धरान– नेपाली कांग्रेसका नेता रामचन्द्र पौडेलले कम्युनिष्ट पार्टीको सरकारले राज्य व्यवस्थालाई आफ्नो सिद्धान्त अनुरूप बनाउने तयारीमा रहेको बताएका छन् ।
नेपाली कांग्रेस धरान नगरसमितिद्धारा आयोजित कार्यक्रममा उनले अहिले कम्युनिष्ट पार्टीको दुईतिहाई नजिकको सरकार भएकोले यस्तो तयारीमा रहेको बताए । उनले आफुले नेकपाको केन्द्रीय कमिटिको बैठकले पास गरेको दस्तावेज हेरेको भन्दै उनीहरू राज्य व्यवस्थालाई आफ्नै ढाँचा लैजानुपर्ने मत कम्युनिष्ट पार्टीको बैठकमा नेताहरूले उठाएका बताए । उनले भने, ‘कम्युनिष्ट नेताहरूले भाषणमा मात्र होइन, अब कम्युनिष्ट पद्दतीलाई अगाडि बढाउन बहस सुरु गरेका छन् । राज्य व्यवस्थालाई अब सर्वसत्तावाद तर्फ उन्मुख गराउँदै छन् ।’ उनीहरूले २०४६ सालमा कम्युनिष्ट नारा चल्दैन भनेर जनताको बहुदलिय जनवाद भनेर जनतालाई झुक्याएको पनि उनको आरोप थियो । उनले हालको सरकारले बहुलवाद मान्ने भनेर जनतासँग भोट मागेर आज दुईतिहाई नजिक पुगेपछि कम्युनिष्ट आर्दश अनुसारको शासन व्यवस्थाको बहस सुरु गरेको बताए । उनले भने, ‘उनीहरूले आफ्नो इच्छा संविधान बनाउने बेलामा पनि प्रकट गरेका थिए । तर हामीले त्यो बेलामा उनीहरूको इच्छालाई रोकियो । लोकतान्त्रीक पद्दतीको शासन व्यवस्था हुने गरि संविधान बनायौँ । तर अहिले उनीहरू संविधान बनाउने क्रममा देखाएका कम्युनिष्ट आर्दशलाई कानुन बनाएर प्रयोग गर्न लागिरहेका छन् । कानुन बनाएर शासन गर्न लागेका छन् ।’ संविधानलाई रद्दीको टोकरीमा फालेर नयाँ नयाँ कानुन बनाउन कम्युनिष्टहरू लागेको उनको आरोप छ । उनले भने, ‘हाम्रो कमजोरीका कारण जनताका आँखामा छारो हालेर कम्युनिष्टहरूले जनमत ल्याए । अहिले त्यही जनमतको दुरूपयोग गर्न लागेका छन् । नेपाली जनताले कम्युनिष्टहरूलाई बहुलवाद मास्न कम्युनिष्ट शासन लागू गर्नका लागि मत दिएका होइनन् ।’
उनले सरकार अहिले शितलनिवासलाई शक्तिशाली बनाउने दाउमा रहेको बताए । राष्ट्रपतिलाई शक्तिशाली बनाएर राष्ट्रपति शासन लागु गर्ने तयारीमा रहेको उनको भनाई थियो । उनले भने, ‘यो संविधानसभाले बनाएको संविधानको मर्म विपरित हो ।’ संविधानलाई पन्छाउँदै विभिन्न कानुन बनाएर उनीहरू राष्ट्रपतिको अधिकार बढाउने तयारीमा रहेको उनले बताए ।
