काठमाडौं – वैदेशिक रोजगारका लागि हङकङ अत्यन्तै उपयोगी हुने गैरआवासीय नेपाली संघ, हङकङका अध्यक्ष राधिका गुरुङ (टीका)ले बताएकी छन् । बुधबार राजधानीमा वैदेशिक रोजगार पत्रकार समाजसँग भएको अन्तक्र्रिया कार्यक्रममा अध्यक्ष गुरुङले भौगोलिक रूपमा अत्यन्तै नजिक मात्र नभएर आम्दानीका हिसाबले पनि वैदेशिक रोजगारका लागि नेपालीहरूलाई हङकङ अत्यन्त उपयुक्त हुने बताइन् ।
वैदेशिक रोजगारका लागि हङकङमा नेपालीहरूलाई अत्यन्तै सम्भावना भएको उनले बताएकी छन् । एनआरएन हङकङ र हङकङ सरकारबीच हुने कतिपय अन्तक्र्रिया कार्यक्रममा हङकङ सरकार नेपालीप्रति अत्यन्तै सकरात्मक भएको भए पनि नेपाल सरकारले यसबारे पहल नगरेको उनले बताएकी छन् । कुनै समय वीर नेपालीले हङकङका लागि ज्यान दिएकाले हङकङमा नेपाली र अन्य मुलुकका नागरिकलाई हेर्ने दृष्टि नै फरक भएको आफूले पाएको उनले बताएकी छन् ।
उनले भनिन्, ‘हङकङमा जे कामका लागि पहिले गोर्खा (नेपाली) अनि मात्र भारतीय तथा पाकिस्तानी वा अरु रोजिन्छ ।’ यसको अर्थ हङकङ नागरिकको मन नेपालीले जितेको देखिएको भन्दै यस्तो अवस्थामा नेपालीलाई वैदेशिक रोजगारमा पठाउन सरकारले पहल गर्नुपर्ने उनले बताइन् ।
त्यस्तै, घरेलु कामदारका लागि नेपाली महिलाहरूका लागि पनि हङकङ अत्यन्तै सुरक्षित भएको उनले बताएकी छन् । महिलाहरूको हकमा वैदेशिक रोजगारका लागि हङकङभन्दा बढी सुरक्षित हुने मुलुक हुनै नसक्ने पनि उनले ठोकुवा गरिन् । सुरक्षा मात्र नभएर पारिश्रमिकको हिसाबमा पनि हङकङ उत्कृष्ट रहेको उनले बताएकी छन् । अहिले खान, बस्न दिएर पनि मासिक ७० हजार रूपैयाँसम्म कमाउन सक्ने भन्दै महिलाहरूका लागि सुरक्षित गन्तव्य हङकङ हुने हुनाले सरकारले सरकारी तहमा कुरा गर्नुपर्ने उनले बताइन् ।
उनले आफ्नो कार्यकालमा नै हङकङमा वैदेशिक रोजगारको व्यवस्था गर्न आफूले सरकारी तहमा कुरा गरेको बताउँदै भनिन्, ‘परराष्ट्र मन्त्रालयबीच निकै सकरात्मक किसिमले काम अघि बढिरहेको र श्रम मन्त्रीसँग भने समयाभावका कारण लामो कुरा हुन सकेन ।’
हङकङमा वैदेशिक रोजगारका लागि पहल गर्न आपूmले श्रम मन्त्रीलाई ज्ञापनपत्र बुझाएको पनि उनले बताएकी छन् । यसका लागि एनआरएन हङकङले बारम्बार सरकारलाई झक्झक्याइरहेको तर सरकारले भने यसलाई वास्ता नगरेको भन्दै सरकारसमक्ष नेपालीहरूलाई हङकङ सुरक्षित वैदेशिक रोजगारको गन्तव्य हुन सक्ने कुरा पुर्याउन पनि उनले आग्रह गरिन् ।
हङकङ सरकारसँग नेपाल सरकारले गम्भीर रूपमा कुरा उठाउने हो भने सम्भावनाको ढोका खुल्ने उनले बताएकी छन् । हङकङका अत्यन्तै धनी समुदायले कामदार मात्र नभएर सुरक्षाका लागि पनि पहिलो गोर्खा हुनुपर्ने भनेकाले सरकारले अनुमति दिने हो भने उनीहरूले नेपालीलाई नै सुरक्षाकर्मीमा राख्ने सम्भावना रहेको उनले बताइन् । हङकङमा सुरक्षाकर्मीको पारिश्रमिक करिब डेढदेखि २ लाख रूपैयाँसम्म रहेकाले यसको फाइदा नेपालीले उठाउन सक्ने भन्दै सरकारले माथिल्लो तहमा कुरा गर्नुपर्ने उनको सुझाव छ ।
सन् २००५ देखि नेपालीलाई हङकङमा रोजगार भिसा बन्द गरेको थियो । तत्कालीन अवस्थामा नेपालमा सशस्त्र द्वन्द्व भइरहेकाले नेपाली नफर्कने क्रम बढेपछि हङकङ सरकारले रोजगार भिसा बन्द गरेको थियो । सशस्त्र द्वन्द्वलाई देखाउँदै नेपालीहरू शरणार्थी बन्ने क्रम बढेको थियो । यो संख्या तत्कालीन समयमा करिब १ हजार २ सय जना शरणार्थी बनेका थिए । तर, अहिले यो क्रम घटेको छ । हाल करिब १ सय ५० जना मात्र शरणार्थी भएर हङकङमा बसेको हङकङ सरकारको आँकडा रहेको अध्यक्ष गुरुङले बताइन् ।
हङकङमा नेपाली शरणार्थीको संख्या घटेकाले अब यसलाई सरकारी तहमा पुर्याएर नेपालले आफ्नो नागरिकलाई रोजगारका लागि खुला गर्न आग्रह गर्ने हो भने यसबाट नेपाली नै अत्यन्तै लाभान्वित हुने उनको भनाइ छ । अहिले नेपालीहरूका लागि खाडीको विकल्प देखिएको छैन । केही गरी खाडी मुलुकमा उथलपुथल आएको खण्डमा नेपालका लागि अप्ठ्यारो दिनहरू आउन सक्ने हुनाले हङकङलाई वैकल्पिक वैदेशिक रोजगारको मुलुक बनाउने हो भने यसबाट सरकारले पनि भरमग्दुर फाइदा लिन सक्ने अध्यक्ष गुरुङको भनाइ छ ।
-1745656903.jpeg)