धनगढी–निर्माणाधिन छ लेन सडक आयोजना अन्तरगत निर्माण गरिनुपर्ने तीन वटा पुलको डिपिआर तयार पारिएको छ ।
६ लेन सडक आयोजना कार्यालय अन्र्तगत पर्ने मोहनापुल, सुनिखोला र मनोहरा खोलामा निर्माण हुने पुलको डिपिआर तयार पारिएको मोहनापुल अत्तरिया छ लेन सडक आयोजना कार्यालयले जानकारी दिएको छ । आयोजना प्रमुख होमबहादुर एसीले तीन खोलामा निर्माण हुने पुलको डिपिआर सडक विभागले तयार पारेर पठाएको बताए । डिपिआरका आधारमा अव ती पुलको लागत अनुमान तयार भएपछि ठेक्का प्रक्रिया अघि बढ्ने उनले बताए । उनले छ लेन सडकको काम तिव्र रूपमा अघि बढीरहेको बताए । सडक कालोपत्रे गर्ने कार्य तिव्र रूपमा अघि बढीरहेको जनाइएको छ । तर, पुलको डिपिआर तयार नहँुदा ती कामहरू भने अन्यौलतामा रहेको थियो । प्रमुख होमबहादुरले भने, ‘पुलको काम नभएसम्म सडक बनाएको नी कुनै महत्व राख्दैन् ।’ उनले विभागले भर्खर डिपिआर तयार पारेकोले यसको काम अघि बढाउन बाटो खुलेको बताए । उनले निर्माणाधिन मोहना अत्तरिया ६ लेन सडकको दोस्रो पटक म्याद थप गरिएको जानकारी दिए । उनका अनुसार सार्वजनिक खरिद नियमावलीको नौऔँ संशोधनले निर्माण आयोजनाको म्याद थप्ने बाटो खुला गरेपछि सडक आयोजनाकोे म्याद दोश्रो पटक एक बर्षका लागि थपिएको हो । व्यवसायीले मंसिरदेखी भएको लगातारको बर्षाका कारण काम गर्न समस्या भएको कारण देखाउँदै सडक आयोजनाको दोश्रो म्याद थपका लागि निवेदन दिएका थिए ।
जसलाई विभागले स्वीकृत गरेको ६ लेन सडक आयोजना कार्यालय धनगढीका प्रमुख होमबहादुरले बताए । पहिलो पटक छ महिनाका लागि छ लेन सडक आयोजनाको म्याद थप गरिएको थियो । ‘आठौंँ संशोधनले ६ महिनाका लागि मात्रै म्याद थप गर्ने प्रावधान ल्याएको थियो’ कार्यालय प्रमुख होमबहादुरले भने, ‘निर्माण व्यवसायीले पनि त्यसै अनुसार कामलाई तिब्रता दिएका थिए, तर नौऔँ संशोधनले पुनः म्याद थप गर्न सकिने बाटो खुला गरेपछि व्यवसायीले दिएको दोश्रो म्याद थपको निवेदन एक बर्षका लागि स्वीकृत भएर आएको छ ।’ पहिलो पटक म्याद थप हुँदा ६ लेन सडककको पहिलो खण्ड निर्माण गर्ने ठेक्का पाएको नागार्जुन कन्ट्रक्सनको म्याद २०७६ मंसिर ६ र दोश्रो तथा तेश्रो खण्ड निर्माण गर्ने जिम्मा पाएको राजेन्द्र निर्माण सेवाको म्याद माघ १५ सम्म थपिएको थियो ।
सो समयमा लगातार हिउँदे बर्षा हँुदा व्यवसायीले काम गर्न नसकेको उनीहरूले गुनासो गर्दै आएका थिए ।‘हामीले जेठ मसान्त सम्म जसरी पनि सडकको कालोपत्रे सक्ने गरी काम गर्न व्यवसायीलाई दवाब दिएका थियौँ’ कार्यालय प्रमुख एसीले भने, ‘तर दोश्रो पटक सडकको म्याद थप हँुदा कामको गति प्रभावित हुने देखिएको छ ।’ पहिलो खण्ड (मोहना–बोराडाँडी) सडक निर्माणको जिम्मा पाएको नागार्जुन कन्ट्रक्सनका प्रोप्राइटर इश्वरी भट्टले जेठ भित्रै सडक कालोपत्रे गरि सक्ने गरी सडकको काम अघि बढाइएको बताए ।
दोश्रो तथा तेश्रो सडक खण्ड निर्माणको ठेक्का पाएको राजेन्द्र निर्माण सेवाका प्रमुख कार्यकारी अधिकृत रोशन भट्टले कालोपत्रे बाहेकको सडक निर्माण कार्यलाई पुरा गर्न दोश्रो पटकका लागि म्याद थपको निवेदन दिएको बताए । उनीहरूले जेठभित्रै कालोपत्रेको काम सम्पन्न गरिसक्ने र डिभाइडर, फुटपाथ, सडक पेन्टिङ र सर्विस ट्रयाक लगायतका काम सम्पन्न गर्न म्याद थप गरिएको बताए ।
