- तीन दलका शीर्ष नेताबीच प्रधानमन्त्री दाहालले आफ्ना अभिव्यक्तिबारे स्पष्टीकरण संसद्मा दिने सहमति
- नयाँ बानेश्वर आइपुगेपछि ओली सहमति मान्न अनिच्छुक
- दाहालले माफी माग्नुपर्ने र उनको सचिवालयको विज्ञप्ति फिर्ता गर्नुपर्ने ओलीको अडान
- दाहाल माफी माग्न र विज्ञप्ति फिर्ता लिन तयार भएनन्
- सहमति भंगपछि संसद् बैठक सूचना टाँसेर स्थगित
काठमाडौं– प्रधानमन्त्री पुष्पकमल दाहाल, नेपाली कांग्रेसका सभापति शेरबहादुर देउवा र प्रमुख प्रतिपक्षी दल नेकपा एमालेका अध्यक्ष केपी शर्मा ओलीबीच भएको सहमति एक घण्टामै भंग भएपछि संसद् बैठक अनिश्चित बनेको छ । सहमति भंग गर्ने नेता भने एमाले अध्यक्ष केपी शर्मा ओली हुन् ।
सिंहदरबारमा आइतबार बिहान तीन नेताबीच भएको भेटवार्ताका क्रममा प्रधानमन्त्री दाहालले आफ्ना अभिव्यक्तिबारे संसद्मा स्पष्टीकरण दिने सहमति भएको थियो । त्यसपछि पालैपालो उनीहरूले हात मिलाएका थिए । जुन तस्बिरहरू सार्वजनिक भइसकेको छ । तर, सिंहदरबारमा सहमति गरेर संसद् भवन नयाँ बानेश्वर आइपुग्दा ओलीको बोली फेरियो ।
माओवादी संसदीय दलका प्रमुख सचेतक हितराज पाण्डेका अनुसार ओली सिंहदरबारमा भएको सहमति मान्न तयार भएनन् । ‘तीन नेताबीच सिंहदरबारमा छलफल हुँदा प्रधानमन्त्रीले आफ्ना भनाइबारे संसद्मा स्पष्ट पार्ने र त्यसपछि संसद्को अवरोध हटाउने भन्ने सहमति भएको थियो,’ उनले प्रभावसँग भने, ‘त्यसपछि हामी संसद् भवन पुग्यौं । त्यसबेला पो फेरि नमिल्ने कुरा आयो भन्ने सुनियो । किन नमिल्ने हुनुभयो ? थाहा छैन ।’
प्रधानमन्त्री दाहालले यही १८ असारमा भारतीय यातायात व्यवसायी प्रितम सिंहको जीवनीमा आधारित पुस्तक विमोचनको क्रममा आफूलाई प्रधानमन्त्री बनाउन पटक–पटक सिंह दिल्ली पुगेको बताएका थिए । त्यसपछि प्रमुख विपक्षी दल एमालेका सांसदहरूले दाहालको यस्तो अभिव्यक्तिलाई लिएर राजीनामा मागे । राजीनामा नआइञ्जेलसम्म संसद् चल्न नदिने अडान लिए । एमालेको अवरोधले संसद् बैठक अनिश्चित बनेको छ ।
एमाले सांसदहरूले राष्ट्रिय सभासमेत चल्न दिएका छैनन् । हरेकपटक अवरोध गर्दै आएका छन्, जुन क्रम आइतबार पनि जारी रह्यो ।प्रतिनिधिसभाका सभामुख देवराज घिमिरेले पनि प्रमुख विपक्षी एमालेसँग देखिएको विवाद सल्टाउनेबारे प्रधानमन्त्रीले सहमति नगर्दासम्म संसद् बैठक नचल्ने बताइसकेका छन् । यसरी एमालेदेखि सभामुखसम्मै यथास्थितिमा संसद् चल्न नदिने र नचलाउने पक्षमा उभिँदा प्रधानमन्त्री दाहाल थप दबाबमा परे ।
यसपछि शनिबार साँझ नै प्रधानमन्त्री दाहालले विपक्षी दलका नेता ओली र सत्तारुढ मुख्य दल कांग्रेस सभापति देउवासँग संवाद गर्न तयार रहेको बताएका थिए । नभन्दै आइतबार बिहानै सिंहदरबारमा तीन नेताबीच छलफल भयो । छलफलका क्रममा प्रधानमन्त्री दाहाल आफ्ना अभिव्यक्तिबारे संसद्मा स्पष्टीकरण दिन सहमत भए । ओली र देउवा पनि सहमत भएका थिए ।
यसपछि संसद् बैठक बस्ने सम्भावित कार्यसूची संसद् सचिवालयले प्रकाशन गरेको थियो । संसद् भवनमा सांसदहरू पुगेका पनि थिए । तर, नेताहरूबीच भएको सहमति ओलीले नयाँ बानेश्वर आइपुग्दा नमान्ने भन्दै तोडेसँगै संसद् सचिवालयले संसद् बैठक आइतबार दिउँसो ३ बजेका लागि सारिएको सूचना जारी ग¥यो । बैठक भने बसेन ।
एमाले संसदीय दलका प्रमुख सचेतक पदम गिरीले सञ्चारकर्मीलाई प्रधानमन्त्री दाहालका कारण बैठक नबसेको दाबी गरे । ‘प्रधानमन्त्रीले आफ्नो कमीकमजोरीको आत्मलोचना गर्ने र दलहरूलाई विश्वास दिलाउने सहमति नेताहरूबीच भएको थियो तर, उहाँ (प्रधानमन्त्री)ले जवाफको तयारीका लागि भन्दै समय माग्नुभयो । यसपछि बैठक सरेको हो ।’
स्रोतका अनुसार भने ओलीले प्रधानमन्त्री दाहाललाई संसद्मा स्पष्टीकरणसँगै आफ्ना अभिव्यक्तिबारे माफी पनि माग्नुपर्ने र्त नयाँबानेश्वर आइसकेपछि राखेका थिए । प्रधानमन्त्रीका प्रेस सल्लाहकार गोविन्द आचार्यले यही २१ फागुनमा जारी गरेको विज्ञप्ति फिर्ता लिनुपर्ने अर्को अडान पनि ओलीले राखेको बताए । यसबारे प्रधानमन्त्री सकारात्मक भएनन् । जसले गर्दा संसद् अवरोध कायमै रहन पुग्यो ।
आइतबार भने राष्ट्रिय सभामा उत्पत्ति भएको ‘नेपाल विश्वविद्यालय विधेयक’लाई राष्ट्रिय सभाबाट प्राप्त सन्देशसहित संसद्मा टेबुल गर्ने कार्यसूची थियो । केही नेपाल ऐन संशोधन गर्न बनेको विधेयक–२०८० माथि सांसदहरू ज्ञानबहादुर शाही, प्रेम सुवाल, सोविता गौतम र सुमना श्रेष्ठले दर्ज गरेको विरोधका सूचनाहरूलाई निर्णयार्थ प्रस्तुत गर्ने अर्को कार्यसूची थियो ।
कानुन, न्याय तथा संसदीय मामिलामन्त्री धनराज गुरुङले राष्ट्रिय सभामै उत्पत्ति भएको मुलुकी संहितासम्बन्धी केही नेपाल ऐनलाई संशोधन गर्न बनेको विधेयक–२०८० लाई पारित गरियोस् भन्ने प्रस्ताव पनि पेस गर्ने कार्यसूचीसमेत थियो । तर, ओलीले सिंहदरबारमा भएको सहमति नमान्ने भनेपछि संसद् बैठक बस्नै सकेन ।
