कांग्रेसले अहिले केही सवाल उठायो । उठाएको पनि रवि लामिछाने कि को भन्ने बाबुबिरुद्ध । रवि लामिछानेविरुद्ध कांग्रेस खनिएको छ, के भन्नु ? भँगेरा मार्न जाने तोप बोकेर
केपी शर्मा ओली
अध्यक्ष
नेकपा एमाले
काठमाडौं– सहकारीको रकम अपचलनको मुद्दा पार लगाउन कस्तो मोडालिटीमा जाने ? यो विषय पार लगाउन बनेको कार्यदलको बिहीबारको बैठक पनि निष्कर्षबिहीन बनेको छ । राष्ट्रिय स्वतन्त्र पार्टीका सभापतिसमेत रहेका उपप्रधान तथा गृहमन्त्री रवि लामिछाने सहकारी ठगी प्रकरणमा संलग्न रहेको आरोप लगाउँदै लामो समयदेखि कांग्रेसले विरोध गर्दै आएको छ ।
कांग्रेसले संसदीय छानबिन समितिबाटमात्र यो मुद्दा पार लाग्ने भन्दै सदनदेखि सडकसम्मै आन्दोलनका कार्यक्रम सार्वजनिक गरिसकेको छ । तर सत्तापक्षले भने कांग्रेसका मागको कुनै सुनुवाई नगर्ने देखिएको छ ।बिहीबार सिंहदरबास्थित कानुन मन्त्रालयमा बसेको बैठकमा कुनै सहमति हुन नसकेको एमाले प्रमुख सचेतक महेश बर्तौलाले बताए । यद्यपि सहकारीको नाम भने खुलाएर लेख्न सकिने विषयमा आफूहरुले प्रस्ताव राखेको बर्तौलाको भनाइ थियो । ‘सहकारीको नाम राखेर छानबिन समिति बनाउने विषयमा छानबिन गरौं । व्यक्तिको नाम राखेर जान सकिँदैन भन्ने कुरा भयो,’ बर्तौलाले भने । बैठकमा कांग्रेस केही लचक भएको उनको दाबी थियो । ‘पहिला नै नाम राख्न सकिदैन भनेर भन्ने हामीले भन्यौ । कांग्रेस केही लचक भएको छ,’ बर्तौलाले भने ।
कांग्रेसले लामिछानेमाथि अनुसन्धान गर्न माग जारी राखेपछि सरकारले जेठ ५ गते कानुनमन्त्री पदम गिरीको संयोजकत्वमा कार्यदल गठन गरेको थियो । उक्त कार्यदलले छानबिन समितिको कार्यादेश(टीओआर) तय गर्ने जिम्मेवारी पाएको थियो । तर समितिको बैठकमा कार्यादेशबारे अझै सहमति जुट्न नसकेको हो ।एमाले नेता बर्तौलाले भने झैं समितिमा कांग्रेसले कुनै लचकता नदेखाएको कांग्रेस सहमहामन्त्री जीवन परियारले बताए । सहकारीको रकम अपचलनमा गृहमन्त्री लामिछाने संलग्न रहेको पुष्टि भइसकेकोले नाम कीटेरै राख्नुपर्ने कांग्रेसको माग छ । ‘हामी अडानबाट पछि हटेका छैनौं । जसका बारेमा छानबिन समिति बनाउने भनेका छौं त्यहा नपुगेसम्म हामी मान्दैनौं,’ परियारले भने, ‘सत्तापक्षका साथीहरुले रवि लामिछानेको नाम नराखेर पनि छानबिन समिति बनाउन सकिन्छ भन्नु भएको छ । हामीले त्यस्तो गोलमोटोल मान्दैनौं भनेका छौं ।’
जसका बारेमा छानबिन समिति बनाउने भनेका छौं त्यहा नपुगेसम्म हामी मान्दैनौं । सत्तापक्षका साथीहरुले रवि लामिछानेको नाम नराखेर पनि छानबिन समिति बनाउन सकिन्छ भन्नु भएको छ । हामीले त्यस्तो गोलमोटोल मान्दैनौं
