काठमाडौं - वैदेशिक रोजगार बोर्डको सचिवालयले विदेशमा अंगभंग तथा मृत्यु भएका कामदार र तिनका परिवारलाई करिब ५६ करोड रुपैयाँ आर्थिक सहायता प्रदान गरेको जनाएको छ । बोर्डले चालु आर्थिक वर्षको १० महिनामा वैदेशिक रोजगार कल्याणकारी कोषमार्फत ५५ करोड ९० लाख रुपैयाँ सहायता प्रदान गरेको हो ।
बोर्डले गत वैशाख मसान्तसम्मको अवधिमा विदेशमा विभिन्न कारणले मृत्यु भएका कामदारको परिवार वा नजिकका हकवालालाई ४८ करोड ९२ लाख र अंगभंग भई फर्केका श्रमिकलाई छ करोड ९७ लाख रुपैयाँ आर्थिक सहायता उपलब्ध गराएको उल्लेख गरेको छ । यस अवधिमा रोजगारीका लागि विदेशमा रहेका ९६१ जना कामदारको मृत्यु र २२० जना अंगभंग भएको बताइएको छ ।
विभिन्न कारणले अंगभंग र मृत्यु भएका एक हजार १८१ नेपाली कामदारमध्ये एक हजार १११ जनालाई कल्याणकारी कोषबाट आर्थिक सहायता उपलब्ध गराएको बोर्डका निर्देशक एवं सूचना अधिकारी राजन पौडेलले बताए । कोभिड संक्रमणअघिको तुलनामा वैदेशिक रोजगारीका क्रममा मृत्यु भई सरकारबाट आर्थिक सहायता लिने कामदारको संख्या बढेको उनले जानकारी दिए ।
सरकारले बिदामा नेपाल फर्किएर मृत्यु भएका कामदार र पुराना मृतकका परिवारलाईसमेत आर्थिक सहायता उपलब्ध गराउने निर्णय गरेको कारण पनि मृतकको संख्या र सहायता रकम बढेको पौडेलले बताए । सरकारले दुई वर्षअघि श्रम स्वीकृति लिएर वैदेशिक रोजगारीमा रहेका कामदारको स्वदेश वा विदेशमा जहाँ मृत्यु भए पनि उनीहरुको परिवारलाई आर्थिक सहायता उपलब्ध गराउने निर्णय गरेको थियो । त्यही कारण गत वर्षको सोही अवधिको तुलनामा मृतक र सहायता रकममा बढेको बोर्डले जनाएको छ ।
सरकारले आर्थिक सहायता वितरणको दायरा फराकिलो बनाएसँगै वैदेशिक रोजगारीमा गई मृत्यु, अंगभंग, गम्भीर बिरामीको उपचार, अलपत्र परेकाहरुको उद्धार र शव ढुवानीमा हुने दायित्वसमेत बढ्दै गएको छ । गत आर्थिक वर्ष २०७८÷७९ मा ५० करोड रुपैयाँमात्रै आर्थिक सहायताका उपलब्ध गराइएको बोर्डले जनाएको छ । यसरी परिस्थितिजन्य अवस्थामा परी अंगभंग, गम्भीर बिरामी र मृत्यु हुने कामदार र तिनका परिवारलाई हाल उपलब्ध गराउँदै आएको आर्थिक सहायता रकम अपुग रहेको भन्दै वृद्धि गर्न बोर्डले आवश्यक गृहकार्य गरिरहेको छ ।
यस्तै वैदेशिक रोजगारीमा गएका नेपालीहरुको मृत्युका कारण प्राकृतिक, गम्भीर बिरामी, कोभिड–१९, सडक दुर्घटना, आत्महत्या, हृदयघात, कार्यस्थलमा हुने दुर्घटनालाई मानिएको बोर्डले जनाएको छ । १० महिनाको अवधिमा सबैभन्दा बढी नेपाली कामदारको मृत्यु मलेसियामा भएको छ । मलेसियामा मात्रै ४११, साउदी अरबमा ३८९, कतार २९४, युएई २०६, कुवेत ६५, कोरिया १६ र अन्य मुलुकमा गरी ९८ जना कामदारको मृत्यु भएको बोर्डले जनाएको छ ।
प्रकाशित मिति: सोमबार, जेठ ८, २०८० १०:४९
-1745656903.jpeg)