- सुरूमा डा. शेखर कोइरालाले एमालेसँगको गठबन्धनमाथि प्रश्न उठाएमा बाढीपहिरोको वितण्डापछि कांग्रेस सभापति शेरबहादुर देउवा आफैंले ओलीको कार्यशैलीमाथि असन्तुष्टि जनाउन थालेका छन्
- बाढीपहिरोबारे एमाले मन्त्रीहरुले मुख खोलेका छैनन्
- प्रधानमन्त्री ओलीले भने काठमाडौं उत्रनसाथ बाढीपहिरोको क्षतिबारे आफ्नो धारणामात्र राखेनन् मन्त्रिपरिषद्को बैठक राख्नेदेखि विशेष पत्रकार सम्मेलनसम्म गर्न भ्याइसकेका छन्
काठमाडौं– बाढीपहिरोको विपत्तिलगत्तै सत्तारुढ दलहरु नेपाली कांग्रेस र नेकपा एमालेबीच खटपट सुरू भएको छ । बाढीपहिरोले काठमाडौं उपत्यकामै ठूलो क्षति पुर्याउँदा पनि सरकार मूकदर्शक भएर बसेको भन्दै चौतर्फी आलोचना भएपछि दुई प्रमुख पार्टीबीचको असन्तुष्टि सतहमा देखिन थालेको हो । यसले झण्डै दुईतिहाइ बहुमत भएको सरकारलाई समेत संकटतर्फ धकेल्ने संकेत गरेको छ ।
कांग्रेसले मंगलबार संसदीय दलको बैठक राखी सरकारको चर्को आलोचना गरेको छ । जबकि देशको प्रमुख पार्टीले बाढीपहिरो आएकै दिन बैठक डाकेर सरकारलाई निर्देशन दिन सक्थ्यो । प्रधानमन्त्री केपी शर्मा ओली संयुक्त राष्ट्रसंघको कार्यक्रममा सहभागी हुन अमेरिका जाँदा कांग्रेसबाट नेतृत्व गरेर गएका प्रकाशमान सिंह (उपप्रधान तथा सहरी विकासमन्त्री)लाई कार्यवाहकको जिम्मेवारी दिएर गएका थिए । कार्यवाहक प्रधानमन्त्री सिंहमात्र हैन गृहमन्त्रीसमेत कांग्रेसकै रमेश लेखक छन् ।
यस्तो अवस्थामा पनि आफूले केही गर्न नसकेको लाज लुकाउन कांग्रेसले एमाले अध्यक्ष ओलीमाथि दोष थुपार्दै बाढीपहिरोले अवरुद्ध सडक जसरी पनि बनाएर दसैंमा घर जाने व्यवस्था मिलाउनसमेत सरकारलाई आग्रह गरेको छ । कांग्रेस सभापति एवं पार्टीका संसदीय दलका नेता शेरबहादुर देउवा नेतृत्वमा बसेको बैठकले वैकल्पिक मार्ग बनाएर भए पनि जनतालाई दसैंमा घर जाने व्यवस्था मिलाउन आफ्नै सरकारसँग जोडदार माग गरेको हो ।
बैठकपछि सरकारको कमजोरीबारे सोध्दा सञ्चारकर्मीसँग कड्किँदै देउवाले सबै कुरा गृहमन्त्रीलाई सोध्न भनेका थिए । गृहमन्त्री लेखक निकै कमजोर देखिएको भन्दै कांग्रेस महामन्त्री गगन थापाले मंगलबार दिउँसो राज्य व्यवस्था तथा सुशासन समितिमा प्रश्न उठाए । बैठकमाथि बैठकमात्र भएको तर गृह मन्त्रालयबाट गल्ती भएको दाबी गर्दै थापाले दोष थोपर्नेभन्दा पनि दोषको भागीदार बन्नुपर्ने बताए । ‘बैठकमात्र भए । डुप्लिकेसन भए । यो छानबिनको विषय पनि होस्,’ थापाले भने, ‘रात्रिबस सञ्चालन नगर्ने भनेर निर्णय भएको देखिन्छ । फेरि सञ्चालन भएको देखिन्छ । यसको कसै न कसैले जिम्मा लिनैपर्छ ।’
काठमाडौं उपत्यकामै बाढीमा परी उद्धारको पर्खाइमा घण्टौंदेखि पर्खाइमा बसेका नागरिकलाई सेनाले हेलिकप्टर नदिँदा सरकारले बचाउन नसकेको गृहमन्त्री लेखकले बताएका थिए । यस विषयमा गम्भीर अनुसन्धान हुनुपर्ने माग थापाले गरे । ‘नख्खुको विषयमा पनि यसको सत्यतथ्य पनि छानबिन गर्नुपर्छ । राजनीतिक कमजोरी हो भने स्वीकार गर्ने । सिडिओ वा प्रहरी प्रमुखले नगरेको भए भन्नुपर्यो । कसै न कसैले यसको जिम्मा लिनैपर्छ । दोषी पत्ता लगाउनैपर्छ ।’
