काठमाडाैं - नेपाली चलचित्रका महानायक राजेश हमाल चलचित्र ‘नरसिंहाः अवतार’बाट कमब्याक गर्दैछन् । निर्देशक दिवाकर भट्टराईको निर्देशनमा एक्सन तथा सोसल ड्रामामा बन्ने चलचित्र ‘नरसिंहाः अवतार’मा आठ वर्षपछि महानायक राजेश हमाल कमब्याक गर्ने भएका हुन् ।
निर्माणपक्षले फिल्मका लागि हमालसहित तीन जना मुख्य पात्रहरु रहेकाे बताएका छन् । यो फिल्मको शीर्षमध्ये एक भूमिकामा सनिशा भट्टराईले गर्ने भएकी छन् ।
आफूले निर्वाह गर्ने भूमिका र यो फिल्मलाई लिएर आफू उत्साहित रहेको सनिशाले बताइन् ।सनिशाको यो दोस्रो फिल्म हो । उनको डेब्यू अभिनय रहेको फिल्म १२ गाउँ फूलपातीमा रिलिज हुँदैछ ।
यस फिल्ममा निती शाह पनि अनुबन्धित भइसकेकी छन् । यो फिल्म महानायक राजेश हमाल र दर्शक दुवैका लागि विशेष प्रतिक्षित चलचित्र बन्ने निश्चित भएकाे निर्माणपक्षले जनाएकाे छ ।
क्रिएटिभ सिने आर्टको प्रस्तुति रहने फिल्म यही भदौबाट छायाङ्कनमा जाने तयारीमा रहेको छ । फिल्मको लगानी तीन करोडभन्दा माथि हुने निर्माणपक्ष बताइएको छ । निर्देशक भट्टराईको अर्को फिल्म ‘मायावी’ प्रदर्शनको तयारीमा छ ।
