बुटवल– मुख्यमन्त्री शंकर पोखरेलले प्रदेश सरकार जनतालाई स्वास्थ्य सेवाका लागि प्रदेशका स्वास्थ्य संस्थालाई सुदृढ बनाउने कार्यको थालनी भएको बताएका छन् ।
प्रदेश नं ५ को स्थापनाको दुई वर्ष पूरा भएको अवसरमा आयोजित मूल समारोहमा उनले प्रदेश मातहतमा रहेका अस्पताल र उपचार केन्द्रमा आवश्यक जनशक्ति एंव औषधि, उपकरणको नियमित आपूर्तिका लागि विभिन्न कार्यक्रम सञ्चालन गरिएको बताए । यस्तै लुम्बिनी प्रादेशिक अस्पताललाई सुदृढ गरी प्रदेशको गौरवको आयोजनाको रूपमा विकास गरिने कार्यको थालनी गरिएको पनि बताए ।
समारोहमा प्रदेश सरकार थुप्रै चुनौतीको सामना गर्दै प्रदेश योजनाबद्ध विकासको यात्रामा अघि बढेको पनि बताए । उनले आवधिक योजना निर्माण र कानून निर्माणमा प्रदेश नं ५ पहिलो भएको यस प्रदेशको विकास र समृद्धि सबैको साथबाट सम्भव रहेको बताए ।
मुख्यमन्त्री पोखरेलले दुई वर्षमा प्रदेश सरकारले आफ्नो महत्वपूर्ण उपस्थितिको जग स्थापना गरेको बताए । उनले तीन तहको निर्वाचनपश्चात शून्य संरचनामा स्थापित प्रदेश सरकारले स्थापनाको छोटो समयमै सबैले सुन्ने र देख्ने गरी कार्यान्वयन गर्न सफल भएको बताए ।
उनले प्रदेश सरकार अन्तरराष्ट्रिय सम्बन्धको विकासका लागि प्रदेश र प्रदेशअन्तर्गतका विभिन्न स्थानीय तहले मित्रराष्ट्रका विभिन्न प्रान्त र शहरसँग भगिनी सम्बन्ध स्थापना हुनुले अन्तर्राष्ट्रियस्तरमा प्रदेश र स्थानीय तह स्थापित हुन सफल भएको बताए ।
मुख्यमन्त्री पोखरेलले पर्यटनको विकास प्रदेशको विकासको एक महत्वपूर्ण क्षेत्र रहको बताउँदै पर्यटनको विकासका लागि सामाजिक, सांस्कृतिक, प्राकृतिक, धार्मिक, ऐतिहासिक र पुरातात्विकलगायत क्षेत्रको पहिचान गरी एकीकृत विकासमा सरकारले जोड दिएको बताए । उनले लुम्बिनी र यससँग जोडिएका सम्पदाको विकास, प्रवद्र्धनका लागि प्रदेश सरकारले यस वर्षलाई लुम्बिनी भ्रमण वर्षको रूपमा मनाइरहेको उल्लेख गरे ।
समारोहमा बुटवल उपमहानगरपालिकाका प्रमुख शिवराज सुवेदीले तीनै तहका सरकार जनआकांक्षाअनुसार योजनाबद्ध विकासमा लागेको र विकासका कामको नतिजा देखिन थालेको बताए ।
