काठमाडौं– नेपाली कांग्रेसले शान्तिपूर्ण प्रदर्शनमा रहेका नेपाल विद्यार्थी संघका नेता, कार्यकर्तालाई प्रहरीले गिरफ्तार गरेको भन्दै ध्यानाकर्षण भएको जनाएको छ ।
पृथ्वीनारायण क्याम्पस पोखरामा दुई विद्यार्थी समूहबीच सामान्य विवादलाई मिलाउन क्याम्पस प्रशासनले दुवै समूहका प्रतिनिधिलाई क्याम्पसमा बोलाएको अवस्थामा क्याम्पस परिसरबाटै नेविसंघका रोशन हमाललाई प्रहरीले सुनियोजित रूपमा गिरफ्तार गरेको कांग्रेसले विज्ञप्तिमार्फत आरोप लगाएको छ । नेविसंघले बिना कारण गिरफ्तार गरिएकामा विरोध जनाउँदै हमालको रिहाइको माग गरी गरेको शान्तिपूर्ण प्रदर्शनमा प्रहरीद्वारा जथाभावी बल प्रयोग गरेको कांग्रेसका मुख्यसचिव कृष्णप्रसाद पौडेलद्वारा सोमबार जारी विज्ञप्तिमा जनाइएको छ ।
नेपाली कांग्रेस कास्कीको पार्टी कार्यालयभित्रै प्रवेश गरी सुरक्षाकर्मीद्वारा विद्यार्थी नेतामाथि लाठी प्रहार गरी सख्त घाइते बनाएको र विष्णु पहारी, सुमन विमली, निर्दोषविक्रम पौडेल, असिम सुवेदीलगायतलाई गिरफ्तार गरेको विज्ञप्तिमा जनाएको छ । शान्तिपूर्ण रूपमा विरोध प्रदर्शन गर्न पाउने नागरिकको नैसर्गिक अधिकारमाथि प्रहरीले हस्तक्षेप गरेको आरोप लगाउँदै कांग्रेसले उक्त घटनाको निन्दा र भत्र्सना गरेको छ । घाइते विद्यार्थी नेताहरूको उपचारको व्यवस्था गर्न र गिरफ्तार विद्यार्थीलाई तत्काल रिहाइ गर्न माग गरिएको छ ।
सुरक्षा सतर्कताका अपनाउन अपिल
यसबीच कांग्रेसका सभापति शेरबहादुर देउवाले कोरियामा रहेका नेपालीको ‘कोरोना भाइरस (कोबिड १९)’को संक्रमणबाट सुरक्षामा उच्च सर्तकताका लागि नेपाली जनसम्पर्क समिति र कोरियामा रहेका अन्य नेपाली संघसंस्थालाई आपसी आवश्यक समन्वय गर्न अपिल गरेका छन् ।
उनले नेपाली जनसम्पर्क समितिका अध्यक्षलाई सोमबार पत्रमार्फत सम्पूर्ण नेपालीको सुरक्षामा उच्च सर्तकताका साथ आपसी भाइचारा अभिवृद्धि गर्दै यस्तो घडीमा एकताबद्ध ढंगले समन्वय गर्न अपिल गरेका हुन् । कोरोना भाइरस (कोबिड १९)को संक्रमणले अहिले विश्वका कैयौँ मुलुक प्रभावित रहेका छन् ।
केही दिनयता दक्षिण कोरियासमेतमा कोरोना भाइरसबाट सयौँ संक्रमित भएका र केहिको मृत्युसमेत भइसकेको विवरण सञ्चारमाध्यममार्फत थाहा पाउँदा त्यहाँ रहेका समस्त नेपालीको सुरक्षा संंवेदनशीलताप्रति आफ्नो चासो बढेको उनले उल्लेख गरेका छन् ।
‘नेपाल सरकार र नेपाली दूतावासमार्फत हुनसक्ने आवश्यक सजगता बारे हामी घच्घच्याइ रहेका छौँ, विशेष गरी संक्रमण फैलिएको थेगु शहरमा रहेका नेपालीलाई तत्कालै युद्धस्तरमा सतर्क गराउन तथा कोरियाको अन्य शहरमा पनि विभिन्न पेशा र व्यवसायमा संलग्न, अध्ययनरत विद्यार्थी एवम् श्रममा संलग्न सम्पूर्ण नेपाली बीच आवश्यक सम्पर्क, सूचना सम्प्रेषण र सतर्कताका लागि अपिल गर्दछु’ सभापति देउवाले पत्रमा उल्लेख गरेका छन् ।
यस क्षणमा नेपाली जनसम्पर्क समितिको भूमिका अझ बढी प्रभावकारी रहनु पर्ने अपेक्षा राख्दै उनले कोरियामा रहेका दर्जनौँ नेपाली संघसंस्थालाई आपसी भाइचारा अभिवृद्धि गर्दै यस्तो घडीमा एकतापूर्वक कार्य गर्न आग्रह गरेका छन् ।
