काठमाडौं - एनिमेसन प्रविधिबाट तयार पारिएको चलचित्र ‘सलिना’को टिजर सार्वजनिक भएको छ । रेनमेकर एनिमेसन एकेडेमीले विगत पाँच वर्षदेखि निर्माण गर्न थालेको चलचित्रको टिजर शुक्रबार सार्वजनिक गरिएको हो ।
चलचित्रका सम्पादक शिव पुरीले ‘सलिना’लाई नेपालकै पहिलो एनिमेटेड चलचित्र भएको दाबी गरेका छन् । “हामीले चलचित्र दर्ता गरेर सेन्सर पनि पाइसक्यौं,” पुरीले भने, “अहिलेसम्म कुनै पनि एनिमेटेड चलचित्र दर्ता नभएकाले ‘सलिन’ नै पहिलो बनेको छ ।”
यो चलचित्र नेपाली भाषामा पूर्ण रूपमा तयार भइसकेको छ भने हिन्दी र अङ्ग्रेजी भाषामा डबिङको तयारी भइरहेको छ । दशैँसम्म सिनेमा हलमा प्रदर्शनीमा ल्याउने तयारी भइरहेको पुरीले जानकारी दिए । यो चलचित्रलाई तेजस राज जोशीले निर्देशन गरेका छन् । त्यस्तै निर्माताको रूपमा तेजस राज जोशी र श्रुति श्रेष्ठ रहेका छन् ।
चलचित्रलाई शिव पुरी र श्रुति श्रेष्ठले संयुक्त रूपमा सम्पादन गरेका छन् । त्यस्तै चलचित्रको ग्राफिक डिजाइनिङ सगिन महर्जन, अविनाश सिंह थारु र शिरभा मानन्धरले गरेका छन् । पुरीका अनुसार चलचित्र दन्त्य कथामा आधारित छ । जहाँ राजकुमारी सलिना मुख्य पात्र छिन् ।
उनी अरू पात्रहरूसँग मिलेर सबैभन्दा ठूलो राक्षसलाई हराउने अभियानमा यात्रा सुरु गर्छिन् र यसैको सेरोफेरोमा चलचित्रको कथा अगाडि बढ्छ । सानो टिमले पाँच वर्ष लगाएर यो चलचित्र तयार पारेको पुरीले बताए ।
“हामीले आफूले तयार पारेको यो पहिलो चलचित्र भएकाले पहिले धेरै समय लाग्यो,” पुरीले भने, “विस्तारै सिक्दै चलचित्रलाई सुधार्दै लग्यौं । र, अहिले चलचित्र सार्वजनिक हुने तयारीमा छ ।”
एनिमेटेड चलचित्र त्यसैमा दन्त्य कथामा आधारित भएको भनेपछि बालबालिकालाई लक्षित गरिएको हो कि भन्नेमा पुरीले भने, “सुरुमा बालबालिकालाई लक्षित गरेको जस्तो लाग्छ । तर, विस्तारै सबै उमेर समूहका दर्शकले चलचित्र आफ्नै लागि बनेको आभास गर्नेछन् ।”
-1752335779.jpg)
