काठमाडौं – धार्मिक तथा ऐतिहासिक महत्व एवं प्रचुरमात्रामा पर्यटनको सम्भावना बोकेको प्रसिद्ध जगन्नाथ मन्दिर परिसरमा बूढानीलकण्ठ नगरपालिका–८ हात्तिगौंडामा ३६५ दिनसम्म हवन र निःशुल्क भोजन खुवाउने (भण्डारा) कार्यक्रम सुरू भएको छ । बूढानीलकण्ठ नगरपालिकाका प्रमुख उद्धवप्रसाद खरेलको प्रमुख आतिथ्यतामा शनिबार सम्पन्न एक कार्यक्रममा उक्त जानकारी दिइएको थियो ।
जगन्नाथ क्षेत्र संरक्षण समितिका अध्यक्ष रविन अधिकारीको अध्यक्षतामा मन्दिर परिसरमा नै सम्पन्न कार्यक्रममा श्री १००८ जगदगुरु हिमालय बाबाजी (यतिराज उपाध्याय)लाई प्रमुख संरक्षकको रूपमा नियुक्त समेत गरिएको छ । महन्त–पीठाधीपति एवं जगन्नाथ मन्दीरका प्रमुख संरक्षक जगद्गुरु हिमालय बाबाले पनि सम्बोधन गरेका थिए ।
उक्त अवसरमा जगतगुरुले भने, ‘हामी यस धर्तिका पाहुना हौँ, यस पवित्र धर्ती अस्थायी घर हो त्यसैले यहाँ रहुन्जेलसम्म धर्मकर्मकै माध्यमबाट दीनदुःखीलाई सहयोग गर्नु मानवजातीको कर्तव्य हुन्छ ।’ उनले विश्वका ३३ कोटी देवतामध्ये २२ करोड देवताहरू नेपालको भूमिमा रहेकोले नेपाल धार्मिक दृष्टिकोणले ज्यादै उत्कृष्ट एवं दैविक शक्तिको लागि अनुपम उपहार भएको बताए ।
जगन्नाथ मन्दीरको जीर्णोद्वार गरी प्राणस्थापनाका लागि शनिबार विशेष पूजा र हवनसमेत गरिएको थियो । कार्यक्रममा समाजसेवी श्यामप्रसाद पाण्डेयले धार्मिक पर्यटकका रूपमा यस क्षेत्रलाई चिनाउनु पर्नेमा जोड दिए । उनले सो क्षेत्रको विकास गरी देशको पर्यटकीय क्षेत्रको विकासमा केही हदसम्म सहयोग पुग्ने समेत बताए । उनले आफूहरू यस पवित्र कार्यमा आफूहरू पनि सहभागी हुन पाउनु भाग्यशाली ठान्दै शनिबारदेखि नै सुरु भएको भण्डाराको पहिलो दिनको प्रसादका लागि आफूले दान गर्न पाउनुमा आफूलाई गौरव लागेको बताए ।
कार्यक्रममा बोल्दै नगरप्रमुख एवं प्रमुख अतिथि खरेलले बूढानीलकण्ठ नगरपालिकालाई देशकै नमूना नगरपालिकाको रूपमा विकास गर्न लागि परेको बताए । उनले नगरपालिकाले आफ्नो क्षेत्रभित्र रहेका सरकारी जग्गालाई प्रयोग ल्याई विकासका पूर्वाधारहरू थप्दै लैजाने कार्यक्रम अनुसार जगन्नाथ मन्दिरमा पछिल्लो समय विभिन्न पूर्वाधारहरू निर्माण गरिने बताए । उनले नगरपालिका क्षेत्रभित्रका सरकारी जग्गालाई नियन्त्रणमा लिई यस आकर्षक पार्क निर्माण गर्न लागेको बताए । उनले मन्दिरका लागि आवश्यक पर्ने सम्पूर्ण सहयोग गर्न नगरपालिका तयार भएको बताए ।
मन्दिर परिसरमा महिला पुरुषको छुट्टाछुट्टै कोठासहितको शौचालय निर्माण गर्नुका साथै मन्दिर जानका लागि प्रवेशद्वार, सुरक्षा गर्न मन्दिर वरिपरी घेराबार तथा हराभरा बनाउन विविध प्रकारका विरुवाहरू रोपेर वृक्षारोपण गरिएको जगन्नाथ मन्दिर क्षेत्र संरक्षण समितिका अध्यक्ष रविन अधिकारीले बताए ।
मन्दिर दर्शन र पुजाअर्चना गर्न आउने श्रद्धालु भक्तजनहरूको सेवा सुविधाका लागि आवश्यक भौतिक संरचना निर्माणको कार्यलाई जोड दिइएको उनले जानकारी दिएका छन् । धार्मिक मठमन्दिरको संरक्षण गरी पर्यटन प्रवद्र्धन गर्ने उद्देश्यसहित जगन्नाथ मन्दिरसहित पर्यटन कार्यक्रम लागू गरिएको अध्यक्ष अधिकारीले बताए । जगन्नाथ मन्दिर दर्शनका लागि आउने भक्तजन तथा दर्शनार्थीलाई लक्षित गर्दै भौतिक पूर्वाधारमा जोड दिइएको पनि अधिकारीले बताए ।
प्रा.डा. रामप्रसाद उप्रेतीले स्वागत मन्तव्य राखेको कार्यक्रममा वडा नं. ८ का वडाध्यक्ष सुमन तामाङ, समाजसेजी पदम पाण्डेलगायतले बोलेका थिए । कार्यक्रममा सहभागी भक्तालुहरूले भण्डारा प्रयोजनका लागि चामल, दाल, तेल, चिनी, नुनलगायत विभिन्न सामाग्रीहरूको सहयोगका साथ दानहरूको घोषणा गरेका थिए । कार्यक्रममा रेशम सापकोटासहितको टोलीले विभिन्न धार्मिक भजनहरूले मनोरञ्जन समेत प्रदान गरेका थिए ।
