परासी–प्रदेश नं ५ का मुख्यमन्त्री शंकर पोखरेलले प्रदेश सरकार योजनाबद्ध विकासका पक्षमा रहेको बताएका छन् ।
पश्चिम नवलपरासीको रामग्राम–७ स्थित रामग्राम स्तूप र देउरवा गाउँ जोड्ने गरी बन्न लागेको झरही खोला पुलको बुधबार शिलान्यास गर्दै उनले यस्तो बताएका हुन् । उनले जनताको सहयोगकै कारण यस्ता उपलब्धिमूलक काम गर्न सम्भव भएको भन्दै छोटो समयमै जनताले प्रदेश सरकारको अनुभूति गर्न थालेको जानकारी गराए ।
उनले रामग्राम स्तूपलाई प्रमुख पर्यटकीय गन्तव्यको रूपमा विकास गर्न यातायातका पूर्वाधारले जोड्न आवश्यक रहेको पनि बताए । उनले शिलान्यास गरेको पुल रामग्रामको विकासमा कोशेढुङ्गा सावित हुने विश्वास बताए ।
उनले रामग्रामको गुरुयोजना कार्यान्वयन प्रक्रियासँगै विकास अघि बढेको बताए । उनले सो स्थानमा बौद्ध सङ्ग्रहालय बनाउने काम पनि छिट्टै अघि बढाउने जानकारी गराए । मुख्यमन्त्री पोखरेलले प्रदेश सरकारले पूर्वाधार विकासमा जोड दिएको उल्लेख गर्दै यो पुल पनि पूर्वाधार विकासकै चरणअन्तर्गत रहेको बताए । उनले कृषिको आधुनिकीकरण, औद्योगीकरण तथा पर्यटकीय पूर्वाधार विकासलाई उच्च प्राथमिकता दिएको बताए । यी विकासका परिसूचक रहेकोले पनि प्राथमिकतामा राखेको बताए । उनले प्रदेश न. ५ का हरेक स्थानियको घरमा तीन वर्षभित्र स्वच्छ पिउने पानीको उपलब्धता र दुई वर्षभित्र बिजुली पुर्याउने जनाए ।
शिलान्यास समारोहमा भौतिक पूर्वाधार विकासमन्त्री बैजनाथ चौधरीले पुल निर्माणमा ढिलाइ नगर्न निर्माण कम्पनीलाई निर्देशन दिँदै आगामी दुई वर्षभित्रै उक्त पुल निर्माण हुने विश्वास व्यक्त गरे । उनले रकम अभावका कारणले पुल निर्माण नरोकिने जनाउँदै रामग्रामको गुरुयोजनालाई पनि यसले सहयोग पुग्ने बताए ।
प्रदेशसभा सदस्य वैजनाथ जयसवालले रामग्राम स्तूप, पण्डितपुर र अनोमाघाटको विकासमा विशेष जोड दिन आग्रह गरे । भौतिक पूर्वाधार विकास मन्त्रालयले आगामी दुई वर्षभित्र सम्पन्न गर्ने गरी ३५ मिटर लम्बाइको उक्त पुल एसिआटिक÷प्रदीप÷जुम्ली जेभी रूपन्देहीलाई निर्माणको जिम्मा दिएको छ ।
निर्माण कम्पनीसँग गत असोज २ गते कूल छ करोड ६२ लाख १८ हजार लागतमा ठेक्का सम्झौता गरिएको सडक पूर्वाधार विकास कार्यालय रूपन्देहीले जनाएको छ ।
