- बेपत्ताका परिवारद्वारा गृहसचिवसँग विलौना
- आफ्नो परिवारका सदस्यहरुको छिटो खोजी गरिदिन आग्रह
- छिटोभन्दा छिटो उद्धार सामग्री उपलब्ध गराउने विषयमा काम भइरहेको गृहसचिवको भनाइ
चितवन– यही असार २८ गते बिहान नारायणगढ–मुग्लिन सडकखण्डमा गएको पहिरोले दुईवटा यात्रुबाहक बस त्रिशूली नदीमा पु¥यायो । बसमा सवार यात्रुका अधिकांश आफन्त उक्त समाचार सुन्नेबित्तिकै बोकेर घटनास्थल आइपुगेका थिए ।
उनीहरु विगत तीन दिनदेखि त्रिशूली किनारमा आफन्तहरुको खोजीमा सक्रिय छन् । उनीहरु बिहानदेखि साँझसम्म त्रिशूली किनारमै हुन्छन् । आफन्तलाई जीवितै पाउने आश मार्दै गरेका उनीहरुमा राज्यले सक्नेजति उद्धारमा जुटेन कि ? भन्ने आशंका परेको छ ।उर्लिएको त्रिशूलीको खोचमा आफन्त त परको कुरा दुईवटा बस नै अहिलेसम्म भेटिएका छैनन् । उनीहरुले खोजी कार्य छिटो गरिदिन अनुनय विनय गरिरहेका छन् ।
तीन दिनको खोजीले उल्लेख्य सफलता नमिलेपछि आइतबार गृहसचिव एकनारायण अर्याल, नेपाल प्रहरीका प्रहरी महानिरीक्षक वसन्तबहादुर कुँवर, सशस्त्र प्रहरी महानिरीक्षक राजु अर्याल घटनास्थल आइपुगे । उनीहरुलाई घटनास्थलमा रहेका बेपत्ता परिवारका सदस्यहरुले आफ्नो परिवारका सदस्यहरुको छिटो खोजी गरिदिन आग्रह गरे ।
मामाको छोरो (भाइ) त्रिशूलीमा बेपत्ता भएपछि खोजीका लागि हेटौंडाबाट आएका नकुबहादुर थापा अहिलेको तरिकाले बेपत्ताहरु भेट्टाउनै मुस्किल हुने भन्दै अरू विधि अपनाउन आग्रह गरे । उनीले गृहसचिवको टोलीसँग गुनासो गरे, ‘उच्च प्रविधिको प्रयोग गरेर बेपत्ताको खोजी गरिदिनुहोस् ।’
रौतहटबाट भाइ खोज्न आएका मोहन दास अहिले पनि कतै भेटिन्छ कि भन्ने आशमा नै छन् । तीन दिनदेखि आएर नदीतिरै हेरेर मात्रै बस्नुपरेको बताउँदै उनले छिटोभन्दा छिटो बेपत्ताको खोजी गरिदिन अनुरोध गरे । यातायात व्यवसायी महासंघका अध्यक्ष सरोज सिटौलाले दुईवटा बसमा सवार यात्रुहरुको खोजीमा तदारुपता देखाउन आग्रह गरे ।
उनीहरुको गुनासो सुनेपछि गृहसचिव अर्यालले उद्धारका लागि काम भइरहेको बताए । उनले भने, ‘छिटोभन्दा छिटो उद्धार सामग्रीहरु उपलब्ध गराउने विषयमा काम भइरहेको छ, चीन र भारत सरकारबाट पनि सामग्री उपलब्ध गराउने कुरा भएको ।’
विपद् प्रतिकार्य योजना तयारी गरी काम भइरहेको बताउँदै उनीले शवहरु पहिचान र मृतकका परिवारलाई राहत दिने एवं यहाँ उठेका कुरामा गृह मन्त्रालयले नेपाल सरकारलाई जानकारी गराउने बताए । यहाँको वस्तुस्थिति प्रधानमन्त्री र गृहमन्त्रीलाई जानकारी गराइने उनीले बताए ।
टोलीले घटनास्थलको स्थलगत अवलोकन र उद्धार कार्यबारे जानकारी लिएको थियो । हालसम्म घटनास्थलभन्दा तल नारायणी नदी किनारमा पाँचवटा शव फेला परेका छन् । प्रमुख जिल्ला अधिकारी इन्द्रदेव यादवका अनुसार पहिचान खुल्नेमा भारतको बिहार बेतिया जिल्ला पश्चिम सम्पारण २२ का ४० वर्षीय सजाद अन्सारी, भारतकै जयप्रकाश ठाकुर, माडी नगपालिका वडा नम्बर १ का २२ वर्षीय विकास परियार, सर्लाही बरहथवा नगरपालिका वडा नम्बर ३ का १९ वर्षीय रमितकुशर माझी र भारतको बिहार सितामणी बर्गिनिया जमुहवा बस्ने २८ वर्षीय ऋर्षि पल साह रहेका छन् ।
यही असार २८ गते बिहान ३ः३० बजेको समयमा भरतपुर महानगरपालिका वडा नं. २९ नारायगढ–मुग्लिङ सडकखण्डको सिमलताल भन्ने स्थानमा वीरगञ्जबाट काठमाडौंतर्फ गइरहेको बागमती प्रदेश ०३–००६ ख १५१६ नम्बरको एन्जल डिलक्स लेखेको यात्रुबाहक बस र काठमाडौंबाट गौरतर्फ जान आउँदै गरेको बागमती प्रदेश ०३२४९५ ख ००१– नम्बरको गणपति डिलक्स बस त्रिशूली नदीमा खसेका हुन् ।
ती दुई बसमा यात्रु चलानीका आधारमा ५१ जना यात्रु सवार भएको पुष्टि भएको थियो । तीमध्ये तीन जना पौडिएर उत्रिएका थिए । उनीहरुको अवस्था सामान्य छ । उद्धारमा नेपाल प्रहरी, सशस्त्र प्रहरी र नेपाली सेना जुटिरहेको छ । रासस
त्रिवेणीको गण्डक ब्यारेजमा भेटियो दुई शव
नवलपुर (प्रस)– नवलपरासी (बर्दघाट–सुस्तापूर्व) को त्रिवेणीस्थित गण्डक ब्यारेजमा दुईवटा शव फेला परेको छ । नारायणी नदीलाई बाँध बाधेर सिँचाइका लागि पानी लगेको ठाउँमा आइतबार साँझ दुईवटा शव फेला परेको प्रहरीले जनाएको छ ।
जिल्ला प्रहरी कार्यालय नवलपरासी (बर्दघाट–सुस्तापूर्व) का सूचना अधिकारी प्रहरी नायब उपरीक्षक बेदबहादुर पौडेलका अनुसार विनयी त्रिवेणी गाउँपालिका–७ स्थित गण्डक नहरमा दुई पुरुषको शव फेला परेको हो ।
शव भेटिएको स्थानमा त्रिवेणी चौकीबाट प्रहरी नायब निरीक्षक महेश रायमाझीको नेतृत्वमा पाँच जना तथा इलाका प्रहरी कार्यालय दुम्कीवासबाट प्रहरी निरीक्षक पदम थापाको नेतृत्वमा छ जनाको प्रहरी टोली परिचालन गरिएको पौडेलले बताए ।
दुवै शव शुक्रबार बिहान चितवनको भरतपुर–२९ सिमलतालबाट पहिरोले बगाएको बसको यात्रु हुनसक्ने आशंका गरिएको छ । शवको पहिचान खुल्न सकेको छैन । शवबारे अनुसन्धान भइरहेको प्रहरीले जनाएको छ ।
