काठमाडौं - वैदेशिक रोजगारीका लागि चालु आर्थिक वर्षको १०औं महिना अर्थात् वैशाखमा ५० हजारभन्दा बढी नेपालीले श्रम स्वीकृति लिएका छन् । वैदेशिक रोजगार विभागले सार्वजनिक गरेको तथ्यांकअनुसार वैशाख महिनामा ५४ हजार ४५७ जना नेपालीले नयाँ तथा पुनः श्रम स्वीकृति लिएका हुन् ।
वैशाखमा वैदेशिक रोजगारीमा जाने नेपालीको संख्या चैतको तुलनामा घटेको छ । चैतमा ६१ हजार ४७८ जनाले रोजगारीका लागि विदेश जान श्रम स्वीकृति लिएका थिए । वैशाखमा यस्तो संख्या सात हजार २१ जना न्यून भएको छ ।
यसअघि फागुन महिनामा ६१ हजार ८४५ जनाले रोजगारीका लागि विदेश जान श्रम स्वीकृति लिएका थिए । माघ महिनामा ६४ हजार २८४ र पुसमा ६५ हजार ४६४ जनाले श्रम स्वीकृति लिएको देखिन्छ । तथ्यांक हेर्दा गत आर्थिक वर्षबाट पुरानै लयमा फर्किएको वैदेशिक रोजगारीको यात्रा विस्तारै खस्किंदै गएको देखिन्छ ।
चालु आर्थिक वर्षको सुरुआतदेखि नै पहिलो गन्तव्य बनेको मलेसिया जाने नेपाली कामदारहरुको संख्यामा पनि केही महिनादेखि घट्दै गएको देखिएको छ । वैशाख महिनामा १४ हजार ६३४ जनाले मलेसिया जान श्रम स्वीकृति लिएका छन् । गत चैतको तुलनामा वैशाखमा श्रम स्वीकृति लिनेको संख्या एक हजार ६२२ ले कम हो ।
वैशाखको संख्या अघिल्लो महिना फागुनको भन्दा पाँच हजार १८१ ले कम हो । यद्यपि, विभागले सार्वजनिक गरेको तथ्यांकको आधारमा अझैपनि मलेसिया नेपालीहरुको पहिलो रोजाइको गन्तव्यको रुपमा कायम छ ।
यसैगरी वैशाख महिनामा रोजगारीका लागि कतार जान १० हजार २३० जनाले श्रम स्वीकृति लिएका छन् । कतार जाने नेपालीको संख्या पनि क्रमिकरुपमा घट्दै गएको छ । विभागको तथ्यांकअनुसार कतार जान चैत महिनामा ११ हजार २४९, फागुन महिनामा ११ हजार ३०३, माघ महिनामा १२ हजार ७०४ र पुस महिनामा १३ हजार ६६ जनाले श्रम स्वीकृति लिएका छन् ।
यस्तै संयुक्त अरब इमिरेट्स (युएई)मा नौ हजार ४८३, साउदी अरेबियामा आठ हजार ६८१ र कुवेतमा दुई हजार ११० जनाले श्रम स्वीकृति लिएको विभागले जनाएको छ । चैत महिनाको तुलनामा युएई, साउदी र कुवेत जाने नेपालीको संख्यामा पनि गिरावट आएको छ । रोजगारीमा जाने नेपाली कामदारको संख्यामा कमी आए पनि उल्लिखित पाँच मुलुकले नै नेपालको वैदेशिक रोजगारीको ठूलो हिस्सा ओगटेको देखिन्छ ।
यसैगरी रोमानियामा एक हजार ६०६, जापानमा ८१७, पोल्याण्ड ६३५, बहराइनमा ५०५, साइप्रसमा ४६०, माल्दिभ्समा ४३०, ओमानमा ३५०, माल्टामा २५७ र क्रोएसियामा २१६ जनाले रोजगारीमा जानका लागि श्रम स्वीकृति लिएका छन् । त्यस्तै इपिएस प्रणालीबाट दक्षिण कोरिया जाने नेपालीको संख्या दुई हजार ५७४ रहेको छ । विभागबाट कूल श्रम स्वीकृति लिनेमध्ये पुनः श्रम स्वीकृति लिने २१ हजार १७ जना छन् भने पहिलोपटक विदेश जान श्रम स्वीकृति लिनेको संख्या ३३ हजार ४४० जना रहेका छन् ।
वैशाख महिनामा श्रम स्वीकृति लिनेमध्ये चार हजार ९४८ जना महिला रहेको विभागले उल्लेख गरेको छ ।विभागले सार्वजनिक गरेको तथ्यांकअनुसार जिल्लागतरुपमा धनुषाबाट सबैभन्दा बढी रोजगारीका लागि श्रम स्वीकृति लिएको देखिन्छ भने सिरहा दोस्रो स्थानमा रहेको छ । यस्तै झापा र मोरङ क्रमशः तेस्रो र चौथो स्थानमा छन् भने महोत्तरी पाँचौंमा रहेको छ ।
त्यसैगरी सुनसरी, रुपन्देही, सर्लाही, सप्तरी, कपिलवस्तु र चितवनबाट पनि विदेश जानेको संख्या ठूलो रहेको छ । चालु आर्थिक वर्षको सुरुआतीदेखि नै रोजगारीका लागि विदेशिने नेपालीको संख्यामा वृद्धि हुँदा यो १० महिनाको अवधिमा छ लाख ८८ हजार ५०० जनाले श्रम स्वीकृति लिएको विभागले जनाएको छ ।
धेरै नेपाली जाने १० मुलुक
मलेसिया– १४६३४
कतार– १०२३०
युएई– ९४८३
साउदी– ८६८१
कोरिया– २५७४
कुवेत– २११०
रोमानिया– १६०६
जापानमा– ८१७
पोल्याण्ड– ६३५
बहराइन– ५०५
-1745656903.jpeg)