जीवन परियार
सहमहामन्त्री, नेपाली कांग्रेस
कार्यदलमा प्रमुख तीन दलबाट एक एक जना र सरकारका तर्फबाट कानुनमन्त्री रहेका छन् । कार्यदलमा कानुनमन्त्री गिरी, कांग्रेस सहमहामन्त्री परियार, एमाले प्रमुख सचेतक बर्तौला र रास्वपाबाट शिशिर खनाल रहेका छन् । बिहीबारको बैठकमा कांग्रेस नेता ज्ञानेन्द्रबहादुर कार्की पनि सहभागी थिए । रास्वपा नेता शिशिर खनालले कांग्रेस नेताहरुले पार्टी नेतृत्वसँग छलफल गरेपछि थप निर्णय लिने बताए । ‘हामीले समितिका लागि प्रस्ताव ग¥यौं । कांग्रेसले नेतृत्वसँग कुरा गर्छौ भन्नु भएको छ,’ खनालले भने ।
बिहीबार सहमति नजुटेपछि कार्यदलले आज बिहानका लागि बैठक डाकेको छ । आजै बिहान ११ बजे प्रतिनिधि सभाको बैठक बस्दैछ । प्रतिनिधि सभाको बैठक अघि कार्यदलले कुनै न कुनै निचोड आउने गरी छलफल गर्ने बर्ताैलाले दाबी गरे । ‘कार्यदलको अन्तिम बैठक बिहान ८ बजे बस्छ । यहाँबाट निष्कर्ष निकालेर हामी सदनमा पुग्छौ,’ बर्तौलाले भने ।
गृहमन्त्रीमाथि कांग्रेस खनिएकोमा ओलीको आपत्ति
एमाले अध्यक्ष केपी शर्मा ओलीले नेपाली कांग्रेसले संसदमा उपप्रधान एवं गृहमन्त्री रवि लामिछानेमाथि सहकारी ठगीको आरोप लगाउँदै संसद अवरुद्ध गरिरहेको र एउटा पात्रका विरुद्ध खनिएकोमा आपत्ति जनाए । ‘कांग्रेसले अहिले केही सवाल उठायो । उठाएको पनि रवि लामिछाने कि को भन्ने बाबुबिरुद्ध कांग्रेस खनिएको छ । रवि लामिछानेविरुद्ध कांग्रेस खनिएको छ, के भन्नु – भँगेरा मार्न जाने तोप बोकेर,’ बिहीबार सुनसरीमा आयोजित एक कार्यक्रमलाई सम्बोधन गर्दै ओलीले भने, ‘बल्ल बल्ल राजनीतिमा आएको एक वर्ष भएको छ । कांग्रेसले अघिल्लो दिन प्रधानमन्त्रीमा प्रस्ताव गरेको र प्रस्ताव नमानेपछि सहकारी ठगीको आरोप लगाएर अर्घेल्याइँ गरेको हो ।’
संसदमा मुर्दावादको नारा लगाउन नमिल्ने र अप्रमाणित कुरा संसदमा बोल्न नहुने ओलीले बताए । राजनीति गर्नुपर्छ तर राजनीति देशका लागि, जनताका लागि, सत्य स्थापनाका लागि हुनुपर्ने उनको भनाइ थियो । राजनीति क्षणिक स्वार्थका लागि र क्षणिक लाभका लागि गर्न नहुने उनले बताए ।ओलीले थपे, ’रातिसम्म प्रधानमन्त्रीका लागि ठीक, म यता लाग्न सक्दिनँ भनेपछि त्यसो भए तँ सहकारीको ठग । यो अलि मिलेन । एउटा व्यक्तिको नाम लिएर संसदमा सहकारीको ठग कहाँ प्रमाणित भयो । भ्रष्टाचारी ठहर भएको मान्छे संसदमा उभिएर सहकारी ठग भनिरहेको छ । संसदमा मुर्दावादको नारा लगाइँदैन । त्यसलाई राम्रो मानिँदैन । अप्रमाणित कुरा संसदमा बोलिँदैन ।’
