काठमाडौं– बियोण्ड बेइजिङ कमिटी (बिबिसी) नेपालले युवाहरुलाई समेट्दै ‘युथ फेस्टिभल’ सम्पन्न गरेको छ । युवाहरुलाई एक ठाउँमा जोड्दै उनीहरुको सिकाइ अनुभव आदानप्रदान गर्ने उद्देश्यले उक्त कार्यक्रम आयोजना गरेको हो ।
युथ फेस्टिभल कार्यक्रममा सहभागीहरु
सबै युवाहरुलाई एक ठाउँमा जोड्दै एक अर्काको सिकाइ अनुभव साटासाट गर्ने र अभिप्रेरित गर्ने उद्देश्यका साथ कार्यक्रम आयोजना गरिएको आयोजकले जानकारी दिएको छ । अन्तर्राष्ट्रिय युवा दिवसको सन्दर्भमा सोमबार राजधानीमा आयोजित कार्यक्रममा विभिन्न क्षेत्रका युवाहरुले आ–आफ्ना अनुभव प्रस्तुत गरेका थिए ।
विभिन्न संघसंस्थाका युवाहरु युथ फेस्टिभलमा सहभागीहरु तस्विर: दीपा/ प्रभाव
कार्यक्रममा स्वागत मन्तव्य राख्दै बिबिसीकी बोर्ड सदस्य सुष्मा श्रेष्ठले बिबिसीले स्थापनाकालबाटै युवाहरुमाझ काम गर्दै आएको बताइन् । युवाहरुबीच रहेको लैंगिक तथा विभिन्न विभेद अन्त्य गर्ने लक्ष्यका साथ कार्यक्रम तय गरिएको उनले बताइन् । ‘केही समययता रोजगार र पढाइको सिलसिलामा युवाहरु विदेश पलायन हुने प्रवृत्ति बढेको छ । यो प्रवृत्ति रोकेर स्वदेशमै रोजगारमूलक अभियानमा जोडिनु आजको आवश्यकता हो,’ श्रेष्ठले भनिन् ।
युथ फेस्टिभलमा राखिएका स्टलहरुमा अवलाेकन गर्दै सहभागीहरु तस्विर: दीपा/ प्रभाव
एक सय जनाभन्दा बढी युवाहरु सहभागी उक्त कार्यक्रममा ब्लु डाइमण्ड सोसाइटीका युवाहरुले नृत्य नाटक प्रस्तुत गरेका थिए । त्यस्तै छोरीको कथामा आधारित लघु चलचित्र ‘डटर’ अर्थात् छोरी पनि प्रदर्शन गरियो । लैंगिक असमानता र भेदभावको सेरोफेरोमा आधारित उक्त चलचित्र मिडिया पोर्टले निर्माण गरेको थियो ।
ब्रेल लिपीका बारेका बटम थिचेर बुझाउँदै निर श्रेष्ठ तस्विर: दीपा/ प्रभाव
यसैगरी बिबिसीले सांकेतिक भाषामा तयार गरेको महिनावारी हुँदा प्रयोग गर्ने सामग्रीबारे जनचेतनामूलक भिडियोसमेत सार्वजनिक गरियो । कार्यक्रममा विपना श्रेष्ठले युथ इ–लर्निङ कोर्सबारे जानकारी दिइन् । प्रजनन स्वास्थ्य अधिकारका क्षेत्रमा कर्णाली प्रदेशमा कार्यरत अजबबहादुर शाहीले आफ्नो अनुभव राखेका थिए । आरएचआएनका संयोजक राजेन्द्र महर्जनले पनि आफ्नो अनुभव सुनाएका थिए ।
लाइभ चित्रकला गर्दै अनुभव लेख्दै सहभागी युवायुवतीहरु तस्विर: दीपा/ प्रभाव
कार्यक्रममा विभिन्न स्टलहरु पनि राखिएको थियो । सहभागी युवाहरुले सो स्टलहरुले अवलोकन गरे । फेस पेन्ट, लाइभ चित्रकला पनि कोरेर युवाहरु रमाइरहेका थिए । यसैगरी विभिन्न बौद्धिक खेल ,ब्रेल लेखन जस्ता खेलहरु पनि समावेश थिए ।
ब्रेल लिपी लेख्दै र सिकाउँदै युवाहरु तस्विर: दीपा/ प्रभाव
यस संस्थाहरुसँग सहकार्य गरी विभिन्न कार्यक्रममा खिचिएका फोटोहरु प्रदर्शन पनि गरिएको थियो । कार्यक्रममा सहकार्य गर्ने संघसंस्थालाई मायाका चिनो स्वरुप फूलको गमलामार्फत सम्मान गरिएको थियो ।
सम्मान स्वरुप उपहारका रुपमा फूलकाे गमला दिँदै तस्विर: युनिस राई/ प्रभाव
