- अध्यक्ष दाहाल र उपमहासचिव शर्माबीचको टकरावले एकता प्रक्रिया समस्यामा
- एकीकृत समाजवादी, नेसपा र नेकपासँगको एकता प्रक्रिया धकेलियो
काठमाडौं– प्रमुख प्रतिपक्षी दल नेकपा माओवादी केन्द्रमा पार्टी अध्यक्ष पुष्पकमल दाहाल र उपमहासचिव जनार्दन शर्माबीच चुलिएको विवाद साम्य हुन अझै बाँकी छ । दुई नेताबीच सार्वजनिक कार्यक्रमहरूमा नै एक अर्काप्रति घोचपेच चलिरहेको छ । यसको असर पार्टी एकता प्रक्रियामा परेको देखिन्छ ।
पार्टी अध्यक्ष दाहालले एकता प्रक्रियामा माधवकुमार नेपाल नेतृत्वको नेकपा एकीकृत समाजवादी, महेन्द्र राय यादव अध्यक्ष रहेको नेपाल समाजवादी पार्टी (नेसपा) र नेत्रविक्रम चन्द नेतृत्वको नेपाल कम्युनिस्ट पार्टी (नेकपा)लाई ल्याउन जोड गरिरहेका छन् । तर, पार्टीकै आन्तरिक किचलो व्यवस्थापन गर्न हम्मेहम्मेको स्थिति छ ।
जसकारण, दसैंअघि नै एकता गर्ने प्रक्रियामा व्यावधान आउने देखिएको माओवादी नेता दिननाथ शर्माले बताए । ‘पार्टीभित्र अध्यक्ष कमरेडमाथि प्रश्न उठेको छ । उहाँले पार्टी स्थायी कमिटी र सार्वजनिक मञ्चहरूमार्फत पनि जवाफ दिँदै हुनुहुन्छ । जसले एकता प्रक्रियामा आउन चाहेको शक्तिलाई केही असहजता पैदा भएको छ,’ शर्माले भने ।
एकता प्रक्रियामा अघि बढिरहेको भनिएका चारवटै दल समाजवादी मोर्चामा छन् । मोर्चामा रहेकामध्ये महिन्द्रराय यादवको दल माओवादी केन्द्रसँग एकताको अन्तिम प्रयासमा छ । माओवादीले अन्य दुई दलका नेताहरूसँग पनि पार्टीको सैद्धान्तिक र वैचारिक आधारबारे विमर्श गराइरहेको नेता शर्माले बताए । उनका अनुसार यहीबीचमा शीर्ष नेताहरूबीच तीनचार चरण छलफल भए पनि निर्णयको चरणमा भने पुग्न बाँकी छ ।
माओवादी अध्यक्ष दाहाल र एसका अध्यक्ष नेपालबीच कम्तीमा दुई– तीनपटक छलफल भइसकेको छ । भेटमा दुवै नेताले पार्टी एकता गरेर मोर्चालाई दह्रो बनाउनुपर्ने निष्कर्ष निकालेका छन् । तर, एकीकृत समाजवादीलाई पनि एकतामा ल्याउन समय लाग्ने नेताहरू बताउँछन् । एकीकृत समाजवादीकी पोलिटब्युरो सदस्य दिलु पन्तले त्यसै एकता गर्ने पक्षमा एकीकृत समाजवादी नरहेको बताइन् ।
‘एकता विचारको आधारमा हुनुपर्छ । कार्यदिशााको आधारमा हुनुपर्छ । भावनात्मक रुपमा हुनुपर्छ, पार्टी एकता,’ उनले भनिन्, ‘तर, विगतमा नेकपा कसरी फुट्यो ? त्यसरीचाहिँ पार्टी एकता गर्नु हुँदैन ।’उसो त माओवादीभित्र देखापरेको विवाद साम्य भएकोले अब नयाँ ढंगबाट अघि बढ्ने नेताहरू बताउँछन् ।
‘पार्टीभित्रको विवाद करिब–करिब म्यानेज त भयो तर नेताहरूबाट अलिअलि प्रकट भइरहेका छन्,’ उनले भने, ‘पदाधिकारी र स्थायी समिति बैठकको अन्तिम अन्तिममा आउँदा प्रभाकरजीले नै मैले यो पार्टी बलियो होस् भनेर गरेको हो । मेरो उद्देश्य अध्यक्ष नै बलियो बनाउने हो भनिसकेपछि अब हामीले त्यसलाई अरू ढंगले बुझ्नु हुँदैन ।’
माओवादीले प्रतिपक्षीय भूमिकामा पुगेदेखि नै पार्टी एकता प्रक्रियालाई जोडतोडले उठाउँदै आएको छ । यद्यपि, एकता हुने छाँट छैन । माओवादीले उपेन्द्र यादव अध्यक्ष रहेको जनता समाजवादी पार्टीसँग पनि एकता प्रक्रियाका लागि आह्वान गरेको थियो । तर, एकता सहज देखिएको छैन ।
