काठमाडौं– अहमदिया संघ नेपाल र ह्युम्यानिटी फर्स्ट इन्टरनेसनलले नुवाकोट र धादिङका बाढीप्रभावित क्षेत्रमा साताव्यापी राहत वितरण तथा स्वास्थ्य शिविर कार्यक्रम सम्पन्न गरेका छन्।
यही भदौ १८ देखि २५ गतेसम्म सञ्चालित उक्त कार्यक्रमबाट सयौं पीडित परिवार लाभान्वित भएका अहमदिया संघले जानकारी दिएको छ।
कार्यक्रमअन्तर्गत नुवाकोटको विदुर नगरपालिकास्थित त्रिशूली बजार, ढुंगे र देवीघाटका साथै धादिङको गल्छी र गजुरीमा खाद्य सामग्री, घरायसी सामान र मेडिकल किटहरू वितरण गरिएको छ।
संघले प्रभावित क्षेत्रहरूमा २०० परिवारका लागि खाद्यान्न सामग्री, घरायसी सामग्री र मेडिकल किट वितरण गरिएको जनाएको छ।
राहत सामग्री वितरणका अलावा धादिङको गल्छीमा एकदिने होमियोप्याथिक र एकदिने सामान्य एलोपेथिक स्वास्थ्य शिविर सञ्चालन गरिएको थियो। त्यस्तै, गजुरीमा एक दिने भोजन वितरण शिविर र नुवाकोटको त्रिशूली बजार तथा ढुंगे क्षेत्रमा अहमदिया संघका युवाहरूले दुई दिन श्रमदान गरी बाढीप्रभावित घर र बाटोहरूको सरसफाइ गरेका थिए।
राहत कार्यक्रमकै अवसरमा आयोजक संस्थाहरूका तर्फबाट प्रधानमन्त्री राहत कोषमा छ लाख रुपैयाँ जम्मा गरिएको पनि संघले जानकारी दिएको छ। उक्त रकमबराबरको चेक अर्थमन्त्री डा. स्वर्णिम वाग्लेलाई हस्तान्तरण गरिएको हो।
धादिङमा आयोजित कार्यक्रममा राष्ट्रिय स्वतन्त्र पार्टी (रास्वपा)की सांसद आशिका तामाङ, प्रहरी कार्यालय गजुरीका डिएसपी सुरज कार्की तथा स्थानीय जनप्रतिनिधिहरुको सहभागिता रहेको थियो।
उक्त राहत अभियान अहमदिया संघ नेपालका अध्यक्ष कमरुल होदा, निर्देशक मुईन अहमद र ह्युम्यानिटी फर्स्ट इन्टरनेसनलका अगुवा अजहर अहमद खादिमको नेतृत्वमा सम्पन्न भएको संघले उल्लेख गरेको छ। अभियानमा भारतको पञ्जाबबाट आएका डा. बदर (होमियोप्याथ) र उनको टिम, काठमाडौं जिल्ला इञ्चार्ज हासिम अहमद, युवा समाजका अध्यक्ष नईम अहमद तथा नासिर अहमद काहलोनसहितको युवा टिमले सक्रिय योगदान पुर्याएका थिए।
