काठमाडौं– पछिल्लो समय नेपालीहरुका लागि युरोपेली मुलुक आकर्षक श्रम गन्तव्यको रुपमा परिणत हुँदै गएको छ । नेपाल सरकारले विभिन्न १०८ मुलुकसँगै युरोपमा पनि रोजगारीका लागि खुला गरेपछि ती मुलुकमा नेपालीहरु जानेक्रम बढेको हो ।
एक दशकअघिसम्म रोजगारीका लागि युरोपेली मुलुक जानु नेपालीहरुका लागि सपनाजस्तै भए पनि पछिल्लो समय सहज हुँदै गएको पाइएको छ । पछिल्ला केही वर्षहरुबाट रोजगारीका लागि श्रम स्वीकृति लिएर युरोपेली मुलुक जाने नेपालीको संख्या बढ्दै गएको वैदेशिक रोजगार विभागको तथ्यांकमा देखिन्छ ।
विभागले सार्वजनिक गरेको तथ्यांकअनुसार आर्थिक वर्ष २०७९/८० मा युरोपका आठवटा मुलुकमामात्रै ४२ हजार ३२६ जना नेपाली रोजगारीका लागि गएका छन् ।नेपालीहरुले रोमानिया, क्रोएसिया, साइप्रस, पोल्याण्ड, पोर्चुगल, माल्टा, सर्विया र बेलायतलाई प्रमुख श्रम गन्तव्य बनाएका छन् । यीबाहेक जर्मनी, आयरल्याण्ड, नेदरल्याण्ड, लात्भिया, रसिया, फ्रान्स, स्वीडेन, स्पेनलगायतका युरोपेली मुलुकमा पनि नेपालीहरु श्रम स्वीकृति लिएर काम गर्न पुगेका छन् ।
गत आवमा युरोपेली मुलुकहरुमध्ये सबैभन्दा बढी रोमानिया पुगेका छन् । विभागले सार्वजनिक गरेको तथ्यांकअनुसार रोमानिया जान १४ हजार २२५ जनाले श्रम स्वीकृति लिएका छन् । जसमा एक हजार ७७३ जना महिला रहेका छन् । केही वर्षयता रोमानिया नेपालीहरुको आकर्षक श्रम गन्तव्य बन्दै आएको छ । रोमानिया जाने श्रमिकको संख्या उल्लेख्य रुपमा बढ्न थालेपछि नेपाल सरकारले गत वर्षबाट काठमाडौंमा अस्थायी रोमानियन मिसन स्थापना गरी भिसालगायतका गतिविधिमा सहजीकरण गरिरहेको छ । अघिल्लो आर्थिक वर्ष २०७८/७९ मा सात हजार ४७५ जना नेपाली रोमानिया पुगेको भए पनि पछिल्लो वर्ष दोब्बर संख्याले वृद्धि भएको छ ।
त्यस्तै आर्थिक वर्ष २०७९/८० मा लागि ५२९ महिलासहित सात हजार ४४१ जनाले श्रम स्वीकृति क्रोएसिया पुगेको विभागको तथ्यांक छ । यो संख्या अघिल्लो आवको भन्दा दुई हजारले बढी हो । अघिल्लो आवमा पाँच हजार ३३४ जना रोजगारीका लागि क्रोएसिया पुगेका थिए । त्यस्तै अर्को युरोपेली मुलुक साइप्रसमा पाँच हजार ३१७ जना नेपाली श्रम स्वीकृति लिएर पुगेका छन् । जसमा चार हजार ३४६ महिला रहेका छन् । घरेलु श्रमका लागि खुला भएका कारण साइप्रस जाने महिलाको संख्या बढी देखिएको छ । अघिल्लो आवमा साइप्रस जान चार हजार १८१ जना नेपालीले श्रम स्वीकृति लिएको विभागको तथ्यांकमा उल्लेख छ ।
यस्तै पोल्याण्ड जाने नेपालीको संख्यामा पनि उल्लेख्य वृद्धि भएको छ । आव २०७८/७९ मा एक हजार ८५५ जनामात्रै पोल्याण्ड पुगेकामा पछिल्लो आवमा पाँच हजार ११२ जनाले श्रम स्वीकृति लिएको देखिन्छ । त्यसैगरी माल्टा जाने नेपालीको संख्या पनि बढ्दो छ । आर्थिक वर्ष २०७९/८० मा छ हजार ३०३ जनाले माल्टा जान श्रम स्वीकृति लिएका छन् । जसमा एक हजार ७३५ जना महिला रहेका छन् । अघिल्लो आवमा एक हजार ९१५ जनालेमात्रै माल्टा जान श्रम स्वीकृति लिएका थिए ।
त्यस्तै आव २०७९/८० मा रोजगारीका लागि बेलायत जान दुई हजार २६४ जनाले श्रम स्वीकृति लिएका छन् । अघिल्लो आवमा दुई हजार ८१४ जना बेलायत पुगेका थिए ।
त्यसैगरी सर्बियाका लागि ९६२ जनाले श्रम स्वीकृति लिएका छन् भने नेपालीहरुको रोजाइमा पर्दै आएको पोर्चुगलमा ७३२ जना पुगेका छन् । अघिल्लो आवमा जम्मा ७९ जनाले मात्रै पोर्चुगल जान श्रम स्वीकृति लिएका थिए ।
पछिल्लो समय युरोपेली मुलुकमा नेपालीहरुको आकर्षण बढ्दै गएपछि युरोपलाई रोजगार गन्तव्यको रुपमा केन्द्रित गर्ने नेपाल सरकारले नीति लिएको छ । श्रम, रोजगार तथा समाजिक सुरक्षामन्त्री शरतसिंह भण्डारीले मलेसिया र खाडी मुलुकको विकल्पमा युरोपलाई श्रम गन्तव्य बनाउन जोड दिएका छन् । साथै वैदेशिक रोजगार व्यवसायीहरुले पनि युरोपलाई नयाँ गन्तव्यको रुपमा प्रवद्र्धन गर्न यही वर्षको अन्त्यतिर युरोपमा रोजगार मेलाको आयोजना गर्ने तयारी गरिरहेका छन् ।
आव २०७९/८० मा रोजगारीका लागि नेपाली पुगेका युरोपेली मुलुक र संख्या
रोमानिया: १४,२२५
क्रोएसिया: ७,४४१
माल्टा: ६,३०३
साइप्रस: ५,३१७
पोल्याण्ड: ५,११२
बेलायत: २,२६४
सर्बिया: ९६२
पोर्चुगल: ७३२
