काठमाडौं–वाग्मती प्रदेशका भौतिक पूर्वाधार विकासमन्त्री रामेश्वर फुयाँलले सहज एवं छिटो गन्तव्यमा पुग्ने नागरिकको चाहना पूरा गर्न सुरुङ मार्गको विकासमा प्रदेश सरकार कटिवद्ध भएको बताएका छन् ।
कागेश्वरी मनोहरा नगरपालिका–२ आलापोटमा रहेको बाल विकास माध्यमिक विद्यालयको ६४ औँ वार्षिकोत्सव एवं अभिभावक दिवस कार्यक्रममा उनले यस्तो बताएका हुन् ।
उनले भने, ‘सहुलियत दरमा सहज यात्रा एवं छिटो गन्तव्यमा पुग्ने नागरिकको चाहना सुरुङ मार्गले नै पुरा गर्छ ।’ उनले केन्द्रीय राजधानी काठमाडौंबाट प्रदेश राजधानी हेटौँडा जोड्ने सुरुङमार्गलाई प्रदेश गौरवको आयोजनाका रूपमा अघि बढाउन लागिएको जानकारी गराउँदै सुरुङ मार्गको उपयोगिताबारे जानकारी गराएका थिए ।
त्यस्तै उनले मदन भण्डारी मार्गलाई सहज बनाउन पोष्टबहादुर सुरुङमार्ग बनाउन लागेको बताए । साथै, प्रदेशका अन्य स्थानमा पनि सुरुङमार्गको सम्भाव्यता अध्ययन भइरहेको उनले जानकारी गराएका थिए ।
उनले विसं १९१७ मा चुरियामाईमा दक्षिण एशियाकै पहिलो सुरुङमार्ग निर्माण गरेको नेपालले लामो समय यसलाई प्राथमिकता राख्न नसकेपछि सुरुङ मार्गको विकास हुन नसकेको बताए । उनले अबको सरकार र प्रदेश सरकारले सुरुङ मार्गमा ध्यान केन्द्रित गर्न लागेको जानकारी गराए ।
सुरुङ मार्गको महत्व दर्शाउँदै चक्रपथको १५० किमीमध्ये गोकर्णेश्वरको जगडोलबाट कागेश्वरी मनोहरा नगरपालिकाको अधिकारी गाउँसम्मको १० किमीको काम चालु आर्थिक वर्षको लागी तयारी अघि बढाईएको जानकारी गराए । यसका लागि मन्त्रालयअन्तर्गत ३० करोड बजेट विनियोजनसमेत भईसकेको उनले जानकारी गराए ।
त्यस्तै उनले प्रदेशमा एक घर एक धारा अभियानलाई सफल बनाउने योजनालाई प्राथमिकता दिइएको जनाउँदै यातायात पूर्वाधार क्षेत्रलाई व्यवस्थित गर्ने काम अघि बढाईएको जनाए । सिँचाइ योजनामार्फत जमिनको उब्जनी बढाउन पनि मन्त्रालयले ध्यान दिएको उनको भनाई थियो ।
कार्यक्रममा नगरपालिकाको वडा नं १ र २ का अध्यक्ष क्रमशः मुकुन्द गजुरेल र सुदर्शन धिमाल, विद्यालय व्यवस्थापन समितिका अध्यक्ष महेश्वर फुयाँल, विद्यालयका प्रधानाध्यापक राजकुमार वाइवा, व्यवस्थापन समितिका पूर्वअध्यक्ष जगन्नाथ कार्की, हाँस्य कलाकार श्रीकृष्ण सिम्खडालगायतको उपस्थिति थियो ।
