाखमा भएको इलाम उपनिर्वाचनमा भने रास्वपा पराजित हुन पुगेको थियो ।मंसिर १६ गते कीर्तिपुरसहित एक नगरपालिका उपप्रमुख, दुई गाउँपालिका अध्यक्ष, चार उपाध्यक्ष र वडाध्यक्ष पदमा चुनाव हुने तय भएको छ ।
कीर्तिपुरमा कसले कति मत पाएका थिए ?
२०७९ को स्थानीय तह निर्वाचनमा नगरप्रमुखमा निर्वाचित राजकुमार नकर्मीले नौ हजार ४३ मत प्राप्त गरेका थिए । उनका निकटतम प्रतिस्पर्धी एमालेका केशवरत्न बज्राचार्यले पाँच हजार ५०७ मत ल्याएका थिए । माओवादी केन्द्रका शिवशरण महर्जनले चार हजार ९०, एकीकृत समाजवादीका बटुकृष्ण थापाले एक हजार १५३ मत ल्याएका थिए ।
राप्रपाका जितबहादुर विष्टले ५७२, नेमकिपाका श्रीकृष्ण महर्जनले ५३२, स्वतन्त्र उमेदवार मनोज बुढाथोकीले ३६५, नेपाली कांग्रेस (बिपी)का प्रविद् खनालले ८१ मत प्राप्त गरेका थिए । त्यस्तै, आमूल परिवर्तन मसिहा पार्टीका उमेदवार श्यामकाजी महर्जनले २१, स्वतन्त्र भीमकुमार महर्जनले १३ मत ल्याएका थिए ।
ग्रामथानमा माओवादीबाट नमोनारायण
माओवादी केन्द्रले मोरङको ग्रामथान गाउँपालिकाको अध्यक्षमा नमोनारायण माझीलाई उम्मेदवार बनाउने घोषणा गरेको छ । माझी केही समय अगाडि नेपाली कांग्रेस छाडेर माओवादी केन्द्रमा प्रवेश गरेका थिए । उनी ०७४ सालमा फोरम लोकतान्त्रिकबाट ग्रामथान गाउँपालिकाको १ नम्बर वडाको वडाध्यक्षमा निर्वाचित भएका थिए । यस्तै २०७९ सालको निर्वाचनमा स्वतन्त्ररूपमा सोही वडाको अध्यक्षमा उम्मेदवार बनेका उनी तेस्रो बनेका थिए । यहाँ कांग्रेस, एमालेलगायत दलले भने उम्मेदवारबारे निर्णय गरिसकेका छैनन् ।
एमालेले टुंग्यायो दुई उपाध्यक्षको उम्मेदवार
नेकपा एमालेले जाजरकोटको नलगाड नगरपालिकाको उपप्रमुखका लागि सुनिता बोहोरालाई उम्मेदवार बनाउने निर्णय गरेको छ । जाजरकोट केन्द्रबिन्दु भई आएको भूकम्पमा परी नलगाड नगरपालिकी उपप्रमुख सरिता सिंहको मृत्यु भएको थियो । दोलखाको गौरीशंकर गाउँपालिकाको उपाध्यक्षमा एमालेले उमा शेर्पालाई उम्मेदवार बनाउने भएको छ । त्यहाँ गत निर्वाचनमा कांग्रेस–माओवादी गठबन्धनबाट श्याम तामाङले जितेका थिए । तामाङको हृदयाघातका कारण निधन भएपछि अहिले उपनिर्वाचन हुन लागेको हो ।
एक्लाएक्लै भिड्दै दलहरु
कांग्रेसले नेकपा एमालेसँग सत्ता साझेदारी गरेपछि माओवादी केन्द्र उपनिर्वाचनमा एक्लै लड्ने तयारीमा देखिन्छ । एमाले र कांग्रेसबीच पनि कीर्तिपुरमा कुनै तालमेल नहुने कांग्रेस नगरसभापति डंगोलले बताए । ‘यहाँ कुनै तालमेल वा गठबन्धन हुँदैन,’ उनले भने । ४४ मध्ये २३ सिट नेपाली कांग्रेसले जित हासिल गरेको ठाउँ भएकोले तालमेल नगर्ने संकेत कांग्रेस केन्द्रले गरेको छ । सत्ताको नेतृत्व गरिरहेको एमालेले भने यसबारे कुनै निर्णय गरेको छैन ।
शुक्रबार उम्मेदवार मनोनयन
आयोगले उपनिर्वाचनका लागि निर्वाचन कार्यक्रम सार्वजनिक गरिसकेको छ । जसअनुसार मंसिर २ गते बिहान १० बजेदेखि बेलुका ५ बजेसम्म निर्वाचन अधिकृतको कार्यालयमा उम्मेदवारको मनोनयन दर्ता हुने छ । साथै सोही दिन बेलुका ५ बजेदेखि ६ बजेसम्ममा उम्मेदवारको सूची प्रकाशन हुने आयोगले विज्ञप्तिमार्फत जानकारी दिएको छ ।
उम्मेदवारको विरोधमा उजुरी दिने अवधि मंसिर ३ गते बिहान १० बजेदेखि दिउँसो ३ बजेसम्म हुने छ । सोही दिनको दिउँसो ३ बजे उपरान्त मंसिर ४ गते बेलुका ५ बजेसम्ममा मनोनयनपत्र र उजुरीउपर जाँचबुझ एवं निर्णय गरी मंसिर ४ गते बेलुका ५ बजेदेखि ६ बजेसम्ममा उम्मेदवारको नामावली प्रकाशन हुनेछ ।
२०८१ मंसिर ५ गते बिहान ९ बजेदेखि दिउँसो १ बजेसम्म उम्मेदवारको नाम फिर्ता लिन सकिने छ । आयोगले सोही दिन दिउँसो १ बजेदेखि ३ बजेसम्ममा निर्वाचन अधिकृतको कार्यालयमा उम्मेदवारको अन्तिम नामावली प्रकाशन गर्ने र दिउँसो ३ बजेदेखि ५ बजे सम्ममा उम्मेदवारलाई निर्वाचन चिह्न प्रदान गर्ने जनाएको छ ।
निर्वाचन कार्यक्रमअनुसार मंसिर १६ गते बिहान ७ बजेदेखि बेलुका ५ बजेसम्म सम्बन्धित मतदान केन्द्रमा मतदान हुने र मतदान सुरु हुनुभन्दा ४८ घण्टा अगाडि अर्थात् मंसिर १३ गते राति १२ः०० बजे पछि मौन अवधि सुरु हुने आयोगले विज्ञप्तिमार्फत जानकारी दिएको छ । आयोगले ४१ पदका लागि उपनिर्वाचन गर्न लागेको हो ।
