काठमाडाैं - निर्मला कुर्मी हालै लुम्बिनीमा मन्त्री भएका बादशाहका छिमेकी थिइन् । उनी हालसम्म बेपत्ता छिन् । निर्मलाका पति महालु कुर्मी बितेको २०६२ सालमै हो । यसपछि निर्मला दुई छोरासहित परस्पुरमै बसिन् । चार वर्षपछि २०६६ सालमा रहस्यमय ढंगले १० दिनको अन्तरमा उनका १४ र १८ वर्षका दुई छोराको मृत्यु भयो । पहिले कुनै समस्या नभएका उनीहरू एकाएक बिरामी परेर बिते । निर्मला एकल महिला भइन् । यसपछि बादशाह भने उनको सम्पत्ति हडप्न षड्यन्त्र लागे । जुन कुरा छरछिमेकीले समेत आशंका गरेका थिए ।
निर्मलाका पति र छोराहरूको नाममा साढे चार बिघा जग्गा थियो । सोही जग्गा हडप्ने प्रयासमा रहेका बादशाह भने पहिलो संविधानसभामा सदस्य थिए । उनै बादशाहले २०६६ सालमै पुत्रवियोगमा रहेकी निर्मलाको जग्गाको लालपुर्जा जबर्जस्ती खोसेर आफूसँग राखे । निर्मलाको जग्गा खेतजोत गर्ने रामरखेन धोबीसँग उनले लालपुर्जा खोसेका थिए ।
त्यस क्रममा उनले निर्मलालाई २० माघ २०६६ मा सार्वजनिक रूपमा लछारपछार पनि गरे । सोही घटनाले निर्मलाको सम्पत्ति नामसारी गराउन र उनलाई बेपत्ता पार्न पूर्वसांसद कुर्मीको योजनाबद्ध षड्यन्त्र रहेको आरोप लाग्यो । यसपछि रुबी खानलगायत अधिकारकर्मीले सो घटनाको विरोध गर्दै प्रदर्शन गर्न थाले । खान पनि परस्पुरकै हुन् ।
छरछिमेकी स्थानीय महिलाले निर्मलाको पक्षमा आन्दोलन चर्काउन थालेपछि स्थानीय प्रशासनले काठमाडौंमा रहेका तत्कालीन संविधानसभा सदस्य कुर्मीलाई बाँकेमा बोलायो र लालपुर्जा फिर्ता गर्न लगायो । निर्मला कुर्मी जीवित छँदै बादशाहले कुटपिट गरेको र सम्पत्ति हडप्न खोजेको उजुरीसमेत विभिन्न निकायमा दिएकी थिइन् ।
निमलालाई लछारपछार गरेकोे तीन वर्षपछि २०६९ सालमा उनका जग्गा नामसारी भएको देखिएको छ । निर्मलाका जग्गा अहिले बदिर्या धधवार बस्ने पार्वती विष्टको नाममा पगुको छ । स्थानीय निजामुद्दिन इद्रिसीसँग ३ लाख लेनदेन मुद्दा अदालतमा घरजग्गा लिलामी भइ २०७१ सालमा इद्रिसीकी पत्नी जविदाका नाममा पुगेको छ । अहिल सो जग्गा स्थानीय सन्तोष बर्माको कम्पनीमा काम गर्नपर्नेमा पूजा लामाको नाममा रहेको छ ।
