काठमाडौं – सरकारले वैदेशिक रोजगारीमा गएका नेपाली श्रमिकका सन्ततीलाई पढ्दा पढ्दै कमाउने कार्यक्रम सञ्चालन गर्ने भएको छ । वैदेशिक रोजगार बोर्डको सचिवालयले चालु आर्थिक वर्ष २०८०/८१ मा रोजगारीका लागि विदेशिका श्रमिकहरुका सन्ततीलाई पढ्दै कमाउँदै कार्यक्रम सञ्चालन गर्न लागेको हो ।
वैदेशिक रोजगारीमा रहेका श्रमिकका छोराछोरीलाई स्कुलहरूसँगको समन्वयमा स्थानीयस्तरमा उपयुक्त कामको खोजी गरी उनीहरुलाई पढ्दापढ्दै कमाउने वातावरण निर्माण गर्न लागिएको बोर्डले जनाएको छ । ‘उनीहरुलाई उपयुक्त हुने काम के हुन सक्छ ? यसको समन्वय र सहकार्यका लागि विद्यालय र सहकारीमार्फत अघि बढ्ने योजना बनाएका छौं,’ बोर्डका कार्यकारी निर्देशक डा. द्वारिका उप्रेतीले भने, ‘यो कार्यक्रम पहिलो चरणमा मधेस प्रदेशबाट सञ्चालन गर्न लागिएको हुँदा यसका लागि अध्ययन टोली गठन गरेर छिट्टै नै कार्यान्वयनमा जाने तयारी गरिरहेका छौं ।’
मधेस प्रदेशमा सबैभन्दा बढी वैदेशिक रोजगारीमा गएका श्रमिकहरुको जिल्ला छनोट गरी स्थानीय तहमा कार्यक्रम सञ्चालन गरिने कार्यकारी निर्देशक उप्रेतीले जानकारी दिए । उनका अनुसार नमूना परीक्षणको रुपमा एउटा जिल्लामा दुई वा तीनवटा स्थानीय तहलाई छनोट गरी कार्यक्रम सञ्चालन गरिनेछ ।
‘विद्यालय तथा सहकारी वा सरोकारवाला निकायसँग समन्वय गरी विद्यार्थीलाई समुदाय तरमा काम सिकाउने र उनीहरुको सीप प्रयोग गरेबापत बोर्डले रकम उपलब्ध गराउनेछ,’ उनले भने, ‘यसबाट विदेशिएका श्रमिकका सन्तानलाई थोरै भए पनि आर्थिक सहायता पुग्ने विश्वास लिएका छौं ।’ पढ्दै कामाउँदै शीर्षकअन्तर्गत यकीन रकम नतोकिए पनि एक जना विद्यार्थी बराबर १०÷११ हजार रुपैयाँ खर्च हुने बोर्डले अनुमान गरेको छ ।
बोर्डले चालु आवमा विभिन्न नयाँ कार्यक्रमहरू सञ्चालन गर्ने योजना बनाए पनि सार्वजनिक गरिसकेको छैन । तर, योजनाहरुमा वैदेशिक रोजगारीका क्रममा विभिन्न कारणले अंगभंग भएर फर्किएका श्रमिकहरूलाई आवश्यकताअनुसार ह्विलचियरदेखि कृत्रिम हातखुट्टालगायतका सामग्रीसमेत सहयोग गर्ने बताइएको छ ।
यस्तै बोर्डले वैदेशिक रोजगारीमा रहेका श्रमिकसहित उनीहरूका परिवारका सदस्यलाई मनोपरामर्श प्रदान गर्न तथा समाजमा पुनःस्थापना गराउन मनोपरामर्शदाता नियुक्त गर्ने जनाएको छ । यसैगरी सञ्चालनमा रहेको टेलिमेडिसिन सेवालाई प्रभावकारी बनाउन यसै वर्षदेखि विभिन्न श्रम गन्तव्य मुलुकमा विशेषज्ञ डाक्टरहरूको टोली पठाएर निःशुल्क स्वास्थ्य शिविर सञ्चालन गर्ने बोर्डले उल्लेख गरेको छ ।
-1745656903.jpeg)