कांग्रेसका अर्का सांसद दिलेन्द्र बडूले मौसम विभागले पूर्वसूचना दिए पनि सरकार चुकेको आरोप लगाए । उनीमात्र हैन कांग्रेसकै सांसद सरिता प्रसाईं पनि बैठकमा खरोरूपमा उत्रिइन् । उनले प्रधानमन्त्री ओली र गृहमन्त्री लेखकले विपत्तिको बेलामा मर्यादाहीन अभिव्यक्ति दिएको उनको आरोप थियो । ‘विपद् व्यवस्थापनमा सरकार चुकेकै हो । मौसम विभागले पूर्वानुमान गर्दा पनि सरकारले व्यवस्थापन गर्न सकेन । अहिले राजमार्गमा हजारौं मान्छे अड्किएका छन् । तिनीहरूको तत्काल उद्धार गरियोस्,’ उनले भनिन् ।
ओलीको कार्यशैलीप्रति देउवा असन्तुष्ट
कांग्रेस–एमालेबीच अबको दुई वर्षसम्म केपी शर्मा ओली प्रधानमन्त्री बन्ने र चुनावी सरकारको नेतृत्व शेरबहादुर देउवाले लिने सहमति छ । तर, बाढीपहिरोपूर्व नै कांग्रेस संस्थापनइतरमा यो गठबन्धनलाई लिएर आलोचना सुरू भएको थियो । कांग्रेस महामन्त्री गगन थापाले देउवालाई साथ दिने बताइरहँदा संस्थापनइतरका नेता डा. शेखर कोइरालाले एमालेसँगको सहकार्यमाथि प्रश्न उठाउँदै आएका छन् ।
बाढीपहिरोको वितण्डापछि भने देउवा आफैंले ओलीको कार्यशैलीमाथि असन्तुष्टि जनाउन थालेका छन् । बाढीपहिरोको वितण्डामा प्रधानमन्त्री ओलीले कार्यवाहक प्रधानमन्त्री रहेका सिंहको नेतृत्वमा मन्त्रिपरिषद्को बैठक राख्न नदिएको निष्कर्ष कांग्रेसले निकालेको छ । यद्यपि कांग्रेसले यसको औपचारिक धारणा बनाएको छैन ।
कांग्रेस सभापति देउवाले विभिन्न सञ्चारमाध्यममा आफ्नो दूत खटाएर ओलीको कार्यशैलीमाथि विरोध गर्न आग्रह छन् । विपद्को बेला नख्खुमै हेलिकप्टर पठाउनसमेत ओलीको निर्देशन पर्खनुपरेको सरकारमा रहेका कांग्रेस मन्त्रीहरुको दाबी छ । बाढीपहिरोबारे एमाले मन्त्रीहरुले मुख खोलेका छैनन् । प्रधानमन्त्री ओलीले भने काठमाडौं उत्रनसाथ मन्त्रिपरिषद्को बैठक राख्नेदेखि विशेष पत्रकार सम्मेलनसम्म गर्न भ्याइसकेका छन् ।
कार्यवाहकको नेतृत्व सम्हालेका उपप्रधान तथा सहरी विकासमन्त्री सिंहले गत शनिबार मन्त्रिपरिषद्को आकस्मिक बैठक बोलाउन खोज्दा मुख्यसचिव एकनारायण अर्यालदेखि एमाले मन्त्रीहरुले आलटाल गरेको कांग्रेसभित्र सर्कुलर गरिएको छ । ‘प्रकाशमान दाइले बैठक बसौं बसौं भनिरहनुभएको थियो । उहाँ छटपटिनुभएको थियो । तर के–के मिलेको छैन भन्नुभयो । त्यसपछि बैठक बस्नै सकेन,’ कांग्रेसका एक मन्त्रीले भने । सिंहले बैठक डाक्ने भएपछि मुख्यसचिव अर्याल छल्न स्याङ्जा पुगेको कांग्रेसको निष्कर्ष छ ।
पछिल्लोपटक सहकारी ठगी प्रकरणमा मुछिएका राष्ट्रिय स्वतन्त्र पार्टीका सभापति रवि लामिछाने पक्राउ, उपसभामुख इन्दिरा रानामगरलाई हटाउनेलगायत विषयलाई लिएर कांग्रेस–एमालेबीच विवाद चर्किएको छ । रास्वपाका १४ नेता चीन जाँदा माओवादीसँग मिल्न लागेको भन्दै लामिछाने पक्राउ गर्न खोजिएपछि सबै नेतालाई तत्काल फिर्ता बोलाएको थियो । लगत्तै लामिछाने पक्राउ पर्ने सम्भावना टर्दै गएको बताइन्छ । लामिछानेलाई ओलीले काँध थापेसँगै उनी पक्राउ पर्ने सम्भावना टर्दै गएको कांग्रेस नेताहरुको दाबी छ ।
यस विषयमा कांग्रेससँग ओली असन्तुष्ट रहेको बताइएको छ । यसैगरी नेपाल बार एसोसिएसनका अध्यक्ष गोपालकृष्ण घिमिरेविरुद्ध सर्वोच्च अदालतमा परेको अवहेलनाको मुद्दाले पनि दुई पार्टीबीचको दूरी बढाएको छ । अध्यक्ष घिमिरे देउवानिकट अधिवक्ता हुन् ।
