रुकुम पश्चिम - रुकुम पश्चिमको आठबीसकोट नगरपालिकाबाटै नापी र मालपोत सेवा प्रवाह हुने भएको छ । गत वर्ष उद्घाटन भई कर्मचारी र बजेट व्यवस्थापन नभएकाले सेवा अवरुद्ध भएकाे आठबीसकोटकाे नापी र मालपोत कार्यालयले सेवा प्रवाह हुने भएकाे हाे ।
गत वर्ष असोज ९ गते आठबीसकोटको राडीमा नापी कार्यालय र मालपोत कार्यालय उद्घाटन गरिएको थियो । उद्घाटन भएको एक वर्षपछि सेवा प्रवाह हुन लागेको नगर प्रमुख रबि केसीले जानकारी दिए । उनका अनुसार कार्यालयको काम संचालन गर्ने अख्तियारी सहित विभागबाट कार्यालय प्रमुख तोकिएका छन् । यसअघि पनि कार्यालय प्रमुख तोकिएको थियो । तर कामको अख्तियारी भने दिइएको थिएन ।
अहिले नापी कार्यालय प्रमुखका रुपमा मानबहादुर आग्री र मालपोत कार्यालय प्रमुखका लागि बिमल आचार्यलाई जिम्मेवारी तोकिएको नगर प्रमुख केसीले बताउनुभयो । बाँकी कर्मचारी व्यवस्थापनको काम समेत भइरहेको छ । बजेट अभाव र कर्मचारी अभावका कारण उद्घाटन भएको एक वर्षसम्म पनि सेवा सुरु हुन नसकेकामा अब भने सेवा सुचारु गर्ने गरी तयारी भइरहेको उनको भनाई छ ।
यसका लागि आवश्यक बजेट व्यवस्थापन समेत भइसकेको उनले बताए । साउन अन्तिम वा भदौ पहिलो साता देखि सेवा सुरु गर्ने गरी तयारी भइरहेको उनले बताए । मालपोत र नापीको सेवा नगरबाटै दिने गरी आठबीसकोटमै नापी र मालपोत कार्यालय स्थापना गरिएको थियो ।
सदरमुकामबाट टाढा भएका कारण त्यहाँका नागरिकलाई सदरमुकामसम्म पुगेर सेवा लिदा समय र पैसा धेरै खर्च हुने भएकोले सहज र सुलभ रुपमा सेवा प्रवाह गर्ने उदेश्य राखिएको नगर प्रमुख केसीले बताए । आठबीसकोटबाटै नापी र मालपोतको सेवा आरम्भ भएमा नगरवासीलाई समय र पैसा बचत हुने तथा सेवाका लागि झन्झट व्यहोर्नु नपर्ने विश्वास गरिएको छ ।
