- एआइजी श्यामलाल ज्ञवाली हटाएर सिआइबी प्रमुखको जिम्मेवारी दीपक थापालाई
- सुनकाण्डको अनुसन्धानमा विवादित एआइजी किरण बज्राचार्यलाई काठमाडौं उपत्यका प्रहरी कार्यालयको जिम्मेवारी
काठमाडौं– सरकारले नेपाल प्रहरीको प्रहरी अतिरिक्त महानिरीक्षक (एआइजी) श्यामलाल ज्ञवालीलाई केन्द्रीय अनुसन्धान ब्युरो (सिआइबी)बाट हटाएको छ । ज्ञवालीले गत फागुनको अन्तिम साता सिआइबी निर्देशकको रुपमा जिम्मेवारी सम्हालेका थिए ।
पाँच महिना पनि पूरा नहुँदै ज्ञवालीलाई मंगलबार प्रधानमन्त्री केपी शर्मा ओलीको अध्यक्षतामा बसेको मन्त्रिपरिषद् बैठकले सिआइबी निर्देशकबाट हटाएको हो । उनलाई प्रहरी प्रधान कार्यालय, प्रदेश समन्वय विभागमा पठाइएको छ ।
ज्ञवाली ती उच्च प्रहरी अधिकृत हुन्, जसले नक्कली भुटानी शरणार्थी प्रकरणको अनुसन्धानमा हालै प्रहरी प्रशिक्षण केन्द्रमा सरुवा गरिएका प्रहरी नायव महानिरीक्षक (डिआइजी) डा. मनोजकुमार केसीलाई साथ लिएर काम गरेका थिए । शरणार्थी काण्डमा सत्तारुढ नेपाली कांग्रेस र नेकपा एमालेका ठूला नेताहरूलाई नै संलग्नताको आरोप लाग्दै आएको छ ।
अघिल्लो महिना यही प्रकरणमा बेचन झा पक्राउ परे । प्रहरी महानिरीक्षक वसन्तबहादुर कुँवर देशबाहिर रहेका बेला ज्ञवाली र केसी मिलेर नै झालाई पक्राउ गरेको चर्चा थियो । एमाले उपाध्यक्षसमेत रहेका पूर्वगृहमन्त्री रामबहादुर थापाका छोरा प्रतीकलाई पनि दुवै प्रहरी उच्च प्रहरी अधिकृतकै योजना मुताविक पक्राउ परेको बताइन्छ । यहीबीच दुवै जना सरुवा भएका छन् ।
सिआइबीबाट प्रहरी प्रधान कार्यालय सरुवा गरिएका ज्ञवालीमाथि प्रहरी प्रधान कार्यालयले नै छानबिन गरिरहेको छ । पदीय आचरणविपरीत गतिविधि गरेको आरोपमा एआइजी ज्ञवालीमाथि छानबिन गर्न एआइजी टेकप्रसाद राई नेतृत्वको समितिले छानबिन गरिरहेको छ । प्रहरीका केन्द्रीय प्रवक्ता डिआइजी दानबहादुर कार्कीका अनुसार छानबिन सकिएको छैन । यदि पदीय आचरणविपरीत गतिविधि गरेको पाइए विभागीय कारबाही हुने उनले बताए ।
उनै एआइजी ज्ञवालीको ठाउँमा अर्का एआइजी दीपक थापाले जिम्मेवारी पाएका छन् । उनी काठमाडौं उपत्यका प्रहरी कार्यालय रानीपोखरीको प्रमुख थिए । यस्तै, प्रहरी प्रधान कार्यालय कार्यविभागमा रहेकी एआइजी किरण बज्राचार्यलाई काठमाडौं उपत्यका प्रहरी कार्यालयको प्रमुखमा सरुवा गरिएको छ । बज्राचार्य ती एआइजी हुन्, जो सुनकाण्डको अनुसन्धानमा लापारबाही गरेको भन्दै सिआइबी निर्देशकबाट यसअघि हटाइएकी थिइन् ।
उनलाई हटाउने तत्कालीन गृहमन्त्री रवि लामिछाने थिए । सुनकाण्डको जाँचबुझ गर्न गठित आयोगले बज्राचार्यको बदमासी अनुसन्धानमा देखिएको किटान गरेको थियो । यसरी बहुचर्चित सुनकाण्डको अनुसन्धानमा पेसागत इमानदारिता प्रदर्शन गर्न नसकेकी बज्राचार्यलाई अन्ततः काठमाडौं उपत्यका प्रहरी कार्यालयको नेतृत्व गर्ने जिम्मेवारी पाइन् ।
हालै एआइजीमा बढुवा भएका रामदत्त जोशीलाई कार्यविभागमा पदस्थापन गरिएको छ ।
सरकारका प्रवक्तासमेत रहेका सञ्चार तथा सूचना प्रविधिमन्त्री पृथ्वी सुब्बा गुरुङले पत्रकारहरूसँग भने, ‘नेपाल प्रहरीका प्रहरी नायब महानिरीक्षक रामदत्त जोशीलाई नेपाल प्रहरीको जनपथ प्रहरीतर्फको प्रहरी अतिरिक्त महानिरीक्षक पदमा बढुवा गर्ने निर्णय गरिएको छ । र, उहाँको पदस्थापना कार्यविभागमा गरिएको छ ।’हालै एआइजी उमेशराज जोशी सेवा निवृत्त भएपछि रिक्त पदमा डिआइजी जोशीको बढुवा भएको हो ।
-1752335779.jpg)
