- तामाङको दल सिक्किम क्रान्तिकारी मोर्चा ३२ मध्ये ३१ प्रदेशसभा सिटमा विजयी, प्रधानमन्त्री मोदीले दिए बधाई
- तामाङ पुनः मुख्यमन्त्री बन्ने पक्का भएको भारतीय सञ्चारमाध्यमहरुको भनाइ
- सन् १९९४ देखि २०१९ सम्म सिक्किममा राज गरेका पवन चाम्लिङले दुई स्थानबाट उम्मेदवारी दिएकामा दुवै स्थानमा पराजित
काठमाडौं– सिक्किममा मुख्यमन्त्री प्रेमसिंह तामाङको दल सिक्किम क्रान्तिकारी मोर्चाले ३२ मध्ये ३१ प्रदेशसभा सिट जितेको छ । आइतबारको अन्तिम नतिजाअनुसार अब प्रेमसिंह पुनः मुख्यमन्त्री बन्ने पक्का भएको भारतीय सञ्चारमाध्यमहरुले जनाएका छन् । प्रेमसिंह पोकलोक कमराङ क्षेत्रबाट पुनः निर्वाचित भएका छन् ।
उनलाई भारतीय प्रधानमन्त्री नरेन्द्र मोदीले बधाई दिँदै सहकार्य गरी अघि बढ्ने वाचासमेत गरिसकेका छन् । गत अप्रिल १९ मा भएको निर्वाचनको अन्तिम मत परिणामपछि तामाङले भनेका छन्, ‘यो जितको श्रेय कार्यकर्ता हुन् । मैले भाषणमात्र गरें । मभन्दा ज्यादा कार्यकर्ता खटे । नसुती नसुती खटे ।’
विजय ¥यालीलाई सम्बोधन गर्दै तामाङले नयाँ मतदातालाई विशेष धन्यवाद दिए । ‘नयाँ मतदाता जो हामीतिर आउनुभयो । युवाहरुले हामीलाई साथ दिनुभयो । सबैलाई धेरै धेरै धन्यवाद,’ तामाङले शपथसमेत जनताको माझमा लिने वाचा गरे । एक सिट भने यहाँ सिक्किम डेमोक्रेटिक फ्रन्टले जितेको छ । सन् १९९४ देखि २०१९ सम्म सिक्किममा राज गरेका पवन चाम्लिङको दल सिक्किम डेमोक्रेटिक फोरमले १४ सिट गुमाउँदै एक स्थानमा चित्त बुझायो । जबकि चाम्लिङले दुई स्थानबाट उम्मेदवारी दिएकोमा दुवै स्थानमा उनी पराजित भए ।
यसरी उदाए तामाङ
सुरुमा प्रेमसिङ चाम्लिङकै दल एसडिएफमा थिए । सन् १९९४ मा उनले चाम्लिङसँगै मिलेर एसडिएफ गठन गरेका थिए । २६ वर्षको उमेरमा सांसद बनेका तामाङ २० वर्षसम्म चाम्लिङकै साथमा रहे । चाम्लिङले २५ वर्ष शासन गर्दा तामाङ पनि १५ वर्षसम्म मन्त्री भए । सन् २०१३ मा भने पवनसँग प्रेमसिंहको ठाकठुक चल्यो । प्रेमसिंहले पवनलाई नातावादी र भ्रष्टाचारीको आरोप लगाएर पार्टी छाडे । त्यसपछि उनले नयाँ दल एसकेएम गठन गरे ।
वर्षदिनमै सन् २०१४ को निर्वाचनमा एसकेएमले १० सिट जित्यो । सन् २०१७ मा गाई वितरण कार्यक्रममा भ्रष्टाचार गरेको अभियोगमा प्रेमसिंह जेल परे । त्यतिबेला उनलाई १० लाख भारतीय रुपैयाँ भ्रष्टाचार गरेको आरोप लागेको थियो । एक वर्ष जेल बसेका तामाङले समर्थक यति धेरै पाए कि सन् २०१९ मा आफ्नो दललाई १७ सिट जिताए । पछि पवनकै पार्टीका चार सांसद आफ्नो दलमा भित्र्याउँदै पहिलोपटक मुख्यमन्त्री बन्न सफल भए ।
शिक्षकबाट करिअर सुरु गरेका तामाङ सन् १९६८ फेब्रुअरी ५ मा पश्चिम सिक्किममा जन्मिएका हुन् । कालुसिंह तामाङ र धनमाया तामाङका छोरा प्रेमले दार्जीलिङको दार्जीलिङ गभर्मेन्ट कलेजबाट स्नातक गरेका छन् । सन् १९९० देखि सन् १९९३ सम्म सरकारी शिक्षकका रूपमा कार्यरत प्रेमले तीन वर्ष अध्यापन गराएपछि राजनीतिमा लागेका थिए । कृष्णा राईसँग विवाह गरेका उनका एक छोरा आदित्य तामाङ छन् ।
एसडिएफको युवा संगठनको उपाध्यक्ष बनेका उनी २६ वर्षको उमेरमा चाङकुङबाट राज्यसभामा चुनिए । त्यही साल उनी पशुपालनमन्त्री भए । सन् १९९९ मा चाङकुङबाटै सांसद चयन भएपछि उनले २००४ सम्म उद्योग मन्त्रालयको जिम्मेवारी सम्हाले । सन् २००४ को चुनावमा तामाङले भारतीय राष्ट्रिय कंग्रेसका सतिशमोहन प्रधानलाई हरा
त्यसपछि उनले सन् २००९ सम्म आवास मन्त्रालय सम्हाले । सन् २००९ मा भएको राज्यसभा निर्वाचनमा उनले भारती कंग्रेसका अरूणकुमार सिंहलाई पराजित गरे । त्यसपछि पवनसँग उनको कुरा मिलेन । सन् २०१४ सेम्टेम्बर ६ मा उनले एसडिएफबाट राजीनामा दिएर एसकेएम गठन गरे । सन् २०१९ को चुनावपछि त २५ वर्ष सिक्किममा राज गरेका चाम्लिङको शासन अन्त्य गरे ।
जनताका समस्यामा साथ दिएका कारण उनको दललाई मन पराएको बताइएको छ । तामाङले अब आफू एकपटक मात्र मुख्यमन्त्री बन्ने र नयाँलाई जिम्मेवारी छाड्ने प्रतिबद्धतासमेत जनाएका छन् । ‘दुई कार्यकालभन्दा बढी मुख्यमन्त्री बन्ने छैन । दलको अर्को नेतालाई यो जिम्मेवारीका अवसर प्रदान गर्ने छु,’ उनले भनेका छन् ।
(भारतीय समाचार संस्थाहरुको सहयोगमा)
