काठमाडौं – विश्व स्वास्थ्य संगठनको चेतावनीपछि सरकारले अघिल्लै वर्षदेखि प्रचारमा ल्याएको नेपाल भ्रमण वर्ष २०२० स्थगित गरेको छ । अष्ट्रेलिया भिषण आगलागीको चपेटामा पर्दासमेत हाम्रा पर्यटन मन्त्रीले त्यहाँ पुगेर ठूलो उत्सव मनाएका थिए । त्यसको अष्ट्रेलिया र नेपाल दुवैतिर व्यापक बिरोध भयो । अहिले पनि नेपाल कोरोना भाइरसको उच्च जोखिममा रहेको विश्व स्वास्थ्य संगठनको चेतावनी नआइन्जेल सरकार भ्रमण वर्षको कार्यक्रम स्थगित गर्न तयार थिएन । त्यहीकारण दुई महिनादेखि संसारका विभिन्न देशमा प्रचारप्रसार गरिँदै आएको नेपाल भ्रमण वर्ष २०२० स्थगित गरिएको छ । कोरोना भाइरस भनिने कोभिड—१९ विश्वभर तीव्र गतिमा फैलन थालेपछि नेपाल सरकारले विदेशमा हुने पर्यटन प्रचारप्रसारका कार्यक्रम तत्कालका लागि स्थगित गर्ने निर्णय गरेको कुरा एक औपचारिक कार्यक्रममा संस्कृति, पर्यटन तथा नागरिक उड्डयनमन्त्री योगेश भट्टराईले जानकारी गराएका छन् । शनिबार पर्यटन प्रवर्द्धनका निम्ति काठमाडौंमा आयोजित पदयात्रा कार्यक्रम पछि बोल्दै मन्त्री योगेश भट्टराईले विदेशमा हुने प्रचारप्रसारका काम स्थगित गरी सरकार आन्तरिक पर्यटन प्रवर्द्धनको काममा केन्द्रित भएको जानकारी दिए । परिस्थिति अनुकुल नहुँदासम्म आन्तरिक पर्यटनलाई जोड दिने नीति लिएको उनको धारणा थियो ।
नेपाल भ्रमणवर्ष २०२० मा २० लाख विदेशी पर्यटक भित्र्याउने लक्ष्यलाई कोरोना भाइरसको आतंकले अवरोध गरेको उनले बताए ।
विश्वजगत कोरोनाबाट प्रभावित बन्दै गएको सन्दर्भमा आएका सुझावलाई मध्यनजर राखी विदेशमा हुने प्रचारप्रसारका कार्यक्रम स्थगित गरिएको बुझिएको छ ।
विदेशमा हुने पर्यटन प्रचारप्रसारका कामलाई केही समय स्थगित गरी देशभित्रको पर्यटन प्रवर्द्धनको काममा बढी ध्यान दिने नीति सरकारले अघि सारेको छ । परिस्थिति अनुकुल भई सन्त्रास हट्दै गएपछि फेरि सक्रियताका साथ भ्रमणवर्षको प्रवर्द्धनात्मक कार्यक्रम लिएर निस्कने पर्यटन मन्त्रालयको योजना छ ।
२० लाख विदेशी पर्यटक भित्र्याउने लक्ष्यका साथ भ्रमण वर्ष २०२० लाई धुमधामसँग मनाउन र विभिन्न माध्यमबाट प्रचारप्रसारका काम अघि बढेपनि नयाँ वर्ष २०२० सुरु भएसँगै चीनको वुहानबाट देखा परेको कोरोनाका कारण उक्त कार्यक्रम नराम्ररी प्रभावित भयो । कोरोनाकै कारण वर्षको सुरुदेखि नै चीनबाट आउने पर्यटकहरुको संख्यामा कमि आएको थियो । नेपालमा कोरोनाको प्रभाव नदेखिएपनि त्रिभुवन अन्तर्राष्ट्रिय विमानस्थल तथा सीमा नाकाहरुमा सरकारले कडाइ गरेको छ । सरकारले विमानस्थल र सीमा नाकाहरुमा आवश्यक उपकरणसहित स्वास्थ्यकर्मीको टोली खटाएको छ ।
कोरोना प्रभावित मुलुकहरुमा पर्यटन आवतजावतमा मात्रै नभएर व्यापार व्यवसाय, औषधि उत्पादन, कच्चा पदार्थ आयात निर्यातमा पनि असर गरेको छ । कतिपय ठाउँमा हप्तौँदेखि विद्यालयहरु समेत बन्द रहेका छन् । त्यसको प्रभाव नेपालमा पनि कुनै न कुनै रुपमा पर्नु अवश्यम्भावि छ ।
