काठमाडौं- वैदेशिक रोजगार विभागले दक्षिण अफ्रिकामा रोजगारीमा पठाइदिने भन्दै मानव बेचविखन एवं गैरकानुनी आप्रवासनमा संलग्न गिरोह सक्रिय रहेको बताएको छ । उक्त गिरोहले नक्कली ‘वर्क पर्मिट’ मार्फत आकर्षक तलब सुविधासहितको पदमा दक्षिण अफ्रिका पठाउने भन्दै १५० भन्दा बढी नेपालीसँग लाखौं रकम संकलन गरिरहेको जानकारी प्राप्त भएको विभागले जनाएको छ ।
विभागले बुधबार एक विज्ञप्ति जारी गर्दै उक्त गिरोहले नेपालीहरुबाट लाखौं रकम संकलन गर्दै दक्षिण अफ्रिकामा रोजगारसम्बन्धी सामाजिक सञ्जालहरुमासमेत भ्रमपूर्ण विज्ञापन सम्प्रेषण गरेको उल्लेख छ । तसर्थ, दक्षिण अफ्रिका जान लागेका नेपालीहरुलाई भ्रममा नपर्न र सावधानी अपनाउन आग्रह गरेको छ ।
विभागले दक्षिण अफ्रिकाको सरकारी राजपत्रमा २ अगस्ट २०२२ मा प्रकाशित सूचनाअनुसार विशेष ज्ञान, सीप आवश्यक पर्ने १४० किसिमको दक्ष जनशक्ति माग भएको यथार्थ भए पनि विदेशी नागरिकबाट पदपूर्ति हुने अवस्था नरहेको जनाएको छ । तर, स्वदेशी नागरिकबाट पदपूर्ति नहुने अवस्थामा मात्रै विदेशीलाई रोजगारमा लिने कानुनी व्यवस्था रहेको जनाउँदै त्यस्तो अवस्था आएमा अफ्रिका जान नेपाल सरकारको प्रचलित कानुनबमोजिम श्रम स्वीकृति लिएर मात्र जानुपर्ने विभागले उल्लेख गरेको छ ।
भारतमा रहेको दक्षिण अफ्रिकाको उच्चायुक्त र वाणिज्य दूतावासबाट जारी हुने पर्यटक भिसा पर्यटन भ्रमणका लागि जाने प्रयोजनका लागिमात्र भएको हुँदा सो भिसाका आधारमा रोजगारीका गतिविधिमा संलग्न हुन नपाइने विभागले जनाएको छ ।
पर्यटक भिसामा जानेहरु रोजगारीमा संलग्न भए त्यस्ता व्यक्तिहरुलाई पक्राउ गरी अफ्रिकी कानुनबमोजिम कारबाही तथा देश निकाला (डिपोर्टेसन) गर्ने विभागले जनाएको छ । दक्षिण अफ्रिकाबाट युरोप, अमेरिकालगायतका देशहरुमा जान सजिलो हुने कुरा भ्रामक र मिथ्या भएकाले सम्बन्धित देशको नियोग या विदेशस्थित नेपाली नियोगहरूमा सम्पर्क गरी आधिकारिक जानकारी लिन पनि विभागले आग्रह गरेको छ ।
विभागको कार्यालय ताहाचल सर्ने
वैदेशिक रोजगार विभागको कार्यालयलाई ताहाचलमा सारिने भएको छ । जेठ २१ गतेदेखि आंशिकरुपमा ताहाचलबाट सेवा प्रवाह गर्ने भन्दै कार्यालय सार्न लागिएको विभागले जनाएको छ ।विभागका निमित्त महानिर्देशक गुरुदत्त सुवेदीले एक सूचना जारी गर्दै जेठ २१ गतेदेखि आंशिक र असार १ गतेबाट पूर्णरुपमा सेवा दिनेगरी ताहाचलस्थित वैदेशिक रोजगार कार्यालय रहेको स्थानमा विभागलाई सार्न लागिएको जानकारी दिए ।
विभागबाट भइरहेका सेवा प्रवाह वैदेशिक रोजगार कार्यालय परिसरभित्रैबाट हुने सूचनामा उल्लेख छ । हाल विभागले काठमाडौंको बुद्धनगरमा रहेको हिमालयन सीमापार व्यापार संघको भवन भाडामा लिएर सेवा प्रवाह गर्दै आएको छ ।
प्रकाशित मिति: बिहीबार, जेठ १८, २०८० १०:५१
-1745656903.jpeg)