काठमाडौं– दक्षिण कोरिया नेपाली युवाका लागि एक आर्कषक गन्तव्य मुलुक हो । तर, अहिले दक्षिण कोरिया आफै ‘कोरोना भाइरस’को संक्रमणबाट आक्रान्त बनेको छ । एक महिनाअघि चीनको वुहानबाट फैलिएको कोरोना विश्वस्तरमा फैलिँदो छ । यसै अवस्था कोरियामा यस संक्रमण तिव्ररुपमा फैलिरहेको छ । जसका कारण नेपाल र नेपालीलाई समेत चिन्तित बनाएको छ ।
दक्षिण कोरियाली सञ्चारमाध्यममा प्रकाशित समाचारहरुका अनुसार सोमबारसम्म कोरोना संक्रमितको संख्या ८ सय नाघिसकेको छ भने ८ जनाको मृत्यु भइसकेको छ । सुरुमा सीमित संख्यामा संक्रमण देखिएकामा केही दिनयता कोरोना भाइरसको संक्रमण तिव्ररुपमा फैलिँदै गएको अवस्था छ ।
बढ्दो संक्रमणसँगै विभिन्न पेशा तथा व्यवसायमा कोरियामा रहेका नेपालीमा अहिले सन्त्रास फैलिएको छ । हाल कोरियामा करिब ८० हजारको संख्यामा नेपाली रहेका छन् । नेपालीको बाहुल्यता रहेको कोरियाको थेगु सहर अहिले बन्दीजस्तै बनेको छ । भाइरस संक्रमण फैलिनेक्रम बढ्दै गएपछि कोरिया सरकारले घरबाट बाहिर ननिस्किन आग्रह गरेको छ । यससँगै नेपाली कामदार समस्यामा परेका छन् ।
यस्तै, रोजगार अनुमति प्रणाली (इपिएस)मार्फत भाषा परीक्षा उत्तीर्ण गरेर कोरिया जाने तयारीमा रहेका युवामा थप अन्योल सिर्जना गरेको छ । कामको सिलसिलामा कोरियामा रहेका नेपालीका अभिभावक चिन्तामा परेका छन् ।
इपिएस प्रणालीबाट कोरिया पठाउनेक्रममा केही सुस्तता आइरहेको बेला कोरोना भाइरसको सन्त्रास फैलिएको हो । कोरिया सरकारले मुलुकमा संक्रमण फैलिएपछि नेपाललगायत विभन्न स्रोत मुलुकबाट कामदार ल्याउने प्रक्रिया तत्कालका लागि रोक्ने तयारीमा छन् । वैदेशिक रोजगार विभागअन्तर्गतको इपिएस कोरिया शाखाले नेपाल ‘पर्ख र हेर’को रणनीतिमा रहेको जनाएको छ ।
‘कोरियामा कोरोनाको संक्रमण फैलिएको कुरालाई हामीले गम्भीरताका साथ लिएका छौँ, इपिएस कोरिया शाखाका निर्देशक कृष्णप्रसाद खनालले भने, ‘तत्कालका लागि कोरिया जानेक्रम केही कम भएको छ, एक÷दुई दिनमा छलफल गरेर थप निष्कर्षमा पुग्ने छौँ ।’
इपिएस प्रणालीबाट कोरिया पुगेका नेपालीको संख्या ६५ हजार बढी रहेको छ । भाषा परीक्षा उत्तीर्ण गरेर कोरिया गएकामध्ये हाल करिब ४० हजार युवा विभिन्न क्षेत्रमा काम गर्दै आएका छन् । विभिन्न पेशा, व्यवसाय तथा अध्ययनका क्रममा कोरियामा रहेका नेपालीको संख्या उच्च रहेको छ । हालसम्म कोरियामा कुनैपनि नेपालीमा कोरोना संक्रमण भएको पुष्टि भएको छैन ।
यसैबीच लामो समयदेखि कोरियामा रहेका पत्रकार प्रकाश पोखरेलले अहिले नै आत्तिहाल्नुपर्ने अवस्था नआएको बताएका छन् । राष्ट्रिय समाचार समितिसँग कुरा गर्दै उनले समाचारमा आएअनुसार आत्तिहाल्नुपर्ने अवस्था नरहेको बताएका छन् । उनले भनेका छन्, ‘कोरिया सरकारले नै थप संक्रमण नफैलियोस् भनेर सावधानी अपनाउन सन्देश प्रवाह गरिरहेको छ ।’
कोरिया सरकारको स्वास्थ्य मन्त्रालय मातहतका निकायमार्फत ‘इमरजेन्सी म्यासेज’ गरिरहेका छन् । नेपाली दूतावासले पनि संक्रमण हुन नदिन विभिन्न सूचना जारी गरेको छ ।
सियोलस्थित नेपाली दूतावासले कोरियामा कार्यरत नेपाली कामदारलाई उच्च सतर्कता अपनाउन यसअघि नै आग्रह गरिसकेको छ । कोरोना भाइरस नियन्त्रण र रोकथामका लागि चालिएका सशक्त प्रयासका बाबजुुद रोगको संक्रमण फैलँदै गएको भन्दै दूतावासले अझबढी सजग र सचेत हुन जरुरी रहेको दूतावासले जनाएको छ ।
कोरिया सरकारले कोरोना भाइरसको संक्रमणको शंका लागेमा अवैधानिकरुपमा बस्दै आएका विदेशीले समेत सार्वजनिक स्वास्थ्य संस्थामा गई जाँच तथा उपचार गराउन र सोको क्रममा पक्राउ नगर्ने कोरिया सरकारले जनाएको छ । कोरियाको अध्यागमन विभागले अवैधानिक रुपमा बसोबास गरिरहेकालाई स्वदेश नफर्काउने तथा बिरामीको कानूनी हैसियतका बारेमा नसोध्न अस्पताललाई निर्देशन दिएको छ । अध्यागमनले प्रवेशाज्ञा मिति समाप्त भएको अवस्थामा समेत थप ५० दिनको प्रवेशाज्ञा थप गर्ने निर्णय गरेको छ ।
नेपाली दूतावासले पनि सक्रियतापूर्वक विभिन्न सचेतनामूलक जानकारी सबै नेपालीमाझ सम्प्रेषण गरिरहेको छ । कोरोना भाइरसको संक्रमणबाट बच्ने उपायका सम्बन्धमा सिओल महानगरपालिकाको कार्यालयबाट प्राप्त जानकारी प्रचार गरिएको दूतावासले जनाएको छ ।
सबैभन्दा बढी संक्रमित देखापरेका कोरियाको थेगु तथा आसपासका क्षेत्रमा रहेका नेपाली विद्यार्थी, अन्य पेशा व्यवसाय र श्रम गरी बसेका नेपालीलाई विशेष सवधानी अपनाउन पनि दूतावासले अनुरोध गरेको छ ।
