- भक्तपुरको नलिनचोकबाट रसुवाको स्याफ्रुबेसीका लागि उडेको एयर डाइनेस्टीको हेलिकप्टर नुवाकोटमा दुर्घटना
- पाइलट अरुण मल्लसहित चारजना चिनियाँ नागरिकको मृत्यु
- मृतकहरुको शव पोस्टमार्टमका लागि त्रिवि शिक्षण अस्पतालमा ल्याइयो
- दुर्घटनाको छानबिन गर्न तीन सदस्यीय जाँजबुझ आयोग गठन
काठमाडौं– एयर डाइनेस्टीको हेलिकप्टर बुधबार नुवाकोटमा दुर्घटना हुँदा पाँचजनाको मृत्यु भएको छ । भक्तपुरको नलिनचोकबाट चारजना चिनियाँ पर्यटक लिएर रसुवाको स्याफ्रुबेसीका लागि उडेको उक्त हेलिकप्टर नुवाकोटको शिवपुरी गाउँपालिकास्थित सूर्यचौर जंगलमा दुर्घटना भएको हो ।
दुर्घटनामा पाइलट अरुण मल्लसहित चिनियाँ नागरिकहरू जुताड ताङ, ताइ ली, यीयाम वु र जेमिङ जीको मृत्यु भएको प्रहरीले जनाएको छ । मृतक पाँचै जनाको शव संकलन गरेर त्रिवि शिक्षण अस्पताल महाराजगञ्जमा ल्याइएको छ । ती शव पोस्टमार्टमपछि परिवारलाई हस्तान्तरण गरिने नेपाल नागरिक उड्डयन प्राधिकरणले जानकारी दिएको छ ।
प्राधिकरणका प्रवक्ता ज्ञानेन्द्र भुलले दिएको जानकारीअनुसार बुधबार दिउँसो १ः५४ मिनेटमा भक्तपुरबाट उक्त हेलिकप्टर उडेको थियो । उडेको तीन मिनेटमै उक्त हेलिकप्टर सम्पर्कविहीन भएको थियो । प्रत्यक्षदर्शीका अनुसार हेलिकप्टर रुखमा ठोक्किएर आगो लाग्दै झरेको थियो । दुर्घटनाको कारण खुलिसकेको छैन । नुवाकोटका प्रहरी उपरीक्षक (एसपी) शान्तिराज कोइरालाका अनुसार खराब मौसमका कारण दुर्घटना भएको हुनसक्छ ।
दुर्घटनास्थलमा पर्यटनमन्त्री बद्री पाण्डे पुगेका थिए । नेपाली सेनाको हेलिकप्टर उद्धारका लागि परिचालन गरिएको थियो । तर, उद्धार भने हेलिकप्टर सम्पर्कविहीन भएको ४५ मिनेटपछि मात्रै भएको थियो । घटनालाई लिएर प्रधानमन्त्री केपी शर्मा ओलीले दुःख व्यक्त गरेका छन् । उनले १४ दिनपछि अर्कोे हवाइ दुर्घटना हुनु दुःखद् भएको बताएको उनको सचिवालयले जनाएको छ । उक्त दुर्घटनाका सम्बन्धमा मन्त्रिपरिषद्को आकस्मिक बैठक बसी बुधबार नै जाँचबुझ आयोग गठन गरेको छ ।
सरकारका प्रवक्ता एवं सञ्चारमन्त्री पृथ्वी सुब्बा गुरुङका अनुसार सरकारले उक्त दुर्घटनाको जाँच गर्न नेपाली सेनाका वरिष्ठ पाइलट सुवास थापा संयोजक रहेको तीन सदस्यीय जाँचबुझ आयोग गठन गरी जिम्मेवारी दिएको छ । छानबिन गरी सत्यतथ्य बुझाउन आयोगलाई ३० दिनको समय दिइएको उनले बताए । दुई साताअघि मात्रै काठमाडौंस्थित त्रिभुवन विमानस्थलमा सौर्य एयरलाइन्सको विमान उडेको केही सेकेन्डभित्रै दुर्घटनामा पर्दा एक बालकसहित १८ जनाको मृत्यु भएको थियो । दुई साताभित्रै दोस्रो हवाई दुर्घटना हुनुले हवाई सुरक्षामा गम्भीर प्रश्न उब्जाएको छ ।
नेपाल नागरिक उड्डयन प्राधिकरणको तथ्यांकअनुसार पछिल्लो १० वर्षमा नेपालमा बर्सेनि हेलिकप्टर दुर्घटना हुँदै आएको छ । एयर डाइनेस्टीको यो दुर्घटना नेपालमा हालसम्म भएका ४१औं हेलिकप्टर दुर्घटना हो । यसमा एयर डाइनेस्टीसँगै विभिन्न कम्पनीका हेलिकप्टर पर्छन् ।
गत वर्षको मे महिनामा संखुवासभाको सिप्रुङमा सिम्रिक एयरको हेलिकप्टर दुर्घटनामा परेको थियो । त्यसबेला एक यात्रुको उद्धारको क्रममा मृत्यु भएको थियो । सोही वर्षको जुलाईमा सोलुखुम्बुमा मनाङ एयरको हेलिकप्टर दुर्घटनामा पर्दा मेक्सिकोबाट सगरमाथा हेर्न आएका एकै परिवारका पाँचजनासहित छ जनाको मृत्यु भएको थियो । २०७५ सालमा ताप्लेजुङमा एयर डाइनेस्टीकै हेलिकप्टर दुर्घटनाग्रस्त हुँदा तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित सातजनाको मृत्यु भएको थियो ।
