- मन्त्रीको नाम टुंग्याउन आन्तरिक भागबण्डा मिलाउँदै कांग्रेस
- देउवापक्षबाट दुई तथा कोइराला र सिटौला पक्षबाट एक–एक जना मन्त्री हुने
काठमाडौं– नेकपा माओवादी केन्द्रले समर्थन फिर्ता लिएर सरकारबाट बाहिरिएसँगै कोशी प्रदेशमा नेपाली कांग्रेस मन्त्रीको नाम टुंगो लगाउन सक्रिय भएको छ । त्यसका लागि कांग्रेसले मापदण्ड बनाएको छ । मापदण्ड बनाएपछि कांग्रेसबाट मन्त्री हुनेको नाम र संख्याको बाँडफाडमा नेताहरू सहमतिनजिक पुगेका छन् ।
मापदण्डअनुसार सहमति भए प्रदेशमा सभापति शेरबहादुर देउवापक्षबाट दुई जना, नेता डा. शेखर कोइराला र कृष्णप्रसाद सिटौला पक्षबाट एक–एक जना मन्त्री हुने छन् । पार्टीमा भागबण्डा नमिल्दा नेकपा एमालेका हिक्मत कार्की नेतृत्वको सरकारमा कांग्रेसले मन्त्री पठाउन सकेको छैन । पार्टी संसदीय दलका प्रमुख सचेतक गोपाल तामाङका अनुसार एक÷दुई दिनमै सबै टुंगो लगाएर मन्त्रीहरूको नाम सरकारमा पठाइने छ ।
‘हामी आन्तरिक छलफलमै छौं । भर्खरै माओवादी सरकारदेखि बाहिरियो । हामीले आन्तरिक भागबण्डा एक÷दुई दिनमै टुंगो लगाउँछौं र सरकारलाई पूर्णता दिन सहयोग गर्छौं,’ उनले प्रभावसँग भने । यसअघि कांग्रेस कोशी प्रदेश संसदीय दलको बैठक काठमाडौंमा बसेको थियो । बैठक बसे पनि मन्त्री बन्ने आकांक्षी धेरै भएका कारण कांग्रेसले मन्त्री हुनेको नाम मुख्यमन्त्री कार्कीलाई दिन सकेन । कोशीमा एमाले र कांग्रेसबीच चार–चारवटा मन्त्रालय लिने सहमति बनेको छ । थप एक जनालाई राज्यमन्त्री बनाउने तयारी भएको छ ।
पार्टीमा पहिला मन्त्री भइसकेकालाई सरकार नपठाउने विषयमा सहमति भए खोटाङका भूपेन्द्र राई, इलामका गोविन्द गिरी, मोरङका भीम पराजुली र मोरङकै मानबहादुर लिम्बू मन्त्री हुने कांग्रेस स्रोतको भनाइ छ । शोभा चेम्जोङ र गयानन्द मण्डलमध्येबाट एक जना राज्यमन्त्री हुने बताइएको छ । माओवादी केन्द्र सरकारबाट फिर्ता भएसँगै तीनवटा मन्त्रालय खाली भएका छन् । यस्तै, उद्योग कृषि तथा सहकारी मन्त्रालय मुख्यमन्त्री आफैंले राखेका छन् । खाली भएकै मन्त्रालय लिएर जाने विषयमा कांग्रेस सहमत देखिएको छ । कोशीमा माओवादीले भौतिक पूर्वाधार तथा यातायात, स्वास्थ्य, पर्यटन वन तथा वातावरण मन्त्रालय लिएको थियो । यी तीनै मन्त्रालय हाल खाली छन् ।
उता सुदूरपश्चिम प्रदेशमा पनि कांग्रेस–एमालेले संयुक्त सरकार बनाउने भएको छ । तर, नेकपा एकीकृत समाजवादीबाट मुख्यमन्त्री भएका दीर्घ सोडारीले राजीनामा दिएका छैनन् । बरु, उनले बिहीबार मन्त्रिपरिषद् सदस्य हेरफेर गरे । अल्पमतमा परिसक्दा पनि राजीनामा दिन उनले आनाकानी गरिरहेका छन् । कांग्रेस र एमालेले नागरिक उन्मुक्ति पार्टीले पनि सरकारमा समावेश गर्ने तयारी गरेका छन् । यी तीन दलले मुख्यमन्त्री सोडारीलाई पदबाट राजीनामा दिएर नयाँ सरकार गठनका लागि मार्गप्रशस्त गर्न आग्रह गरेका थिए ।
