काठमाडौं - इजरायलका दीर्घकालीन स्याहार केन्द्रमा कार्यरत नेपाली सहायक कामदार (केयर गिभर)को तलब बढेको छ । इजरायल सरकारले एक महिनाअघि जिटुजीमार्फत गएका त्यस्ता कामदारको न्यूनतम पारिश्रमिक बढाउने निर्णय गरेको हो ।
सहायक कामदारहरुले यसअघि न्यूनतम पारिश्रमिक पाँच हजार ३०० सेकल (इजरायली मुद्रा) पाउँदै आएकामा अब पाँच हजार ५७१ सेकल अर्थात् दुई लाख दुई हजार नेपाली रुपैयाँ पाउने छन् । यस निर्णयसँगै इजरायलले प्रत्येक वर्ष कामदारको न्यूनतम पारिश्रमिक बढाउने भएको छ ।
वैदेशिक रोजगारीका लागि आकर्षक गन्तव्य मानिएको इजरायलमा नेपाल सरकारले जिटुजीमार्फत झण्डै एक हजार २०० नेपाली कामदार पठाइसकेको छ । कामदारको तलब वृद्धि भएसँगै नेपाल भित्रिने रेमिट्यान्ससमेत बढ्ने देखिएको छ ।
वैदेशिक रोजगार विभागअन्तर्गत इजरायल शाखाका अनुसार रोजगारीका लागि इजरायल जाने सहायक कामदारको करार सम्झौता एक वर्ष हुनेछ भने करार सम्झौता थप गरी पाँच वर्षसम्म काम गर्न पाइनेछ ।
इजरायल जाने नेपाली कामदारलाई हवाई भाडा, बिमा, अभिमुखीकरण तालिम, पासपोर्ट, कल्याणकारी कोषमा राख्नुपर्ने रकम र सामाजिक सुरक्षा कोषमा योगदान रकमसहित बढीमा एक लाख रुपैयाँसम्म लाग्नेछ ।
पहिलो चरणमा केयर गिभरका लागि इजरायल जान नौ हजार ६९९ जनाले निवेदन दिए पनि एक हजार १७५ जनामात्रै छनोट भएका थिए । छनोटमा परी इजरायल गएका कामदारमा ८२१ जना महिला र ३५४ जना पुरुष रहेको शाखाले जनाएको छ ।
यस्तै इजरायलले थप ५०० नेपालीलाई सहायक कामदारको रोजगारी दिने प्रतिबद्धता जनाएको छ । यद्यपि, प्रक्रिया अघि बढ्न सकेको छैन । केयर गिभरमा मात्र नभई कृषि तथा निर्माण क्षेत्रमा पनि एक हजारभन्दा बढी नेपाली कामदार लिने इजरायलले बताउँदै आएको छ ।
प्रकाशित मिति: आइतबार, जेठ १४, २०८० १०:४४
-1752335779.jpg)
