इस्लाम्बाद - पाकिस्तानका प्रधानमन्त्री शहबाज सरिफ थप चार वर्षका लागि पाकिस्तान मुस्लिम लिग–नवाज (पीएमएल–एन) को अध्यक्षमा निर्वाचित भएका छन् ।पाकिस्तानको मूलधारको सञ्चारगृह डनका अनुसार पीएमएल–एनको अध्यक्षमा सरिफ, उपाध्यक्षमा मरियम सरिफ र महासचिबमा अहसान इकबाललाई चयन गरिएको छ ।
पाकिस्तानका वर्तमान अर्थमन्त्री इशाक डार पीएमएल–एनको विदेश तथा अन्तर्राष्ट्रिय मामिलाको अध्यक्षमा निर्वाचित भएका हुन् ।पीएमएल–एनका अनलाइन सर्वोच्च नेता नवाज सरिफ र शहबाज सरिफले संयुक्त रूपमा दलको केन्द्रीय साधारण सभाको अध्यक्षता गरेका थिए ।
सो अवसरमा प्रधानमन्त्री सरिफले आफ्ना दाजु नवाजको आगमनको पर्खाइमा आफूले पीएमएल–एनको साधारण सभा र आन्तरिक निर्वाचन स्थगित गरेको बताए । उनले महाधिवेशनलाई सम्बोधन गर्ने क्रममा भूतपूर्व प्रधानमन्त्री इमरान खानमाथि कटाक्ष गर्दै खानले आफ्नो गलत उद्देश्यका लागि झुट र गलत प्रचार फैलाइरहेको र जनतालाई भ्रममा पार्ने काम गरिरहेको बताएका थिए ।
यसैबीच मरियम नवाजले पार्टी पदसम्बन्ध, प्राथमिकता र रुचिका आधारमा नभई कार्यसम्पादन र योग्यताका आधारमा तोक्नुपर्ने बताएका थिए । पाकिस्तान मुस्लिम लिग–नवाज (पीएमएल–एन) का अध्यक्ष सरिफले पीएमएलको सर्वोच्च नेता नवाज सरिफलाई चुनावी अभियानको नेतृत्व गर्न र चौथो पटक प्रधानमन्त्री बन्न आग्रह गरेका थिए ।
पार्टीको केन्द्रीय साधारण सभालाई सम्बोधन गर्दै सरिफले आफू आफ्ना दाजु पाकिस्तान फर्कने र त्यसपछि पार्टीको बैठक बस्ने प्रतिक्षामा रहेको बताएका थिए । नवाज सरिफ सन् २०१९ को नोभेम्बरदेखि स्वास्थ्यका कारण लण्डनमा स्वनिर्वासित जीवन बिताइरहेका छन् ।
प्रधानमन्त्रीसमेत रहेका सरिफले सभालाई सम्बोधन गर्दै भने, “निर्वाचन आयोगको तरवार झुण्ड्याइएको थियो, त्यसैले यो बैठक बसेको हो ।” जियो न्यूजका अनुसार सर्वोच्च अदालतले पूर्व प्रधानमन्त्री नवाज सरिफलाई अयोग्य ठहर गर्दै कुनै पनि पार्टी पद धारण गर्न प्रतिबन्ध लगाएका कारण शहबाजलाई पीएमएल–एनको अध्यक्षको जिम्मेवारी दिइएको हो ।
