- सर्बिया, मलेसिया, क्यानडा, टर्की, अमेरिका, बेलायतलगायत देशमा पठाइदिने भनी यसरी रकम ठगी गर्ने गिरो सक्रिय
- मानिसहरू छिटो पैसा कमाउने लोभमा फस्दा लाखौं रकम डुब्ने गरेको पाइएको प्रहरीको भनाइ
- सामाजिक सञ्जालमा आउने भ्रमपूर्ण विज्ञापनको प्रलोभनमा नपर्न विभागको आग्रह
काठमाडौं– केही दिनअघि इन्स्टाग्राममा आकर्षक तलब सुविधामा वैदेशिक रोजगारीका लागि क्यानडा जान कामदार भिसा पाइने भनी नक्कली विज्ञापनमा फसेर एक पीडितले ३४ लाख रुपैयाँ गुमाए । गिरोहले त्यहाँ जानका लागि प्रक्रिया थाल्न ‘आइएलटिएस सर्टिफिकेट’ र बायोडाटा, राहदानी, शैक्षिक योग्यताका प्रमाणपत्र पठाइदिनु भनी पटक–पटक ह्वाट्सएपबाट माग गरे । पीडितले कागजात पठाए ।
काठमाडौं उपत्यका अपराध अनुसन्धान कार्यालयका प्रहरी उरीक्षक रवीन्द्र रेग्मीले भने, ‘उक्त कागजात पेस गर्न रकम तिर्नुपर्छ भनी पीडितबाट नेपालमा रहेका विभिन्न व्यक्तिहरूका नाममा रहेको बैंक खातामा पैसा मागेको पनि भेटियो ।’ उनका अनुसार त्यस घटनामा कास्कीका लक्ष्मण नेपाली र सप्तरीका महावीरप्रसाद साह संलग्न भएको पाइयो । उनीहरू अहिले कानुनी कारबाहीको दायरामा छन् । दुई दिनअघि मात्रै क्यानडा जाने लोभमा पर्दा भूमिराज राईले ११ लाख रुपैयाँ गुमाए । आफू ठगिएको थाहा पाएपछि परेको उजुरीका आधारमा क्यानडा पठाइदिन्छु भनी झण्डै ११ लाख रुपैयाँ ठगी गर्ने व्यक्तिलाई प्रहरीले पक्राउ गरेको छ ।
प्रहरी उपरीक्षक रेग्मीका अनुसार सेक्युरिटी गार्डमा काम लगाइदिने र त्यसबापत मासिक दुई लाख रुपैयाँ तलब हुने लोभ देखाएर ठगी गरिएको थियो । यस्तै घटना पीडित आशामाया लामालाई वैदेशिक रोजगारीका लागि अस्ट्रेलिया पठाइदिन्छु भनी ठगी गरेकी काठमाडौंको सामाखुसी बस्ने ५० वर्षीया केशरी श्रेष्ठ पक्राउ परेकी छन् ।
यी घटनाहरू पछिल्ला एक साताका हुन् । यस्ता घटना दिन प्रतिदिन बढिरहेको प्रहरीको अभिलेखले देखाएको छ । सर्बिया, मलेसिया, क्यानडा, टर्की, अमेरिका, बेलायतलगायत देशमा पठाइदिने भनी यसरी रकम ठगी गर्ने गिरो सक्रिय भइरहेका छन् । वैदेशिक रोजगारीका नाममा सर्वसाधारण नागरिक ठगी हुने क्रम बढेको छ । प्रहरी प्रधान कार्यालयका अनुसार मानिसहरू छिटो पैसा कमाउने लोभमा फस्दा लाखौं रकम डुब्ने गरेको पाइएको हो ।
प्रहरी प्रवक्ता, प्रहरी नायब महानिरीक्षक कुवेर कडायत पछिल्ला समयमा वैैदेशिक रोजगारीका नाममा दैनिकजसो नै मानिसहरू ठगिएका घटनाहरू देखिएको बताउँछन् । उनले यो क्रम विगतका वर्षहरूभन्दा बढ्दो क्रममा रहेको देखिएको बताए । अनलाइन तथा वैदेशिक रोजगारीका नाममा हुने ठगी अत्यधिक रूपमा बढिरहँदा त्यतिकै सुरक्षा चुनौती पनि थपिएको प्रहरीको निष्कर्ष छ । यसतर्फ प्रथमतः नागरिक आफैं सचेत हुनुपर्नेमा जोड दिइएको छ ।
त्यसो त वैदेशिक रोजगार विभागले पनि वैदेशिक रोजगारीका नाममा सामाजिक सञ्जाल तथा विभिन्न माध्यमबाट प्रकाशित भ्रमपूर्ण विज्ञापनको प्रलोभनमा नपर्न सचेत गराउँदै आएको छ । सामाजिक सञ्जालमार्फत विज्ञापन गरी सर्वसाधारणमाथि ठगी गर्ने गिरोह सक्रिय भएपछि विभागले यस्तो आग्रह गर्दै आएको छ । तर, ठगीको क्रम भने रोकिएको छैन । हरेक दिनजसो वैदेशिक रोजगारीका नाममा ठगिएका घटना सार्वजनिक हुँदै आएको छ ।
वैदेशिक रोजगार व्यवसाय सञ्चालनका लागि अनुमतिप्राप्त कतिपय म्यानपावर कम्पनीहरुसमेत यस्तो अवैध कार्यमा संलग्न रहेको पाइएको छ । त्यस्ता कम्पनीमाथि विभागले कारबाहीसमेत गरेको छ । मुलुकमा रोजगारीको पर्याप्त अवसर नहुँदा युवाहरु रोजगारीका लागि विदेशिनुपर्ने बाध्यता छ । त्यही बाध्यताको लाभ अवैध मानव तस्करमा संलग्न गिरोहले लिँदै आएको देखिन्छ । यसलाई नियन्त्रणका लागि सरकारले थप प्रभावकारी कदम चाल्नुपर्ने सरोकारवालाहरुको भनाइ छ ।
