काठमाडौं– संसद्को उद्योग तथा वाणिज्य र श्रम तथा उपभोक्ता हित समितिले श्रम, रोजगार तथा सामाजिक सुरक्षा मन्त्रालयलाई वैदेशिक रोजगारीमा हुने सबै प्रकारका ठगी र बदमासीको अन्त्य गर्न निर्देशन दिएको छ । बिहीबार सिंहदरबारमा बसेको समितिको बैठकले वैदेशिक रोजगारीमा जाने नेपाली नागरिक विभिन्न माध्यमबाट ठगीमा पर्ने गरेको पाइएको भन्दै यसको अन्त्य गर्न निर्देशन दिएको हो ।
समितिले वैदेशिक रोजगारीमा नेपाली दक्ष जनशक्तिको आबद्धता बढाउन सीप विकासका लागि प्रभावकारी कार्यक्रम सञ्चालन गर्नसमेत निर्देशन दिएको छ । यसको लागि राष्ट्रिय व्यवसायिक प्रशिक्षण प्रतिष्ठानको संस्थागत क्षमता अभिवृद्धि गरी विश्व बजारको माग र आवश्यकताअनुसार तालिम कार्यक्रम सञ्चालन गर्नुपर्ने बताइएको छ ।
समतिले गरेको निर्णयअनुसार नेपालमा सञ्चालित म्यानपावर कम्पनीहरुको नियमित अनुगमन तथा निरीक्षण गरी वैदेशिक रोजगारीको क्षेत्रमा हुने सबै प्रकारका ठगी तथा बदमासीको अन्त्य गर्न नेपाल सरकार, श्रम, रोजगार तथा सामाजिक सुरक्षा मन्त्रालयलाई निर्देशन दिने उल्लेख गरिएको छ । साथै समितिले वैदेशिक रोजगारीमा रहेका श्रमिकलाईसमेत मताधिकार प्रयोग गर्ने अवसरको सुनिश्चितताका लागि आवश्यक पहल गर्न प्रधानमन्त्री तथा मन्त्रिपरिषद्को कार्यालय र श्रम मन्त्रालयलाई निर्देशन दिएको छ ।
त्यस्तै वैदेशिक रोजगारीको क्रममा विश्वका विभिन्न मुलुकमा युद्ध तथा अन्य विभिन्न कारणले अलपत्र अवस्था परेका नेपाली श्रमिकहरूको पहिचान गरी तत्काल उद्धार गरी नेपाल फिर्ता ल्याउन आवश्यक पहल गर्न पनि समितिले निर्देशन दिएको छ । समितिको निर्णयमा भनिएको छ, ‘विभिन्न क्षेत्रमा कार्यरत कर्मचारी, श्रमिकलाई कोषमा आबद्ध गराउँदै अनौपचारिक क्षेत्रमा रहेका कामदारहरूलाई समेत यस कोषमा आबद्ध गराई सेवा सुविधा उपलब्ध गराउन नेपाल सरकार, श्रम, रोजगार तथा सामाजिक सुरक्षा मन्त्रालयलाई निर्देशन दिने ।’ त्यसैगरी नेपालमा दर्ता भएका सबै प्रतिष्ठानहरू सामाजिक सुरक्षा कोषमा सूचीकृत गर्न गराउन पनि निर्देशन दिइएको छ ।
समितिले वैदेशिक रोजगारीको सम्बन्धमा मात्र श्रम मन्त्रालयलाई निर्देशन दिएको छैन । उसले श्रम मन्त्रालयको चालु आर्थिक वर्षको बजेट कार्यान्वयन निरशाजनक रहेको भन्दै सुधार गर्न पनि निर्देशन दिएको छ । समितिले मन्त्रालयको चालु आवको खर्चको अवस्था निराशाजनक रहेको ठहर गर्दै बजेट कार्यान्वयनमा देखा परेका समस्या समाधान गरी बजेट कार्यान्वयनमा सुधार गर्न निर्देशन दिएको छ ।
