इटहरी–उपप्रधान तथा रक्षामन्त्री ईश्वर पोखरेलले सरकार मात्र नभएर प्रणाली नै परिवर्तन भएकाले सरकारले निर्माणको कामलाई अघि बढाउन सम्भव भएको बताएका छन् ।
प्रेस संगठन प्रदेश नं १ ले शनिबार आयोजना गरेको प्रदेश भेला तथा शपथग्रहण कार्यक्रममा उनले यस्तो बताएका हुन् । उनले भने, ‘सरकार परिवतर्न भएर यहाँ विकास गर्न सम्भव छैन । तर हामीले प्रणाली नै परिवर्तन गरेकाले निर्माणको कामलाई अघि बढाउन सकेका हौँ ।
उपप्रधानमन्त्री पोखरेलले कृषिलाई व्यावसायीकरण र आधुनिकीकरण गर्ने काम गरेकाले पनि विकासका कार्यहरू अगाडी बढिरहेको बताए । उनले औद्योगिक क्षेत्रको निर्माणलाई प्रोत्साहन र ऊर्जा विकासको काम सुरु गरेको जनाउँदै विकासका लागि योजनाबद्धरूपमा सरकार अघि बढिरहेको जनाए । उनले सरकारले पनि पार्टीको घोषित नीति र घोषणापत्रको कार्यान्वयनमा पहल बताए । त्यस्तै उनले पत्रकारले पार्टीको काम र पत्रकारिता पेशालाई बराबरीरूपमा अगाडि बढाउनुपर्ने सुझाव दिए । उनले भने, ‘तपाईहरू आफ्नो पेशा र विचारप्रति इमान्दार भएर लाग्नुहोस् ।’
पार्टी स्थायी कमिटी सदस्य तथा प्रदेश इन्चार्र्ज भीम आचार्यले जनतालाई सही सूचना पुर्याउने काममा पत्रकारले जोड दिनुपर्ने बताए । उनले भने, ‘पत्रकारले नै सहि र गलत छुट्टयाउने हो ।’
प्रदेश नं १ का मुख्यमन्त्री शेरधन राईले प्रदेश सरकारले उल्लेख्य काम गरेको बताए ।
कार्यक्रममा नेकपा प्रचार विभागका उपप्रमुख तथा प्रधानमन्त्रीका प्रेस सल्लाहकार सूर्य थापा, नेकपा प्रदेश अध्यक्ष देवराज घिमिरे, प्रेस संगठन केन्द्रीय अध्यक्ष महेश्वर दाहाल, प्रदेश नं १ का आन्तरिक मामिला तथा कानूनमन्त्री हिक्मत कार्की, इटहरी उपमहानगरपालिकाका प्रमुुख द्वारिकलाल चौधरी तथा नेपाल पत्रकार महासंघ प्रदेश नं १ का अध्यक्ष विक्रम लुइँटेलले कार्यक्रमको सफलताको शुभकामना व्यक्त गर्नुभएको थियो । प्रेस संगठन प्रदेश नं १ का संयोजक राजन केडीको अध्यक्षतामा सम्पन्न कार्यक्रमले सात बुँदे इटहरी घोषणापत्र जारी गरेको थियो ।
