बलेवा–प्रधानन्यायाधिश चोलेन्द्र शमशेर जबराले सबै नेपालीको न्यायमा पहुँच विस्तारका लागि आफूले योजना बनाइरहेको जानकारी गराएका छन् ।
जिल्ला अदालत बागलुङको नवनिर्मित भवनको शनिबार उद्घाटन गर्दै सो जानकारी गराएका हुन् । उनले न्यायालयको सुधारका लागि बनेको पञ्चवर्षीय रणनीतिक योजना कार्यान्वयनमा पनि आफुले जोड दिएको बताए । उनले केहि समय अगाडी सावैजनिक सुनुवाइ कार्यक्रममा गरेका प्रतिबद्धता पूरा गर्ने पनि न्यायालयमा सुधारका गर्न लागेको बताए । उनले न्यायालयले दिने सेवा सवैलाई मान्य हुनुपर्नेमा भन्दै न्यायालयमा सुशासन कायम गर्न आफु तत्पर रहेको बताए ।
न्यायालयले समयमा निर्णय दिन नसकेका कारण कोही कसैले पनि दुःख पाउन नहुने भन्दै सकेसम्म छिटो न्याय सम्पादनका लागि सर्वोच्च अदालत तयार रहेको बताए । उनले हाल श्रव्यदृष्य माध्यमबाट पनि न्याय सम्पादनलाई थप पारदर्शी बनाउँदै आएका जानकारी गराए । उनले देशभरीका न्यायालय प्रविधिमैत्री बनाउनुपर्ने सुझाव दिँदै सोहीअनुसारका फैसला सबैका सर्वमान्य हुने पनि बताए । उनले पुराना मिसिललाई इलेक्ट्रोनिक माध्यममा सङ्ग्रहित गर्दा खोजी गर्न र भण्डारण गर्न सहज हुने भएकाले मिसिलको तस्विर बनाएर विद्युतीय माध्यममा सङ्ग्रहित गर्ने काम भइरहेको जनाए । उनले आगामी साउन १ गतेदेखि देशभरका २५ जिल्ला अदालतमा इलेक्ट्रोनिक माध्यमबाट पुराना मिसिललाई सङ्ग्रहित गर्ने काम सुरु हुने बताए । न्याय, सुशासनका लागि सर्वोच्च अदालतले अनुगमन र नियमनको कामलाई प्राथमिकताका साथ अघि बढाएको उनले जानकारी दिए ।
सात करोड ५५ लाख ५६ हजार लागतमा निर्माण गरिएको भवन चार रोपनी तीन आना जमिनमा बनेको तीनतले भवनमा २७ कोठा छन् । विसं २०७१ मा सुरु भएर २०७४ मा सकिने भनिए ढिला २०७६ मा निर्माण सम्पन्न भएको थियो ।
