काठमाडौं- नेपाल प्रहरीले १३ वटा मुख्य लक्ष्यसहितको कार्ययोजना सार्वजनिक गरेको छ । प्रहरी प्रधान कार्यालयले तयार पारेको ‘नेपाल प्रहरी कार्ययोजना–२०८०’ शुक्रबार सार्वजनिक गरिएको हो ।
कार्ययोजनामा १३ वटा मुख्य लक्ष्य, ४० वटा लक्ष्यअनुरूपको कार्यगत उद्देश्य र १८३ वटा क्रियाकलाप समेटिएका छन् । नेपाल प्रहरीको आन्तरिक सुदृढीकरण योजनातर्फ पाँच वटा र नागरिक केन्द्रित प्रहरी सेवातर्फ चारवटा गरी प्राथमिकताको आधारमा जम्मा नौ वटा बेञ्चमार्क गतिविधि निर्धारण गरिएको छ ।
संघीय संरचना अनुरुप प्रहरी कर्मचारीको समायोजन गर्ने लक्ष्यसमेत कार्ययोजनामा समेटिएको छ । मुलुकभर सुदृढ शान्ति–सुव्यवस्था कायम राख्ने, अपराध रोकथाम तथा नियन्त्रण गर्ने, विशिष्टिकृत तथा वैज्ञानिक अपराध अनुसन्धान क्षमता अभिवृद्धि एवं प्रहरी सेवा प्रवाहको गुणस्तरमा व्यावसायिक सुदृढीकरण गरी समग्र प्रहरी संगठनको दीर्घकालीन विकास तथा रूपान्तरण गर्ने सन्दर्भमा कार्ययोजना तयार पारी लागू गर्न लागिएको शुक्रबार प्रहरी प्रधान कार्यालयमा आयोजित पत्रकार भेटघाट कार्यक्रममा जानकारी दिइयो ।
उक्त योजना आगामी साउन १ गतेदेखि लागू गरिने प्रहरी महानिरीक्षक वसन्तबहादुर कुँवरले जानकारी दिए । कार्ययोजनाले समयानुकूल सांगठानिक विकासमा महŒवपूर्ण टेवा पुग्ने विश्वास लिइएको उनले बताए । महानिरीक्षक कुँवरले प्रहरी संगठनको सुधार र रुपान्तरणका लागि अहिले उपयुक्त अवसर रहेकोसमेत बताए । उनले अहिले प्रहरी संगठनलाई राजनीतिक नेतृत्वबाट राम्रो सहयोग प्राप्त भएको पनि स्पष्ट पारे । ‘संगठनको रुपान्तरण र विकासका लागि वातावरण राम्रो रहेको छ,’ कुँवरले भने, ‘तर साधन स्रोतको कमी र राष्ट्रको ढुकुटी रित्तिएका बेला चुनौती छ ।’
वर्तमान समयमा गृह मन्त्रालयको नेतृत्व आक्रामकरूपमा लागे पनि अन्य क्षेत्रबाट विविध सीमाका कारण पनि अपेक्षा पूरा हुन नसकेको उनले बताए । कार्यक्रममा नेपाल प्रहरी प्रधान कार्यालय अन्वेषण योजना तथा विकास निर्देशनालयका प्रहरी वरिष्ठ उपरीक्षक विश्व अधिकारीले नेपाल प्रहरी कार्ययोजना–२०८०, नेपाल प्रहरी कार्ययोजना–२०७९ को समीक्षा, कार्यान्वयन प्रक्रिया एवं कार्ययोजना बेञ्चमार्क गतिविधिसम्बन्धी प्रस्तुतीकरण गरेका थिए ।
सो क्रममा प्रहरी प्रवक्ता, प्रहरी नायव महानिरीक्षक कुबेर कडायतले अहोरात्र जनताको जीउधनको सुरक्षामा खटिनुपर्ने जिम्मेवारी बहन गर्न उच्च मनोवलयुक्त प्रहरी कर्मचारीबाट मात्र सम्भव भएको बताए । यसका लागि आन्तरिक शुद्धीकरण, वैज्ञानिक र विशिष्टीकृत अपराध अनुसन्धान प्रणाली, प्रहरी कर्मचारीका आधारभूत आवश्यकताको परिपूर्ति, वृत्ति विकास र कल्याणकारी योजना यस कार्ययोजनाको मुख्य लक्ष्यमा परेको उनले उल्लेख गरे ।
