काठमाडौं– इजरायलका दीर्घकालीन स्याहार केन्द्रमा रोजगारीका लागि थप २२ जना नेपाली श्रमिकले भिसा पाएका छन् । वैदेशिक रोजगार विभागले शुक्रबार सूचना जारी गरी इजरायल दूतावासको कन्सुलर विभागबाट २२ जनाको भिसासम्बन्धी नामावली प्राप्त भएको जानकारी दिएको हो ।
विभागले उनीहरुलाई इजरायल जानका लागि थप प्रक्रियामा सहभागी हुन आग्रह गरेको छ । भिसा प्राप्त गरेका २२ जनालाई आफ्नो राहदानी बुझ्न आग्रह गरिएको छ । साथै, उडानअनुसार बनाइने भाइबर ग्रुपमा नाम समावेश गराउन र कोभिड–१९ विरुद्धका खोपसम्बन्धी विस्तुत विवरण उल्लेख गर्न वैदेशिक रोजगार कार्यालय ताहाचल इजरायल शाखामा सम्पर्क गर्न अनुरोध गरिएको छ ।
विभागका अनुसार उनीहरुको इजरायलका लागि उडान यही असोज महिनाको चौथो साताभित्र हुनेछ । यसका लागि आफ्नो पासपोर्ट लिई नागपोखरीस्थित सिलिंक होलिडेज प्रालिमा सम्पर्क गर्न आग्रह गरिएको छ ।इजरायलको स्वास्थ्य मन्त्रालयका अनुसार प्रत्येक नेपाली कामदारले उडान गर्नुपूर्व ७२ घण्टाभित्रको कोभिड–१९ को पिसिआर परीक्षण गराउनुपर्नेछ । उक्त परीक्षणमा ‘नेगेटिभ’ आएको अवस्थामा मात्र इजरायलका लागि उडान गर्न पाउने जनाइएको छ । परीक्षणको परिणाम नेगेटिभ वा पोजिटिभ जस्तो आए पनि आउनासाथ सिलिंक होलिडेजलाई जानकारी गराउन सूचनामा भनिएको छ ।
साथै, पूर्ण खोप लगाएको प्रमाणपत्र इमेलमार्फत पठाउन पनि आग्रह गरिएको छ । त्यस्तो प्रमाणपत्र प्रस्थान मितिसम्म १८० दिन ननाघेको हुनुपर्नेसमेत उल्लेख गरिएको छ । यसैगरी श्रम स्वीकृतिका लागि अनलाइन आवेदनमा म्यादी जीवन बिमा गरेको हुनुपर्ने, कल्याणकारी कोषको रकम तिरेको हुनुपर्ने तथा सामाजिक सुरक्षा कोषमा नियमानुसार रकम अनलाइन प्रणालीमार्फत दाखिला गर्नुपर्ने भएकोले सो कार्य तत्काल गर्न पनि विभागले आग्रह गरेको छ ।
(2)1701689216.jpg)
