काठमाडौं–सत्तारुढ दल नेपाल कम्युनिष्ट पार्टी (नेकपा) का संसदीय दलका प्रमुख सचेतक देवप्रसाद गुरुङले गोकुलप्रसाद बाँस्कोटाको अडियो प्रकरणले गम्भिर अवस्था ल्याएको भन्दै यसलाई दुःखद परिघट्नाको रूपमा चित्रण गरे ।
शनिबार आयोजना गरेको साक्षात्कारमा बोल्दै प्रमुख सचेतक गुरुङले बाँस्कोटाको अडियो प्रकरणमात्रै अहिले बाहिर आएकोले यत्तिकै आधारमा कति दोषी हो ? भनेर एकिनका साथ भन्न नसकिने स्पष्ट पारे । उनले भने,‘तर, आशंकाका संकेतहरू देखिएका छन् ।’
सेक्युरिटी प्रिन्टिङ प्रेस जिटुजी अर्थात सरकार–सरकारबीच सम्झौता गरेर त्योसम्बन्धी खरिद गर्ने कुरा बुझिएको सुनाउँदै गुरुङले सरकारले ग्लोबल टेण्डरबिना कुनै कम्पनीसँग मात्रै सम्झौता गरेर खरिद गर्ने प्रक्रिया कति उपयुक्त वा अनुपयुक्त भन्दै यो नीतिगत रूपमा पनि पूर्नविचारको विषय भएको बताए ।
नीतिगत कुरा संसदीय समितिले हेर्ने र निवर्तमान मन्त्री बाँस्कोटाबाट कति गल्ती वा भ्रष्टाचार भएको हो या होईन भन्ने कुरा चाहीँ कानूनी रूपमा हेर्ने वा छानबिन हुनुपर्ने उनको भनाई छ । गुरुङले एमसीसीको विषयमा टिप्पणी गर्दै नेपालले आर्थिक सहायता लिने दिने यो चलिरहने प्रक्रिया भएको बताए । तर, एमसीसीमा गलत शर्तहरू थुपारिएको उनको भनाई छ । उनले विभिन्न दस्तावेज र अमेरिकी अधिकारीहरूको भनाईले पनि एमसीसी चाहीँ ईण्डो प्यासिफिक स्ट्राटेजीकै अंग भएको कुरा पुष्टि गरेको सुनाए ।
एमसीसीबारे नेकपाले कार्यदल गठन गरेर गम्भिर रूपमा छलफल गरेर रिपोर्ट तयार पारेर पार्टी नेतृत्वलाई प्रतिवेदनसमेत बुझाएको उनले जनाए । उक्त सम्झौताबारे पार्टीले आवश्यक परिमार्जन गरेर नै अघि बढ्ने उनको भनाई छ । यसबारेमा पार्टीले उपयुक्त समयमा उपयुक्त ढंगले निर्णय गर्नेछ भन्नेमा आफू विश्वस्त रहेको उनको भनाई छ । राष्ट्रिय प्रजातन्त्र पार्टी (संयुक्त) का अध्यक्ष डा. प्रकाशचन्द्र लोहनीले प्रधानमन्त्री केपी शर्मा ओलीबाट नै प्रशंसा पाएका मन्त्री गोकुल प्रसाद बाँस्कोटा (राजीनामा दिएका) को कमिशनको अडियो प्रकरण आएपछि यो सरकारको चरित्र के हो ? भन्ने कुरा प्रष्ट भएको टिप्पणी गरे ।
उनले कमिशनको यो अडियो प्रकरणभन्दा अघि पनि यति काण्ड, सुन काण्ड, एनसेल काण्ड, न्यारोबडी काण्ड, वाईडबडी काण्ड भए, ती सबै काण्ड नेपालको प्रेस जगत (मिडिया) ले बाहिर निकालेको छ, तर, त्यसलाई एउटा लजिकल कन्क्लुजनमा लैजाने कुरामा यो सरकार तयार देखिएन । संसदमा प्रतिपक्ष छ, तर प्रतिपक्ष पनि धेरै भलाद्यमी भएको छ । उहाँहरू चाहीँ जे आएपनि नमस्कार नै गरेर बस्ने स्थितिमा पुगेको बताए ।
उनले बाँस्कोटाको ७० करोड कमिशनको टेप प्रकरण सुन्दा अझै एक अर्ब बढाईदेउन भनेर सुनिएको पनि बताए । लोहनीले हिजो सामन्ती व्यवस्थामा जसरी शोषण गरिएको थियो अहिले प्रजातन्त्रको वैधानिकता लिएर शोषण गरिएको टिप्पणी गरे । उनले यो प्रकरणमा अब हुने छानबिनमा प्रधानमन्त्री केपी शर्मा ओलीले पनि बोल्नुपर्ने माग गरे । अध्यक्ष लोहनीले यो प्रकरणको निश्पक्ष छानबिन हुनुपर्ने बताउँदै संसदीय समितिबाट छानबिन हुनुपर्ने आफूहरूको सुझाव रहेको सुनाए । यो प्रकरणमा संसदीय समितिले गठन गरेको छानबिनमा गएर आफ्नो कुरा राख्नुपर्ने उनको तर्क छ । उनले गोकुल बाँस्कोटालाई आफूले कुनै महत्वको मान्छे नै नभएको चित्रण गरे ।
लोहनीले वर्तमान सरकारले यो दुई वर्षमा ल्याएको बजेट नै असफल भएको दाबी गरे । सरकारले एक वर्षसम्मपनि भनेको कुरा पुर्याउन नसकेको उनको आरोप छ । उनले मुलुकमा रोजगारी र उत्पादकत्व नबढेको पनि गुनासो पोखे । उनले हरेक तहमा अहिले भ्रष्टाचारको विकेन्द्रीकरण भएको पनि आरोप लगाए ।
उनले अमेरिकी सहयोग एमसीसीको सवालमा नेपालले ऋण, सहयोग वा अनुदान लिन सक्ने भएपनि शर्तहरू हेर्नुपर्ने सुझाव दिए । एमसीसीको सम्झौताका १४ बुँदाहरू अर्थमन्त्रालयबाट भएको र यो कुरा परराष्ट्र मन्त्रालयलाई थाहा नभएको भन्ने कुरा पनि बाहिर आएको सुनाउँदै यसलाई दुःखद अवस्था भनेर उनले चित्रण गरे ।