प्रचलित कानुनको अधीनमा रही मुलुकभर सुदृढ शान्ति–सुव्यवस्था कायम राख्ने, अपराध रोकथाम तथा नियन्त्रण गर्ने विशिष्टीकृत तथा वैज्ञानिक अपराध अनुसन्धान क्षमता अभिवृद्धि एवं प्रहरी सेवा प्रवाहको गुणस्तरमा व्यावसायिक सुदृढीकरण गरी समग्र प्रहरी संगठनको दीर्घकालीन विकास तथा रूपान्तरण गर्ने कार्ययोजनाको उद्देश्य रहेको छ ।
मुद्दा दर्ता र पक्राउ ११ प्रतिशतले बढ्यो
मुलुकमा अपराधका घटनाहरू बढेको प्रहरीले जनाएको छ । गत वर्षको चैतदेखि असारसम्म तीन महिनाको तुलनामा यस वर्षको सोही अवधिमा मुद्दा दर्ता ११ प्रतिशतले बढेको हो । यस्तै पक्राउ पर्नेको संख्या ११.२२ प्रतिशतले बढेको प्रहरी नायब महानिरीक्षक एवं नेपाल प्रहरीका प्रवक्ता कुबेर कडायतले जानकारी दिए ।
साइबर अपराधका मुद्दा सबैभन्दा बढी उजुरी परेको जनाउँदै उनले प्रहरीले अघिल्लो तीन महिनाको तुलना गर्दा बैंकिङ कसुरका मुद्दा दोब्बरले बढेको बताए । उनका अनुसार प्राप्त विवरणमा गत वर्षको तीन महिनामा एक हजार ८०० को हाराहारीमा बैंकिङ कसूरका मुद्दा दर्ता भएकामा यस वर्ष त्यो संख्या बढेर तीन हजार ५०० भन्दा बढी छन् ।
प्रहरीका अनुसार यस अवधिमा कूल तीन हजार ५६२ जना फरार अपराधीलाई पक्राउ गरिएको छ । उनीहरूबाट एक हजार ८७० वर्ष १० महिना २५ दिन कैद असुल गरिएको छ भने तोकिएको ३० करोड ३८ लाख १६ हजार रकम असुल गर्नुपर्ने देखिएको प्रहरी प्रवक्ता कडायतले बताए ।
उनका अनुसार उक्त अवधिमा गाँजामात्रै छ हजार ९६१ किलो, चरेस १७९ किलो, खैरो हेरोइन चार किलो २५ ग्राम र अफिम चार किलो ९८ ग्राम बरामद गरिएको छ । लागुऔषध ब्युरोको विशेष अपरेसनमा रात्रिकालीन क्लबहरूमा गरिएको विशेष अपरेसनमा पाँच विदेशीसहित ११ जनालाई पक्राउ गरिएको छ ।
प्रहरीले दिएको जानकारीअनुसार सहकारी ठगीका विषयमा प्रहरीले केही व्यक्तिलाई पक्राउ गरी कानुनी दायरामा ल्याएको छ । शिवशिखर बहुउद्देश्यीय सहकारी र तुलसी बहुमुखी सहकारीका शाखा कार्यालयहरूबाट एक लाख ८९ हजार ८७९ निक्षेपकर्ताहरूको १२ अर्ब २३ करोड ५१ लाख रुपैयाँ रकम दुरुपयोग भएको भेटिएको कडायतले बताए । उनका अनुसार उक्त रकम दुरुपयोगका आरोपमा सहकारीका सञ्चालक केदारनाथ शर्मालाई पक्राउ गरी कानुनी कारबाही थालिएको छ ।
अन्य सहकारी ठगीतर्फ दुई अर्ब ४४ करोड २१ लाख रुपैयाँ बिगो कायम गरी अन्य सहकारी ठगीका आरोपीविरुद्ध पाँचवटा मुद्दा दर्ता भएका छन् भने उक्त मुद्दमा संलग्न रहेको आरोपमा १३ जनालाई पक्राउ गरिएको छ । यस अवधिमा लामो हतियार १५३, छोटा हतियार १६, गोली १४७ र म्यागजिन छ वटा बरामद गरिएको प्रहरीले जनाएको छ । प्रहरीका अनुसार छ हजारभन्दा बढी हातहतियार भने नष्ट गरिएका छन् ।
