काठमाडौं– वैदेशिक रोजगार व्यावसायमा सयभन्दा बढी म्यानपावर धरासायी अवस्थामा रहेका छन् । वैदेशिक रोजगार विभागले मंगलबार सार्वजनिक गरेको तथ्यांकअनुसार माघ महिनामा सय वटा म्यानपावर व्यवसायीले १ जनालाई पनि वैदेशिक रोजगारीमा पठाउन नसकेपछि ती म्यानपार कम्पनीहरू धरासायी अवस्थामा पुगेका हुन् ।
सरकारले एक आर्थिक वर्षभित्र कम्तीमा सय जना कामदार पठाउन नसक्ने म्यानपावर कम्पनीको इजाजतपत्र रद्ध गर्ने कानुनी व्यवस्था ल्याएको छ । प्रत्येक वर्ष सय जना श्रमिक अनिवार्य विदेश पठाउनै पर्ने बाध्यकारी व्यवस्था भए पनि धेरै म्यानपावर कम्पनीहरूले सो संख्या पुर्याउन हम्मेहम्मे पर्ने देखिन्छ ।
विभागका अनुसार माघ महिनामा सय वटा म्यानपावर कम्पनीले १ जना पनि वैदेशिक रोजगारीमा पठाउन सकेका छैनन् । जसमा ६४ वटा म्यानपावर कम्पनीलाई विभागले कारबाही गरी कारोबार बन्द राखेको थियो भने ३६ वटा म्यानपावर कम्पनीको कारोबार खुल्ला रहँदा पनि वैदेशिक रोजगारमा पठाउन नसकेका हुन् । ६४ म्यानपावर कम्पनीले १ जना मात्र, ३८ म्यानपावर कम्पनीले २ जना मात्र, २३ म्यानपावर कम्पनीले ३ जना मात्र र ३० म्यानपावर व्यवसायीले ४ जना मात्र पठाएका छन् ।
आ.व ०७६÷७७ को अहिलेसम्ममा अत्याधिक कम कामदार पठाउने र सरकारले ल्याएको सय जना पठाउनै पर्ने थ्रेसहोल्ड पार गर्न १ सयभन्दा बढी कम्पनीले नसक्ने देखिएको विभागका एक कर्मचारीले बताए ।
तथ्यांकअनुसार दि रिभर ओभरसिज प्रा.लि. सबैभन्दा बढी कामदार पठाउने म्यानपावर सूचीको पहिलो नम्बरमा परेको छ । रिभरले माघ महिनामा मात्रै ५ सय २० कामदार पठाएको छ । रिभरले पुस महिनामा ५ सय ९३ जना विदेश पठाएको थियो । एसओएस सर्भिसेस प्रा.लि.ले ३ सय ३८ कामदार पठाएर सूचीको दोस्रो नम्बरमा परेको छ । तेस्रो नम्बरमा रहेको प्यारडाइज इन्टरनेसनल सर्भिस प्रा.लि.ले ३ सय ३० जना पठाएको छ ।
विभागले सार्वजनिक गरेको तथ्यांकअनुसार माघ महिनामा ४८ हजार ६ सय ७४ जना नेपाली कामदार वैदेशिक रोजगारीका लागि विदेशिएका छन् । आ.व. ०७६÷७७ को माघ महिनामा तुलनात्मक रूपमा वैदेशिक रोजगारीमा जानेको संख्यामा कमी आएको देखिन्छ । वैदेशिक रोजगारमा जानेको संख्या आ.व ०७६÷७७ को अहिलेसम्ममा ३ लाख १ हजार ४ सय २५ पुगेको छ । सरकारले म्यानपावर कम्पनीमार्फत कामका लागि जान सक्ने भन्दै १ सय ७२ वटा देशका लागि स्विकृति दिएको छ । अवैधानिक रूपमा वैदेशिक रोजगारमा जाने र भारतमा रोजगारीका निम्ति गएका नेपाली कामदारको विवरण भने विभागले समावेश गरेको छैन । संस्थागत श्रम स्विकृतिमार्फत २५ हजार १ सय ७१ जना, पुनः स्विकृति लिएर २१ हजार ३ सय ४४ जना, नयाँ व्यक्तिगत श्रम स्विकृतिमार्फत १ हजार २ सय ३४ जना, वैधानिकीकरण गरेर ९ सय २५ जना कामदार गएका छन् ।
विभागको तथ्यांक अनुसार माघ महिनामा सबैभन्दा धरै कामदार साउदी अरब गएका छन् । गत महिना ११ हजार १ सय १० जना मलेसिया गएका छन् । साउदीपछि कतारमा सर्वाधिक नेपाली कामदार गएका छन् । माघमा कतार जानेको संख्या १० हजार ७ सय ६४, मलेसिया जानेको संख्या १० हजार ५ सय ४४ रहेको छ भने युएई जानेको संख्या १० हजार ८९ रहेको छ । माघ महिनामा श्रम स्विकृति लिएर विश्वका विभिन्न ८२ मुलुकमा नेपाली कामदार पुगेका छन्, जसमा १ जना मात्र जाने देशको संख्या १९ रहेको छ ।
माघ महिनामा श्रम स्विकृति लिएका मध्ये सबैभन्दा धेरै अदक्ष कामदार रहेका छन् । गत महिना २७ हजार ४ सय १७ अदक्ष जनशक्ति विदेश पुगेका छन् । त्यसैगरी, सीपयुक्त जनशक्ति १६ हजार ७ सय १९ जना, अद्र्धसीप भएका ४ हजार ४ सय ९१ जना, व्यवसायिक सीप भएका ४२ जना र विशिष्ट सीप भएका ५ जनाले अन्तिम श्रम स्विकृति लिएको विभागले जनाएको छ ।
