काठमाडौं - वैदेशिक रोजगारीमा जानका लागि चालु आर्थिक वर्षको ११औं महिना अर्थात् जेठमा झण्डै ६० हजार नेपालीले श्रम स्वीकृति लिएका छन् । वैदेशिक रोजगार विभागले सार्वजनिक गरेको विवरणअनुसार जेठ महिनामा ५९ हजार ४२२ जना नेपालीले नयाँ तथा पुनः श्रम स्वीकृति लिएर रोजगारीका लागि विदेशिएका हुन् ।
यससँगै चालु आर्थिक वर्षको ११ महिनामा विदेशिने कामदारको संख्या सात लाख ४७ हजार ९२२ पुगेको छ ।जेठमा विदेशिने नेपालीहरुको संख्या गत वैशाख महिनाको भन्दा चार हजार ९६५ ले बढेको छ । वैशाखमा यस्तो संख्या ५४ हजार ४५७ थियो । त्यसअघि चैतमा ६१ हजार ४७८ जना र फागुन महिनामा ६१ हजार ८४५ जनाले रोजगारीका लागि विदेश जान श्रम स्वीकृति लिएको विभागको तथ्यांकले देखाएको छ ।
चालु आवको सुरुआतदेखि नै पहिलो गन्तव्य बनेको मलेसिया जाने नेपाली कामदारको संख्या केही महिनादेखि क्रमशः घट्दै गएको देखिएको छ । जेठमा १४ हजार २०४ जनाले श्रम स्वीकृति लिएका छन् । यो संख्या वैशाख महिनाको भन्दा ४३० ले न्यून हो । वैशाखमा १४ हजार ६३४ जनाले मलेसिया गएका थिए । गत चैतमा १६ हजार २५६ जनाले श्रम स्वीकृति लिएका थिए । तुलनात्मक रुपमा २०७९ मंसिरदेखि मलेसिया जाने नेपालीको संख्या घट्नेक्रम जारी छ ।
यद्यपि विभागले सार्वजनिक गरेको तथ्यांकको आधारमा मलेसिया अझै पनि नेपालीहरुको पहिलो गन्तव्य नै रहेको छ ।
यसैगरी जेठ महिनामा रोजगारीका लागि कतार जान १० हजार ८७७ जनाले श्रम स्वीकृति लिएका छन् । विभागको तथ्यांकअनुसार गत वैशाखमा १० हजार २३०, चैतमा ११ हजार २४९, फागुनमा ११ हजार ३०३ जना श्रम स्वीकृति लिएर कतार गएका थिए ।
यस्तै संयुक्त अरब इमिरेट्स (युएई)मा १० हजार ६२६, साउदी अरेबियामा १० हजार ३५२ र कुवेतमा दुई हजार ७५९ जनाले जेठ महिनामा श्रम स्वीकृति लिएको विभागले जनाएको छ । वैशाख महिनाको तुलनामा युएई, साउदी र कुवेत जाने नेपालीको संख्या बृद्धि भएको छ । उल्लिखित पाँच मुलुकले नै नेपालको वैदेशिक रोजगारीको ठूलो हिस्सा (८० प्रतिशत) ओगटेको देखिन्छ ।
यसैगरी रोमानियामा एक हजार ९६, जापानमा एक हजार ८९, माल्दिभ्समा ६३०, क्रोएसियामा ६०५, साइप्रसमा ५७३, बहराइनमा ५८१, पोल्याण्ड ४८८, ओमानमा ३१०, माल्टामा २६७ जनाले रोजगारीमा जानका लागि श्रम स्वीकृति लिएका छन् । त्यस्तै इपिएस प्रणालीबाट दक्षिण कोरिया जाने नेपालीको संख्या दुई हजार ९६४ रहेको छ ।
विभागबाट कूल श्रम स्वीकृति लिनेमध्ये पुनः श्रम स्वीकृति लिने २१ हजार २८६ जना छन् भने पहिलोपटक विदेश जान श्रम स्वीकृति लिनेको संख्या ३८ हजार १३६ जना रहेका छन् । जेठमा श्रम स्वीकृति लिनेमध्ये छ हजार १११ जना महिला रहेको विभागले उल्लेख गरेको छ ।
विभागले सार्वजनिक गरेको तथ्यांकअनुसार जिल्लागतरुपमा धनुषाबाट सबैभन्दा बढी रोजगारीका लागि श्रम स्वीकृति लिएको देखिन्छ । धनुषाबाट दुई हजार ९८७ जना विदेशिएका छन् । दोस्रो स्थानमा रहेको झापाबाट दुई हजार ८४२ जना विदेश गएका छन् ।
यस्तै तेस्रो स्थानमा सिरहा परेको छ । यहँबाट दुई हजार ५६३ बाहिरिएका छन् । चौथोमा रहेको मोरङबाट दुई हजार ४४३ र पाँचौंमा रहेको महोत्तरीबाट दुई हजार ११५ जना रहेका छन् ।त्यसैगरी दाङ, चितवन, बारा बागलुङ, मकवानपुर, रुपन्देही, रौतहट, सर्लाही, सप्तरी, सुनसरी, स्याङ्जा, कपिलवस्तु र तनहुँबाट पनि विदेश जानेको संख्या ठूलो रहेको छ ।
००००
